Read Ateso Matayo 22 Bible Online

Matayo 22 - Ateso bible

Matayo 22

¹Koboŋok Yesu bobo, kiner kakes kawaragasia ebe,

² “Ajakanut naka akuj eputos bala ekabaka lokipoikini okokuke epucit loka eiterane.

³Kijuka ikebulesin anyaraun lukenyaritai aponare opucit; konye kogiroto kwi aponare.

⁴ Kijuka bobo ibulesin ice, kobala ebe, ‘Kolimokis kwi lukenyaritai ebe, Koany, etemonok ikanyamat, adau aiar ikamoŋin ka ikatak lurobok, adau aitemonokin kere; kopotu do opucit.’

⁵Konye kes mam apotu kopodos, koloto, ediopet omanikorike, ece agwelanarike,

⁶lukesalete da kikamut ikebulesin, kiswamakis nukepali, koarata.

⁷ Kosodi konyunyurikin ekabaka, kijuka akejore komudia ikaarak kwi, kicwe da erekec,

⁸Kosodi kotema ikebulesin atiar, ‘Itemokino epucit, konye lukenyaritai mam ibusakinito.

⁹ Aso koloto asisiarin nuka irotin, konyarautu ŋinituŋanan kere yenidumunete kobu opucit.’

¹⁰Konyoutu ibulesin ŋul koloto orotin, kotukonokis lukedumunete kere, lueroko ka luejok da; kilelebun etogo loka epucit ipejok.

¹¹Konye nakelomaria ekabaka aanyun ipejok, koany kanen etuŋanan lomam enapit anapito nakepucit.

¹²Kotema ŋes atiar, ‘Opapero, kilomuni ne biai komamei anapito nakepucit?’ Kobuta.

¹³ Kosodi kotema ekabaka ikejaanakinak atiar, ‘Koenata akanin ka akeje, koyaŋaasi kocakakis amuton nakokiŋa; kaŋina ejaun aimony ka airiamanakin ikel.’

¹⁴Naarai ipu luenyaritai, konye luseuna ikidioko.”

¹⁵ Kosodete koloto Iparisayon kinerut ailok ŋes kakiroke.

¹⁶ Kiyakikis ŋes ikesisiakakec, nepepe ka Ikerodian, kobalas ebe, “Ekesisianakinan, kijeni ebe irai ijo lokabeit, isisianakini da erot loka Edeke kotoma abeit, kwabo mam ipodo idiotuŋanan kere; naarai mam iseseni ejautene loka ituŋa.

¹⁷Aso kolimokinai iwomit biai? Ibus kereka ainakin Kaisar esolo, arai bo mam?”

¹⁸Konye Yesu kojen akeceronis, kotema atiar, “Yes lukesoswai, kanukinyo kikoduniata eoŋ?

¹⁹Kitodikinai cani apesa naka esolo.” Koinunai adenari.

²⁰Kotema Yesu kes atiar, “Nakaŋai aput na, ka nuiwadikatai?”

²¹ Kotemasi atiar, “Nuka Kaisar.” Kosodi kotema kes atiar, “Aso kotacakis Kaisar nueraas nuka Kaisar, ka Edeke da nueraas nuka Edeke.”

²² Kepuputu kesi koumokis; kinyeis ŋes koloto.

²³ Kapaaran kaŋin kopotu Isadukayon mamakeŋ, luebalas ebe emamei ajarun; kiŋita ŋes,

²⁴ kobalas ebe, “Ekesisianakinan, abu Musa kobala ebe, ‘Arai ketwana etuŋanan, komameete idwe, emanyi onaceke akeberu, tetere edumakini onaceke aur.’

²⁵Aso, kejaas iinacan ikanykaarei kamakosi; komany losodit, kotwana, ido naarai emamei ŋes aur kinyeinia onaceke akeberu;

²⁶kwape kwaŋin lokiareit, ka lokiwuniet, aitodol kere ikanykaarei.

²⁷Akaulo kakere, kotwana aberu ŋin da.

²⁸Aso, kotoma ajarun, eraun ŋin aberu naka ŋai kakwi kalukanykaarei? Naarai kere apotu kojaas kaŋes.”

²⁹Koboŋok Yesu kotema atiar, “Ipaarete yesi, naarai mam ijenete nuiwadikatai karaida apedor naka Edeke.

³⁰Naarai kotoma ajarun mam emanyete karaida adukokinio, konye eraas bala imalaikan kotoma akuj.

³¹Bobo da kakiro nuka ajarun kokatwak, mam isiomito akirot nakinerit Edeke ebe,

³² ‘Arai eoŋ Edeke loka Aburaam, Edeke loka Isaak, ka Edeke loka Yakob da’? Mam ŋes erai Edeke loka lukatwak, konye loka lukajarak.”

³³Nakiirariata ikodeta, koumokis akeisisianakin.

³⁴ Kosodete kiirasi Iparisayon ebe etubuta Isadukayon, kotukokinos.

³⁵ Ediopet kakes, ericakisila, kiŋit ŋes aiŋiset naekoduni,

³⁶ebe, “Ekesisianakinan, aicorakinet ani erai nakapolon kotoma okisila?”

³⁷ Kotema ŋes atiar, “Komina Ejakait Ekonideke kekonitau kere, ka akoniijar kere, ka akonicoa da kere.

³⁸Na ŋes aicorakinet nakapolon nasodit.

³⁹ Ejai da nakiareit naeputotor ebe, Komina ikoniidunyet kwape iminar bon.

⁴⁰ Kotoma aicorakineta nu aarei kes icatunitotor ikisila kere ka inabin da.”

⁴¹ Ketukokinos Iparisayon, kiŋit Yesu kes ebe,

⁴² “Anyoika nuiwomito kanuka Kristo? Erai Okoku kaŋai?” Kotemasi ŋes atiar, “Loka Daudi.”

⁴³Kiŋit kes ebe, “Aso kikwaikini ai Daudi enyarit ŋes Ejakait, koMoyo ebe,

⁴⁴ ‘Abu Ejakait kotema Ekajakait ebe, Kiboikin akanika nakoteten, Aitodol neebwaikinia lukasurupokon kwap kakejekon’?

⁴⁵Aso arai enyarit Daudi ŋes Ejakait, kikonakini bo ai erai ikekoku.”

⁴⁶Mam apedorit ituŋanan aboŋokin ŋes akirot, ido ameun kapaaran kaŋin amamei bobo yeniketitiŋikinit aiŋit ŋes adiokirot.