Read Ateso Matayo 24 Bible Online

Matayo 24 - Ateso bible

Matayo 24

¹ Kolom Yesu koyekalu, ido napelosi, kopotu ikekesisiak mama ejai, kitodikis aduketa nuka eyekalu.

² Konye Koboŋok kes kotema atiar, “Ianyut kereka nu kere? Abeit katemari yes atiar, mam esalakini ne amoru kuju kamoru, namam etiyakinio.”

³Nakiboio koMoru loka Iseitunin, kopotu ikesisiak mama ejai kaiyeiyea, kobalas ebe, “Kolimokinai, ejaunete akiro ŋun wori, anyoin da aanyunet naka abunorekon, ka naka esaŋe loka akwapin?”

⁴Koboŋok Yesu kotema kes atiar, “Kocoito kinyek ituŋanan aitapaar yes.

⁵ Naarai epote rwaru luipu kokirorika, ebalas ebe, ‘Eoŋ arai Kristo,’ itapaarete kesi luipu.

⁶ Iirarete yesi nuka ijiisio ka iemuto luka ijiisio; kocoito sirikiyaloŋoŋoto; naarai ibusakinit ŋun ajaun, konye koroko awasia edoluno.

⁷ Naarai enyoikini ateker asurokin ateker, ajakanut da asurokin ajakanut, ejaunun ebel ka amaran naka akwap aiboisio nuegelegela;

⁸eraas ŋun kere ageunet naka ariebo naka aidoun.

⁹ “Kapak kaŋin kijaikinete yes aiticanio, kiarete; kiŋarunete yes atekerin kanuka ekakiror.

¹⁰ Kosodete iguikinete luipu, kes da ebilanakinos ibotei, ka aŋaranar.

¹¹ Enyounete inabin luipu lukeŋalak, itapaarete luipu.

¹² Ido naarai iyatakina epali, ejoniari amin naka luipu.

¹³ Konye ŋin yenetitiŋikini kiton awasia, ŋes itajario.

¹⁴ Elimonokinio Akiro nu Nukajokak nuka ajakanut anatar akwapin kere, araut akajenak mama ejaas atekerin kere; kosodi konyet edoluni awasia.

¹⁵ “Aso naianyuniata etal loemudiari lokinerit enabi Daniel ebwoi kotoma aibois nakalaunan (kojenu ikasoman),

¹⁶ŋes konyet ekeriata ŋul luejaas Yudaya oroŋan;

¹⁷ ituŋanan yenejai kuju togo sirikedoku ayaŋaar iboro luejaas togoke;

¹⁸ido yenejai mana da sirikeboŋu kau ayaŋaar akenapito.

¹⁹Konye itukwi kes nuepotiete, ka nuitanakete da kapaarasia kaŋun!

²⁰ Kilipata yesi kinyek akusikerit adolun kiporo, karaida apaaran naka asabato:

²¹ naarai ejaunos ican luipu, lumam peŋo etakanunito ameun kageunet naka akwap kiton kwana, ido mam bobo ejaunete cut.

²²Arai kedim iŋoŋaritai apaarasia ŋun, timam kitajari akuan kere; konye kanuka luseuna iŋoŋario apaarasia ŋun.

²³Kapak kaŋin arai kitemari yes ituŋanan atiar, ‘Koany, ejai Kristo ne,’ arai, ‘Ejai laije’, sirikiyuut.

²⁴ Naarai enyounete lukriston lukeŋalak, ka inabin lukeŋalak, itoduunete ŋul aanyuneta nuepolok, ka nukaumokin da; tetere itapaarete luseuna arai epedoros.

²⁵Koany, kadau aikwenyar yes eroko nu epona.

²⁶ Aso arai kitemarete yes atiar, ‘Koany, ejai amodiŋ’; sirikiloto. Ebe da, ‘Koany, ejai toma agola’ sirikiyuut.

²⁷Naarai kwape imiliaunia ageun kokide kotakani kiton to; ikoni nen abunore naka Okoku loka etuŋanan.

²⁸ Naarai neejai akuan nakatwan, etukonokinos da atarukon nen.

²⁹ “Konye atipet, ketuboros ican luka apaarasia kakwa, itumutonorio akoloŋ, mam elap ecauni, ibirununos aacer kotoma akuj, iianiianio da nukapedor nuka akuj;

³⁰ kosodi konyet etakanuni aanyunet naka Okoku loka etuŋanan kokuju; kosodete konyet ibworos atekerin kere nuka akwap, eanyunete Okoku loka etuŋanan ebuni kodouon luka akuj kapedor ka aibuses naepol.

³¹ Ijukuni ikemalaikan keporoto loepol loka arupepe, etukonokinete luseunake anyoun kokwamin iwoŋon, ameun kosaŋe ediopet loka akuj kiton loce.

³²“Kisisiautu akewaragan kama ejai etini; kedaut aketenieik alibun, itolomuni akekui, ijenunete ebe eapie apak naka aidweny;

³³aso yes da naianyuniata ŋun kere, kojenut ebe eapie ŋesi, kokek,

³⁴Abeit katemari yes atiar, mam atur na edaun aitodol naedolioto akiro ŋun kere.

³⁵ Edaunos akuj ka akwapin, konye akakiro mam edaunos cut.

³⁶ “Konye akiro nuka apaaran kaya ka esawa da emamei yenejeni, karaida imalaikan luejaas toma akuj, karaida Okoku, dimikito Papa bon.

³⁷ Naarai kwape kejaatar apaarasia nuka Noa, ikonakini nen abunore naka Okoku loka etuŋanan.

³⁸ Naarai kwape kejaatar toma apaarasia nukegeikinete akalele, anyamete, amasete, amanyasi, amanyio da, kiton apaaran nakelomaria Noa toma ataker,

³⁹ komam kejenete kiton neadolunio akalele kolelea kere, ikonakini nen abunore naka Okoku loka etuŋanan.

⁴⁰ Kapak kaŋin ejaikinos ituŋa iarei omanikor; eyaŋaario ediopet, inyeinio loce.

⁴¹Ejaikinos aŋor aarei iriete; eyaŋaario adiopet, inyeinio nace.

⁴² Aso kokwenyete; naarai mam ijenete apaaran anyoin naebunio Ejakait ikus.

⁴³ Konye kojenutu na ebe, arai kejeni elopet etogo apak naka akuare naebunio ekokolan, tikekweny, kwabo timam kejalaki eketogo abokio.

⁴⁴ Kanuka ŋun kokapakina yesi da; naarai ebuni Okoku loka etuŋanan kosawa lomam iwomito.

⁴⁵“Aso iŋai bo ebulesit lomunot loepiriana da, lokedakakini ejakaitike ayait lukokaleke akoranakin kes ikecenyamat apakio nuedolito?

⁴⁶Isirereŋitoi ebulesit ŋol loedumuni ejakaitike iswamai kwaŋin naebunio.

⁴⁷ Abeit katemari yes atiar, Edakakini ŋes ayait luejaatar kere.

⁴⁸ Konye arai ketema ebulesit ŋol lokaronon kotauke atiar, ‘Eyapa papaka,’

⁴⁹kogeu aibuŋa ibulesin lukaupake, ainyam ka aimat nepepe kalukamerak,

⁵⁰ebuni ejakait loka ebulesit kaŋol kapaaran namam ŋes eomit, ka esawa da lomam ejeni,

⁵¹ etubi ŋes katutubeta aarei, itebei ekewai nepepe ka lukesoswai; ejaun kanen aimony ka airiamanakin ikel.