Read Ateso Sekaria 7 Bible Online

Sekaria 7 - Ateso bible

Sekaria 7

¹Kosodi kanen, kokaru lokiwoŋonet loka ekabaka Dario, kobu akirot naka EJAKAIT mama ejai Sekaria kapaaran nakiwoŋonet naka elap loki kanyerekaoŋon, ŋes Kisileb.

²Apotu luko Bet-el kiyakias Sareser ka Regemmelak, ka ikecetuŋa aimaimaun asianut naka EJAKAIT,

³ ka aiŋit da isasedotin luka etogo loka EJAKAIT loka ajoresio, ka inabin ebe, “Kebusakinit kereka eoŋ aimony ka ailuŋ kolap lokikanyet, kwape eswamaa ikar lu luipu?”

⁴Kosodi kobu akirot naka EJAKAIT loka ajoresio mama ajai ebe,

⁵ “Kolimok ituŋa kere luka akwap, ka isasedotin ebe, Naipotu koluniata ka aibworo kolap lokikanyet ka lokikanyetekaarei, ikar lu akaisakanykaarei, ipotu tope koluŋata mama ajai eoŋ, eoŋ ba?

⁶Nainyamiata, naimasiata da, mam kereka inyamete kanukus, komasete da kanukus?

⁷ Mam kereka kibusakinito akiirar akiro nukelimonokini EJAKAIT konabin lusek, nakejaatar ituŋa lukiboiete koYerusalem, kisirereŋitete da, ka ireria lukidunyas kaŋes, kejaas da ituŋa lukiboiete ari naka Eŋalakimak ka apuutona?”

⁸Kobu akirot naka EJAKAIT mama ejai Sekaria ebe,

⁹“Inera kwanata EJAKAIT loka ajoresio ebe, Kitodol etube lokabeit, kitodianak ŋinituŋanan onaceke aitim ka aisioni.

¹⁰Sirikiroik apuserut, karaida ikoki, karaida imoit, karaida lukican; kinyek idio kayesi aitetemonor aronis kotauke aluikin onaceke.”

¹¹Konye koŋeroto kesi apupun, kibelonokis ikeperin, kisikakis akiikec kinyeis apupun.

¹²Eebo, kituluos itauonokec bala eikep, kinyeis apupun ekisil, ka akiro nukijukunit EJAKAIT loka ajoresio komoyoke kama ka inabin lusek. Kanuka ŋun ŋes alomunia anyunyura naepol kama ejai EJAKAIT loka ajoresio.

¹³Ebala EJAKAIT loka ajoresio ebe, “Kosodi kanen, kwape amonyia eoŋ, koŋeroto kesi apupun; emonyete kesi da kwaŋin, eoŋ da aŋeri apupun.

¹⁴Konye esiarisiari kes ketapipirio mama ejaas atekerin kere numam apotu kojenete. Kosilior kwaŋin akwap akaulokec, komam ituŋanan etubor karaida aboŋun: naarai kitisilo akwap naajok.”