Read Ateso Matayo 18 Bible Online

Matayo 18 - Ateso bible

Matayo 18

¹ Kosawa kaŋol kopotu ikesisiak mama ejai Yesu, kotemasi atiar, “Aso iŋai bo erai lokapolon kotoma ajakanut naka akuj?”

²Konyarau ikoku kisibwo kokidiŋikec;

³ kotema atiar, “Abeit, katemari yes atiar, Arai mam ibelokinos koluoros bala idwe, mam ilomarete cut toma ajakanut naka akuj.

⁴Aso ŋinituŋanan yenitasonikin ilopet kwape kikoku kayen, ŋin ŋes erai yenikapolon kotoma ajakanut naka akuj.

⁵ “Ŋin da yenisukunyikini ikoku idiopet kwaka yen kokirorika, kesukunyik eoŋ;

⁶ konye ŋin yenitapaari idiopet ka ludidik kalu lukeyuunito eoŋ, ti ejok ŋes aenikinio akukuse omurisiŋike ka acakakin ataro nakaŋolol.

⁷“Itukwi akwap kanuka akiro nuitiguikinete! Naarai mam eswakete nuitiguikinete ajaut, konye itukwi ituŋanan ŋin yeneyauni akiro ŋun nuitiguikinete!

⁸ Arai kiidupo jo akonikan, arai akonikeju, kotubo kocaka; ejok jo alomar toma aijar iŋwalit arai icodo, itia acakakinio akim namam eduŋei, ijaas kakanin aarei arai akeje aarei.

⁹ Arai kiidupo jo akonikoŋu, kogoru kocaka; ejok jo alomar toma aijar idoponyony itia acakakinio oupa loka akim.

¹⁰ “Kocoito sirimwaŋito idiopet ka ludidik kalu; naarai katemari yes atiar, Toma akuj esesenenete ikecemalaikan akonyen nuka Papaka loejai toma akuj. [

¹¹ Naarai abu Okoku loka etuŋanan kobu aitajar yenikeoliorit.]

¹² Iwomito biai? Arai ejaas ituŋanan amerekekin akwatat, keolio adiopet, mam kereka inyeini akaisakanykaoŋon ka nukanykaonon, kolot oukon amoote ŋin nakeoliorit?

¹³Arai kedumu, abeit katemari yes atiar, Iyalamikini noi kanuka ŋin itia kwa akaisakanykaoŋon ka nukanykaonon numam aoliorito,

¹⁴Kwaŋin mam Papakus loejai toma akuj ekoto idiopet kaludidik kalu aolior.

¹⁵ “Arai kediak onacekon kamakon, kolot, kikwenya kadiakareteke, ijo ka ŋes bon: arai kiira, idum onacekon.

¹⁶ Konye arai mam kiirari, kouparos do ka ediopet arai iarei, tetere itogogoŋio ŋinikirot kaituke nuka ikajenak iarei arai iuni.

¹⁷ Arai kegir akiirar ŋul, kolimok ekanisa; arai kegir akiirar ekanisa da, korau ŋesi kamakon bala emoit ka eketeleman esolo.

¹⁸ Abeit katemari yes atiar, ŋin yenieni ijo kakwap eenio kotoma akuj, ŋin da yenilacari kakwap elacario kotoma akuj.

¹⁹ Bobo da katemari yes atiar, Arai kecamanaros iarei kayesi kakirot kere nailipete, iswamakini kes Papaka lokotoma akuj.

²⁰ Naarai neetukokinotor iarei arai iuni kokirorika, ajai eoŋ da nepenen kidiŋikec.”

²¹ Kosodi kobu Petero mama ejai Yesu, kotema ŋes atiar, “Ejakait, kediaka onaceka kamakaŋ, esioniei ŋes irwan imwaasi ai? Kiton irwan akanykaarei?”

²²Yesu kotema ŋes atiar, “Mam kalimokinit jo irwan akanykaarei, dimarai ebe akaisakanykaarei irwan akanykaarei.

²³“Kanuka ŋun ajakanut naka akuj eputosi bala ekabaka lokekoto aimar ikeboro kama kikebulesin.

²⁴Kegeu aimar, koinunai etuŋanan ediopet Iokiburao atalantan[1] alukumin atomon,

²⁵Kemamikis nutacet, kicorak ejakaitike ŋes agwelario, ka akeberu, ka ikedwe, ka luajaatar kere, kotacakinere apesen.

²⁶Kokukokin do ebulesit, kiŋaiŋa, kobala ebe, ‘Okwe Ejakait, kotitiŋikinoi, eoŋ da katacakini jo kere.’

²⁷Abu ejakait loka ebulesit kaŋol kitim ŋes, koosik, kisioni apesen.

²⁸Konye koloma ebulesit ŋol, kiriama ŋesi kediopet ebulesit aupake lokiburai adenarin[2] akwatat; kikam ŋes, komied, kobala ebe, ‘Kotacakinai akapesen.’

²⁹Kokukokin do ebulesit aupake kiŋaiŋa, kobala ebe, ‘Okwe, kotitiŋikinoi, eoŋ da katacakini jo kere.’

³⁰Konye koŋer, kolot kibwaik aidaris aitodol naetacakinia apesen.

³¹Kosodete nakeanyuniata ibulesin luce nukiswamas, kokadakis noi, koloto kitejenut ejakaitikec kere nukiswamas.

³²Kosodi konyarau ejakaitike ŋes kotema atiar, ‘Ebulesit ijo loirono! Abu kesioni jo apesen ŋin kere nakiŋaiŋaia;

³³ti mam kereka jo da ibusakinit aitim aupakon, kwape ketimio eoŋ jo?’

³⁴ Konyunyurikin ejakaitike, kijaik ikedarak, aitodol naetacakinia apesenike kere.

³⁵ Ikonakini nen Papaka lokotoma akuj ŋinidiopet kayesi, arai mam isioniete yesi ŋinituŋanan onaceke kotauonokus.”