Read Ateso Matayo 26 Bible Online

Matayo 26 - Ateso bible

Matayo 26

¹ Nakedaunia Yesu akiro ŋun kere, kotema ikekesisiak atiar,

² “Ijenete ebe esalito apaarasia aarei, kosodi ejaun Aleleŋ, ijaikinio Okoku loka etuŋanan aibubukinio.”

³Kosodete kotukonokinos isasedotin lupeti ka imakio luka ituŋa toma alaro naka esasedoti lopeti, ekekiror Kaiapa,

⁴kinerut nepepe tetere ikamunete Yesu kapirianut kosodete aiar.

⁵Konye kobalas ebe, “Mere toma apak naka epucit, kinyek ecelet ajaun kotuŋa.”

⁶ Nakejaar Yesu Betania togo loka Simon lokatapon,

⁷ kobu aberu mamakeŋ nakejai ekube loka akinyet naketiai loepol noi, kobukok akouke, iboie enyami,

⁸Konye nakeanyuniata ikekesisiak, konyunyuras kobalas ebe, “Anyoin aimadiŋ na?

⁹Naarai tikegwelar akinyet na apesan nuipu, akoranakin lukican.”

¹⁰ Konye kojenu Yesu, kotema kes atiar, “Kanukinyo itiyaloŋoŋooto aberu na? Naarai keswamaki eoŋ aswam naejok.

¹¹ Naarai apaarasia kere ejaas lukican nepepe kayes, konye eoŋ mam kija kayes apaarasia kere.

¹²Naarai kanu abukokinia akuanaka akinyet ŋin, eswama kwaŋin tetere itemokini eoŋ aidaio.

¹³Abeit katemari yes atiar, Neelimonokinio Akiro nu Nukajokak kotoma akwapin kere, ŋin naeswama aberu na elimorio akiitunitor ŋes.”

¹⁴ Kapak kaŋin kolot ediopet kalutomon kaarei, ekekiror Yuda Isikariot, mama ejaas isasedotin lupeti,

¹⁵ kotema kes atiar, “Kiinakinete eoŋ inyo arai kejaik ŋes mamakus?” Kotacakis ŋes atutubeta akaisauni nuka epuesa.

¹⁶ Ameun kapak kaŋin komoote apak naejok aijaikinia ŋes.

¹⁷ Kapaaran nasodit naka imugatin lumam itubuunitoi, kopotu ikesisiak mama ejai Yesu, kotemasi atiar, “Ikoto ketemokis lali konyamak lukaleleŋ?”

¹⁸ Kotema atiar, “Kolot ore mama ejai mutan, kolimokis ŋes ebe, ‘Ebala Ekesisianakinan ebe, aapu akapak; etodolikini Aleleŋ orekon nepepe kikakesisiak.’ ”

¹⁹Kiswamata ikesisiak kwape kicorakinia Yesu, kitemokis lukaleleŋ.

²⁰ Nakimukoki akwap, kiboikin ainyam nepepe kikesisiak lutomon kaarei;

²¹napenyamete, kotema atiar, “Abeit katemari yes atiar, ediopet kayes kabilakini eoŋ ebotet.”

²²Kitururwoto noi, kogeut aiŋitanar ŋes ediopet ediopet ebe, “Ŋes ca nat eoŋ ya, Ejakait?”

²³ Koboŋok ebe, “Ŋol lokicunyi keoŋ atibo, ŋes kabilakini ebotet.

²⁴Elosi Okoku loka etuŋanan kwape kiwadikatere kanukeŋ, konye itukwi etuŋanan ŋol loebilakini Okoku loka etuŋanan ebotet! Tiejok kama ketuŋanan kaŋol arai mam kewuruunitai.”

²⁵Koboŋok Yuda lokebilakinit ŋes ebotet kotema atiar, “Ŋes ca nat eoŋ ya, Rabi?” Kotema atiar, “Ijo ibala.”

²⁶ Napenyamete, kolem Yesu emugati, kisirereŋ, kobilibil, koinak ikesisiak, kobala ebe, “Kolemutu, konyamata; lo ŋes akakuan.”

