Read Ateso Matayo 4 Bible Online

Matayo 4 - Ateso bible

Matayo 4

¹ Kosodi Emoyo kitodoka Yesu amodiŋ tetere Satan ecoduni ŋes.

² Koluŋ apaarasia akaisaoŋon apaaran ka akuare, kosodi konyet korieb eteŋei.

³ Kobu ekacodan, kotema ŋes atiar, “Arai tope irai ijo Okoku loka Edeke, kicorak amor nu koraunos atap.”

⁴ Konye Koboŋok ebe, “Iwadikatai ebe, Mam ituŋanan ejari kanuka atap bon, nabarai kanuka ŋinikirot naelomuni kaituk naka Edeke.”

⁵ Kosodi Satan ayaŋaar ŋes ore lokalaunan; kisibwo koswi loka eyekalu,

⁶ kolimok ebe, “Arai tope irai ijo Okoku loka Edeke, kosomari kwap: naarai iwadikatai ebe, Einakini ikemalaikan aidar jo, Kidakete jo kakaninikec, Kinyek amoru aiguikin akonikeju.”

⁷ Kotema Yesu atiar, “Iwadikatai bobo ebe, Sirikodununei Ejakait Ekonideke.”

⁸Koyaŋa bobo Satan ŋes oroŋat loicelelei noi, kitodianak ajakanuto kere nuka akwap, ka aibusesukec;

⁹kotema ŋes atiar, “Kainakini ŋun kere, arai kibiror aima eoŋ.”

¹⁰ Kosodi kotema Yesu atiar, “Irwa, Satan; naarai iwadikatai ebe, Komaenenei Ejakait Ekonideke, Kijaanakinenei ŋes bon.”

¹¹ Kosodi kinye Satan ŋes; ido koany, kopotu imalaikan kijaanakis ŋes.

¹² Nakepupunio ŋes ebe ekamar Yokana, kolot Galilaya;

¹³ konyou koNasaret, kobu kiboikin Kaparanaum, loidunyas aŋolol, koikorun luka Sebulun ka Naputali,

¹⁴ tetere itodolikinio akirot naenerit Isaia enabi ebe,

¹⁵“Akwap naka Sebulun, ka akwap naka Naputali, Abear aŋolol, kokekwa Yorodan, Galilaya naka Imo.

¹⁶Ituŋa lueboiete kamuton, Aanyut aica naepol, ŋul da lueboiete kakwap ka etoribe loka atwanare, Eliyaiki aica.”

¹⁷ Agear kapak kaŋin kogeu Yesu alimonokin, ebala ebe, “Kitoronikinos; naarai aapu ajakanut naka akuj.”

¹⁸ Nakitoritor ariri kaŋolol naka Galilaya, koany iinacan iarei, Simon loenyaritai Petero, ka Anderea onaceke, ecakakinete eboi aŋolol; naarai keraas ikalokak.

¹⁹ Kotema kes atiar, “Kotupunai, eoŋ da ketaraun yes ikalokak ituŋa.”

²⁰ Atipet kinyeis iboyanakec, kotupasi ŋes.

²¹Kikunyak kiŋaren koany iinacan ice iarei, Yakob okoku loka Sebedayo, ka Yokana onaceke, lukejaas ataker nepepe ka Sebedayo papakec, erucete iboyanakec; konyarau kes.

²²Atipet kinyeis ataker ka papakec, kotupasi ŋes.

²³ Kimanimani Yesu Galilaya kere, kisisianakini kotoma atukosiakec, kolimonokini da akiro nukajokak nuka ajakanut, kitaŋaleununei ŋinidek, ka akalanyanut kere kotoma otuŋa.

²⁴ Kikaikin ekeemut Suria kere: koinunai ituŋa kere lukedekas, lukikamunito iponesio luegelegela luka adekesia, ka ariebo, lukajokina, ka lukipumu, ka lukasenyak da; kitaŋaleu kes.

²⁵ Kotupasi ŋes ikodeta luipu lukepote koGalilaya ka Dekapoli, ka Yerusalem, ka Yudaya, ka okekwa Yorodan da.