Read Ateso Sekaria 4 Bible Online

Sekaria 4 - Ateso bible

Sekaria 4

¹ Kobu bobo emalaika lokiner keoŋ kitekweny eoŋ, kwape itekwenyunia ituŋanan kajoke.

² Katema ŋesi eoŋ atiar, “Inyo bo iany ijo?” Katema atiar, “Aany, ido koany, epir loka atala loka esabu kere, atubake da kujuke, ejaas da kaketalai akanykaarei; ejaas da ipiin ikanykaarei kaŋinidiopet naka atalai, nuejaas kujuke.

³ Kidunyas kikito iarei luka eseitun, ediopet kosiepike lokoteten loka atuba, ece da kosiepike lokokediany.”

⁴Kaboŋok emalaika lokinera keoŋ atiar, “Ekajakait, anyoika bo nu?”

⁵Kosodi emalaika lokinera keoŋ aboŋokin eoŋ ebe, “Mam ca ma jo ijeni ŋun?” Katema atiar, “Eeca, ekajakait.”

⁶ Kosodi ŋesi aboŋokin eoŋ ebe, “Na ŋes akirot naka EJAKAIT mama ejai Serubabel ebe: Ebala EJAKAIT loka ajoresio ebe, Mere kanuka agogoŋ, karaida kanuka apedor, konye kanuka Ekamoyo.

⁷ Iŋai ca ma ijo, ijo eroŋat lokapolon? Iraun apuuton kakonyen nuka Serubabel; itolomuni ŋesi amoru nakapolon kibwoŋas ebe, ‘Asianut, asianut mama ejai!’ ”

⁸Ido kobu akirot naka EJAKAIT mama ajai ebe,

⁹ “Apesikis akanin nuka Serubabel apetetait naka etogo kalo; enetakinete da akekanin ŋes. Ijenuni ijo da ebe kejuku EJAKAIT loka ajoresio eoŋ mama ijai.

¹⁰ Naarai iŋai ca emenit apaaran naka iboro ludidik? Naarai iyalamasi kesi, eanyunete ebiriji kakan naka Serubabel, “Nu akanykaarei, kes akonye nuka EJAKAIT; ekerete lailo ka laije anatar akwap kere.”

¹¹ Kasodi eoŋ aboŋokin ŋes ebe, “Inyo bo ikito lu luarei luka eseitun kosiep lokoteten loka epir loka atala kosiepike da lokokediany?”

¹²Kaboŋok eoŋ nakiareit katema ŋes atiar, “Inyo bo aluŋuren nu nuarei nuka eseitun, nuidunyas kamodoi nuka esabu, nuebukonorete akinyet naka esabu?”

¹³Kaboŋok ŋesi eoŋ ebe, “Mam ca ma jo ijeni ŋun?” Kabala ebe, “Eeca, ekajakait.”

¹⁴Kosodi ŋesi atemar ebe, “Ŋul kes luarei lukinyonyoikitono akinyet, luebwoete kodie ka EJAKAIT loka akwap kere.”