Read Ateso Matayo 20 Bible Online

Matayo 20 - Ateso bible

Matayo 20

¹ “Naarai ajakanut naka akuj eputos ketuŋanan elopet etogo, lokelomuni tupuruc aiboleikin kikeswamak aswam toma amanake naka emusabibu.

²Kedau ŋesi acamanar ka ikeswamak ainakin adenari kanuka apaaran, kijuka kes amanake naka emusabibu.

³Kolom kwaka esawa lokiwuniet, koany ice ebwoete kagwelanaret ebolwaka.

⁴Kotema kes atiar, ‘Koloto yesi da toma amanaka naka emusabibu, karopete yes nuedolito.’ Koloto kesi.

⁵Kolom bobo kwape isawan ikanykape ka ikanykaoŋon da, kikon kwape kwaŋin.

⁶Kolom da kwaka isawan itomon kalodiopet, kodum ice ebwoete; kobala kes ebe, ‘Kanukinyo ibwoiata kane apaaran kere kobolwaka?’

⁷Kobalas ebe, ‘Naarai emamei ituŋanan yenikiboleikinit.’ Kotema atiar, ‘Koloto yesi da toma amanaka naka emusabibu.’

⁸ Napekitiboŋ, kotema ejakait loka amana naka emusabibu ekapolokitonike atiar, ‘Konyarau ikeswamak, korop eropitikec, agear ka lukokau kiton lukegeete.’

⁹Kepotu kwi luka isawan itomon kalodiopet, kodum ŋolituŋanan adenari.

¹⁰Kepotu lukegeete, koomitos ebe edumunete kesi iyatakina; kodumut kesi da ŋolituŋanan adenari.

¹¹Konye kedaut adumun, kirurumakis elopet etogo,

¹²kobalas ebe, ‘Ŋul lukokau eswamata esawa ediopet bon, itiirian ijo kes kasio lukitapasitoi apaaran kere kikanyi adedeŋ naka akoloŋ.’

¹³Konye Koboŋok ŋesi ediopet kakesi, kotema atiar, ‘Opapero, mam keswamakinit jo erono; mam kereka kiboleikinit ijo keoŋ adenari?

¹⁴Koyaŋa naerai nakon, kolot; akoto ainakin ŋol lokokau kwape kajo.

¹⁵ Mam kereka apedori aitwasam ikaboro kwape akotor? Arai bo erono akonikoŋu, naarai ajokuna eoŋ?’

¹⁶ Kwape kwaŋin lukokau eraunos Iusodit, ka lusodit da eraunos lukokau.”

¹⁷ Napedokari Yesu alosit Yerusalem, koyaŋa ikekesisiak itomon ka luarei aiyeiyea, kotema kes korot atiar,

¹⁸ “Koany, kidokari alosit Yerusalem; einakinio Okoku loka etuŋanan akanin nuka isasedotin lupeti ka ikewadikak, etubokinete ŋes atwanare;

¹⁹ijaikinete ŋes Imo aboliar, ka aida, ka aibubukin, apaaran nakiwuniet ejaruni.”

²⁰ Kosodi kobu toto naka odwe luka Sebedayo nepepe kodweke mama ejai Yesu, kokukokin kilip akirot,

²¹ Kotema atiar, “Ikoto inyo?” Kotema atiar, “Kicorak ebe kiboikinos odweka lu luarei, ediopet kakanikon nakoteten, ediopet da nakokediany, kotoma akonijakanut.”

²² Koboŋok Yesu ebe, “Mam ijenete nuilipete. Ipedorete kereka aimat akoli naamasi eoŋ?” Kotemasi atiar, “Kipedori,”

²³Kotema kes atiar, “Imasete bo akolika, konye aiboikin akanika nakoteten ka nakokediany, mere nakaŋ aikor, konye erai nakec kaŋul kaluitemokinit Papaka.”

²⁴ Kepuputu lutomon, konyunyurikis iinacan iarei.

²⁵ Konye Yesu konyarau kes, kotema atiar, “Ijenete ebe ikayaitok luka atekerin eyaito kes kagogoŋ, ejaas lukapolokokec kapedor mamakec.

²⁶ Konye mam ikote nen kamakus; konye ŋinituŋanan yenekoto araut yenikapolon kamakus korau ikusikejaanakinan,

²⁷ŋin da yenekoto araut yenisodit korau ikusibulesit;

²⁸ kwape mam ebunitor Okoku loka etuŋanan aijaanakinio dimarai aijaanakin, ka ainakin da akeijar alakunia ikepuak.”

²⁹ Nakeponiata koYeriko, kotupa ŋes ekodet loepol.

³⁰ Ido koany, kiboiete imudukiok iarei kariri kerot, nakiirariata kesi ebe itorit Yesu, kiworoto, kotemasi atiar, “Kitimoi, Ejakait, Okoku loka Daudi!”

³¹Kiretak ekodet kes tetere ililiŋete; konye kiyatakis aiworo kotemasi atiar, “Kitimoi, Ejakait, Okoku loka Daudi!”

³²Kobwou Yesu, konyarau kes, kobala ebe, “Ikotos keswamakis inyo?”

³³Kotemasi atiar, “Ejakait, kikoto kitwekeny akosikonye.”

³⁴Kitim Yesu kes, kotiro akecekonye, atipet kokwenyut, kotupasi ŋes.