²⁷Kolem akoli da, kedau aimal, koinak kes, kobala ebe, “Komata yesi kere lo:

²⁸ naarai nu kes akaokot nuka aitutuket, nuebukoros kanuka ikepuak alemar aronisio,

²⁹Katemari yes atiar, Mam amasi bobo cut nuka araito na naka emusabibu kiton apaaran ya naamasia nukitetiak nepepe kayes kotoma ajakanut naka Papaka.”

³⁰ Nakedauniata ayoore ekosio, kolomasi koloto Moru loka Iseitunin.

³¹ Kosodi Yesu kotema kes atiar, “Iguikinos yesi kere kakuar kana kanukaŋ; naarai iwadikatai ebe, ‘Ebuŋai rwaru ekecokon, isiarakinos amerekekin nukosipan.’

³² Konye kadau ajarun, keŋarenikinete yes alosit Galilaya.”

³³Koboŋok Petero kotema ŋes atiar, “Karaida kiguikinos kere kanukon, konye eoŋ mam keguikini cut.”

³⁴ Kotema Yesu ŋes atiar, “Abeit katemari jo atiar, akuar na, eriŋa ekokoro keruikino, kiŋeri eoŋ irwan auni.”

³⁵ Kotema Petero atiar, “Karaida kebusakinit atwanare kajo, mam kaŋeri jo cut.” Kinerata ikesisiak kere da kwape kwaŋin.

³⁶ Kosodi kodolok Yesu nepepe kakes aibois naenyaritai Getesemane, kotema ikekesisiak atiar, “Kiboikinos ber ne, kekunya ŋina ailip.”

³⁷ Koyaŋa Petero ka odwe iarei luka Sebedayo, kogeu aiturur ka aburun.

³⁸ Kosodi kotema kes atiar, “Itururwei ekatau noi, aapiar atwanare; kosalata yesi ne, kokwenya nepepe keoŋ.”

³⁹ Kikunyak nediokasilon, kibiror ebuburia, kilip ebe, “Wu Papaka, arai epedoros, kenac akoli na; konye mere nuakoto eoŋ, dimarai kwape ikotor ijo.”

⁴⁰Kobu mama ejaas ikesisiak, kodum kes ejotoete; kotema ŋesi Petero atiar, “Aso ca mam ipedorete aikweny nepepe keoŋ esawa ediopet?

⁴¹ Kokwenya, kilipa kinyeis alomar toma acodunio; ekoto bo emoyo, konye ekalanyana akuan.”

⁴²Koboŋo bobo nakiareit kilip ebe, “Papaka, arai mam epedori akoli na ainac komam eoŋ amasi, kiswamai do nuikoto ijo.”

⁴³Kobu bobo kodum kes ejotoete, naarai eluranaros ajo.

⁴⁴ Kinye kes bobo, kolot kilip nakiwuniet, inera bobo akiro kwapekwa.

⁴⁵Kosodi kobu mama ejaas ikesisiak, kotema kes atiar, “Iroko kereka ijotoete, iyeŋito? Koany aapu esawa, einakinio Okoku loka etuŋanan akanin nuka ikadiakanarak.

⁴⁶ Konyoutu, kaloto; koany, eapie lokabilaki ebotet.”

⁴⁷ Napinera ŋesi kobu Yuda, ediopet kotomon kaluarei, koupas kekodet loepol lokejaas ikileŋa, ka ibelai, epote kama ejaas isasedotin lupeti ka imakio luka ituŋa,

⁴⁸Koinakinite lokebilakini ŋes ebotet kes aanyunet ebe, “Loanui eoŋ ŋes ŋol; kikamutu ŋes.”

⁴⁹Atipet kolot mama ejai Yesu, kotema atiar, “Yoga, Rabi!” Konu noi,

⁵⁰Kotema Yesu ŋes atiar, “Opapero, kiswama nukiyaunito.” Kosodete kikunyakis koriosi akecekanin kikamut Yesu,

⁵¹Ido koany, ediopet kaŋul kalukejaas kaYesu korio akekan, kout ekekileŋ, kinom ebulesit loka losasedoti lopeti, kojepa akekit.

