Read Ateso Sekaria 5 Bible Online

Sekaria 5 - Ateso bible

Sekaria 5

¹Kasodi bobo eoŋ aiteluor akakonye, kete, ido koany, anunuket naka eitabo naeporitoi.

²Katema ŋesi eoŋ atiar, “Inyo bo iany ijo?” Kaboŋok ebe, “Aany anunuket naka eitabo naeporitoi; aojauke ikubitin [1] akaisaarei, alalauke da ikubitin itomon.”

³ Kosodi ŋesi atemar eoŋ atiar, “Ŋin ŋes ekenit loelosi anatar akwap kere: naarai kwape ejaar owaike ediopet egelario ŋinituŋanan kere yenekokoi; ido kwape ejaar owaike ece egelario ŋinituŋanan kere yeniyapoi.

⁴ Ebala EJAKAIT loka ajoresio ebe, Etolosi eoŋ ŋes, elomari ŋesi togo loka ekokolan, togo da loka ŋin yeniyapoi aiŋal elimit ekakiror: iboienenei togoke, emudiari ŋes ka akitoke ka amoruke da.”

⁵Kosodi emalaika lokinera keoŋ alomar, katema ŋesi eoŋ atiar, “Kiteluo cani akonikonye, kite ibore ii yenelosi.”

⁶Kabala ebe, “Inyo bo ii?” Kotema atiar, “Ŋin ŋes epa [2] loelosi.” Ido kotema atiar, “Ŋin ŋes numam adolit kakwap kere.”

⁷Ido koany, aponi kikeunai arapetait naka asasit, ido kiboie aberu kotoma epa!

⁸Kobala ebe, “Na ŋes Aronis”; kocaka ŋes kotoma epa, kocaka alaŋiru naka asasit kaitukuke.

⁹Kasodi aiteluor akakonye, kete, ido koany, kolomut aŋor aarei. Kojai ekwam kabebenokakec; ajaas kes kabebenoka kwape abebenoka nuka etolut: kodakasi epa kidiŋ kakwap ka akuj.

¹⁰Kasodi eoŋ atemar emalaika lokinera keoŋ atiar, “Ai bo eyaŋaarete nu epa?”

¹¹ Katema ŋesi eoŋ atiar, “Adukokinia ŋes etogo kakwap naka Sinar: naitemokinor, ibwaikinete epa ŋol nen aiboisike.”