Read Ateso Matayo 28 Bible Online

Matayo 28 - Ateso bible

Matayo 28

¹ Akaulo kasabato, napecila kide kapaaran nasodit nakasabato, koloto Mariam Magadalene ka Mariam ace aanyun ates.

²Ido koany, kejai amaran naka akwap; naarai kodok emalaika loka Ejakait kokuju, kobu kikokoro amoru awai, kiboikin kujuke.

³ Kotakanu bala eimilia, ikenapen da kiliacanito kiac.

⁴Komaranata ikedarak kanuka akurianar ŋes, kosubata bala lukatwak,

⁵Koboŋok emalaika kotema aŋor atiar, “Sirikikuriakaros yesi; naarai ajeni ebe imootos Yesu lokibubukinitoi.

⁶ Emamei kane; naarai ajaru, kwape eneritor. Kopotu koanyut aibois naeperikinitoi.

⁷ Koloto yesi da atipet, kolimokis ikekesisiak ebe, ‘Ajaru kotoma okatwak’; ido koany, kiŋarenikini yes alosit Galilaya; ianyikinete ŋes ŋina; koany kadau alimokin yes.”

⁸Konyout atipet kates kakurian ka aiyalama naepol, kokerata alimokin ikekesisiak.

⁹Ido koany, kiriamakin Yesu kakes, kobala ebe, “Yoga!” Kikunyakis kitiŋata akekejen komaata ŋes.

¹⁰ Kosodi Yesu kotema kes ariar, “Sirikikuriakaros; koloto kolimokis ikainacan koloto Galilaya, ŋina kaanyikinete.”

¹¹Napelosete, koany, kolomasi ice kokedarak ore, kolimokis isasedotin lupeti akiro nukedoikinete,

¹²Kotukokinos nepepe kimakio kinerut, koinakis iserikalei arupiyan nuipu,

¹³ kobalas ebe, “Kinerata yesi ebe, ‘Apotu ikekesisiak kopotu kuare, kokokwasi ŋes kijotoi isio.’

¹⁴Arai kiirar akirot na kama ekayaiton, kimaimai isio ŋes, kinyeis yes aiticanio.”

¹⁵Kolemasi arupiyan kiswamata kwape kisisianakinitere; kisiarakin akirot na toma oYudayan kiton lolo.

¹⁶ Konye kolot ikesisiak itomon ka lodiopet Galilaya, oroŋat lokicorakinit kes Yesu,

¹⁷Nakeanyuniata ŋes, komaata; konye kobuonokinos ice kakesi.

¹⁸ Kobu Yesu neejaas kinera kakes, kotema atiar, “Kainakin eoŋ apedor kere kokuju kakwapin da.

¹⁹ Aso kolot kituluosi lukatekerin kere ikesisiak, kibatisaete kes kokiror loka Papa, ka loka Okoku, ka loka Emoyo Lokalaunan;

²⁰ kisisianakinete kes aricit akiro kere nukecorakinit yes; ido koany, ajai eoŋ nenipe kayes apaarasia kere, kiton awasia naka ikar kere,”