⁵² Kosodi Yesu kotema ŋes atiar, “Kinyakak ekileŋikon aiboisike; naarai kere luekapito ikileŋa, emudiari ekileŋ.

⁵³ Arai iwomitos ebe mam apedori aiŋaiŋa Papaka, kejukak kwape kwana irioŋeta luedeparito itomon ka luarei luka imalaikan?

⁵⁴Aso edolete biai nukiwadikatai ebe ibusakinit ŋun ajaun?”

⁵⁵ Kosawa kaŋol kotema Yesu ikodeta atiar, “Ilomutu teni yesi kikileŋa ka ibelai aikamun eoŋ, bala ekaŋatan? Ŋinipaaran eboonokin kotoma oyekalu esisianakini, komam kikamunete eoŋ.

⁵⁶ Konye ajaut nu kere tetere edolete nukiwadikato inabin.” Kosodete kojalakis ŋes ikesisiak kere, kokerata.

⁵⁷ Lukikamunete Yesu koyaŋaasi mama ejai Kaiapa losasedoti lopeti, neketukonokina ikewadikak ka imakio.

⁵⁸Kotupa Petero kama elwana, kiton alaro naka losasedoti lopeti, koloma toma, kiboikin nepepe ka ikedarak aanyun nuebeikinete.

⁵⁹Aso komoata isasedotin lupeti ka aurianet kere ikajenak lukeŋalak aluikin Yesu tetere earete,

⁶⁰mam edumuna, karaida ketakanut ikajenak luipu lukeŋalak, Konye kokau kotakanut iarei,

⁶¹ kobalas ebe, “Abala ŋol ebe, apedori aiket eyekalu loka Edeke, ka adukokin apaarasia auni.”

⁶²Kosodi kobwo losasedoti lopeti kotema atiar, “Mam ca bo iboŋokini akirot? Anyoika ŋun nuetejenut ŋul aluikin jo?”

⁶³ Konye kililiŋ Yesu. Kotema losasedoti lopeti ŋes atiar, “Kesiyapoi jo mama ejai Edeke lokajaran, kolimokinai cani sio arai irai ijo Kristo, Okoku loka Edeke.”

⁶⁴ Kotema Yesu ŋes atiar, “Ijo ibala, Konye katemari yes atiar, Amear kwana ianyunete Okoku loka etuŋanan iboie kakan nakoteten naka Apedor, ebuni kotoma odouon luka akuj.”

⁶⁵ Kosodi kocil losasedoti lopeti ikenapen, kobala ebe, “Ainyanaki, Anyoika bobo kipudar ikajenak? Koany, iirasi kwana akeinyanakin.

⁶⁶ Iwomitos anu?” Koboŋokis ebe, “Ibusakinit atwanare.”

⁶⁷ Kosodete kimwaanakis aimul akonyeneke, kodipidipoto ŋes; ice da kibapanasi,

⁶⁸kobalas ebe, “Ijo Kristo, kodwarak iŋai! Iŋai bo kibuŋa?”

⁶⁹Kiboie Petero kokiŋa kotoma alaro: kobu apese mama ejai kobala ebe, “Ijai nan ijo da nepepe kaYesu Egalilayat.”

⁷⁰Konye koŋer kakonyen nuka ituŋa kere, kobala ebe, “Mam ajeni nuinera ijo.”

⁷¹Konye nakelomunia okek, koany acepese ŋes, kotema ŋesi lukejaas nen atiar, “Ajai lo da nepepe ka Yesu Enasarayot.”

⁷²Koŋer bobo kaiyapo ebe, “Mam ajeni etuŋanan ŋol.”

⁷³Nediokasilon kopotu lukebwoete kanen, kotemasi Petero atiar, “Abeit irai ijo lokec, naarai itejenunit ekoniiner.”

⁷⁴Kosodi kogeu eilam ka aiyapo ebe, “Mam eoŋ ajeni etuŋanan ŋol.” Atipet koruik ekokor.

⁷⁵ Kiitu Petero akirot nakelimokini Yesu ŋes ebe, “Eriŋa ekokor keruikino, kiŋeri eoŋ irwan auni.” Koloma kiŋa komonyi noi akiyo.