Read Ateso Matayo 5 Bible Online

Matayo 5 - Ateso bible

Matayo 5

¹ Kosodi nakeanyunia ikodeta, kodoka oroŋat: kiboikin, kopotu ikekesisiak mamakeŋ.

²Kooŋ akeituk, kisisianak kes, kobala ebe:

³ “Isirereŋitoi lukican komoyo; naarai ajakanut naka akuj erai nakec.

⁴ “Isirereŋitoi luitururuete: naarai italakario.

⁵ “Isirereŋitoi luitasonos: naarai irumete akwapin.

⁶ “Isirereŋitoi lueriebi eteŋei ka luejakit akur kanuka adolit: naarai isimonikinio.

⁷ “Isirereŋitoi luketimok: naarai itimio.

⁸ “Isirereŋitoi luesegara itauon: naarai eanyunete Edeke.

⁹ “Isirereŋitoi ikesinapikinak: naarai enyarao idwe luka Edeke.

¹⁰ “Isirereŋitoi luimanitai kanuka adolit: naarai ajakanut naka akuj erai nakec.

¹¹ “Isirereŋitoi yes nakimuaritotor, nakimanitotor, ka einer nukaronok nuipu nuka aiŋal asurokin yes, kanukaŋ.

¹² Kiyalamikinos, kolakaros noi: naarai epol ekusiropit kotoma akuj: naarai kimana kolo kwaŋin inabin lukigeikinete yes.

¹³ “Iraas yesi abalaŋ naka akwap; konye arai kepianiar abalaŋ, itemokinio kinyo? Mam bobo ejai ajokis, dimarai ebukorio kiŋa kicakacakata ituŋa.

¹⁴ “Iraas yesi aica naka akwap. Mam epedori ere aibwaio arai ejai kuju moru.

¹⁵ Ido mam ituŋa inokokinete atala, ka abuburikin ebukit, dimarai ikajakinete ocoget, ecaikini kere luejaas togo.

¹⁶ Kwaŋin kocau akusiica kakonyen nuka ituŋa, tetere eanyunete akusiswamisio nuejokuka, kitopoloosi Papakus loejai toma akuj.

¹⁷ “Siriwomito ebe abunit amudiar ikisila karaida inabin: mam abunit amudiar, dimarai aitodolikin.

¹⁸ Naarai abeit katemari yes atiar, Aitodol naedaunotor akuj ka akwap, mam cut edaun inyukuta idiopet, karaida aitakinet adiopet naka ikisila, aitodol neitodolikinere kere.

¹⁹ Aso ituŋanan kere yenepaluni aicorakinet adiopet kotoma kaŋun kanueraas nudidik, ka aisisianakin ituŋa kwaŋin, enyarao yenididi cut kotoma ajakanut naka akuj: konye ŋin kere yeniswamai ka aisisianakin kes, enyarao ŋin ikapolon kotoma ajakanut naka akuj.

²⁰Naarai katemari yes atiar, arai mam akusidolit itelekarit adolit naka ikewadikak ka Iparisayon, mam cut ilomunete toma ajakanut naka akuj.

²¹ “Ipotu kiirasi kelimokinitai ituŋa lukolo sek ebe, Siriari; ido ituŋanan yeneari ibusakinit atubokinio.

²² Konye eoŋ katemari yes atiar, Ŋinituŋanan yenenyunyurikini onaceke ibusakinit atubokinio; ka ŋin da yenemoromoroi onaceke ibusakinit airabis; ŋin da yenetemari atiar, Ibaŋaanal Ibusakinit eupa loidopit.

²³ Aso arai iyauni ainakinetekon otem, kosodi kiitu kanen ebe ejaas onacekon akiro kajo,

²⁴kinyek ainakinetekon kotem, kolot ber; kopuco konacekon, kosodi konyet aboŋun ainakin ainakinetekon.

²⁵ Kocamanaros atipet kalokiwosat jo, apak naijaatatar kaŋes orot; kinyek je lokiwosat ayaŋaar jo mama ejai ekatubon, ekatubon da ayaŋaar jo mama ejai eserikalet, ijo da kiremokinio aidaris.

²⁶Abeit katemari jo atiar, Mam cut inyouni kanen, aitodol neitacia ikapu yenikawasia.

²⁷ “Ipotu kiirasi kelimokinitai ebe, Siridote.

²⁸ Konye eoŋ katemari yes atiar, Ŋolituŋanan loeseseni aberu kaiŋobel, etielo ŋes kotauke.

²⁹ Arai kiduporit akonikoŋu nakoteten, kogoru, kocaka: naarai ibus koolio idiopet katutubetakon, kinye akonikuan kere acakario toma oupa.

³⁰ Arai kiduporit akonikan nakoteten, kojepa, kocaka; naarai ibus koolio idiopet katutubetakon, kinye akonikuan kere alosit toma oupa.

³¹ “Kelimokinitai da ebe, ŋolituŋanan loireŋeari akeberu, koinak ŋin ebalua loka aitwar:

³² konye eoŋ katemari yes atiar, ŋolituŋanan loireŋeari akeberu, dimarai kanuka adotear, esidotea ŋin: ŋol da loemanyi ya naereŋearitai, adotear.

³³ “Bobo da, ipotu kiirasi kelimokinitai ituŋa lukolo sek ebe, Siriyapoi nukaiŋal, konye kitodolik Ejakait akoniiyaposio.

³⁴ Konye eoŋ katemari yes atiar, Siriyapoi cut; karaida alimit akuj, naarai erai eicoloŋ loka Edeke;

³⁵ karaida alimit akwap, naarai erai iicoloŋ yenika akejeke; karaida alimit Yerusalem, naarai erai ere loka Ekabaka lokapolon.

³⁶Kwabo siriyapoi alimit akonikou, naarai mam ipedori aituluor ekonitimat ediopet araun Ioekwaŋ arai loiriono.

³⁷ Konye nuineras koraas Eebo, eebo, arai Mam, mam: naarai nuedeparito ŋun epote kama ejai lokaronon.

³⁸ “Ipotu kiirasi kelimokinitai ebe, Akoŋu itia akoŋu, ekelai da itia ekelai.

³⁹ “Konye eoŋ katemari yes atiar, Sirikinyaŋa yenikaronon: konye ŋinituŋanan yenikibapi eitinyokon lokoteten, kibelok lokokediany da.

⁴⁰ Ka ituŋanan yenekot awoosan jo, ayaŋaar ekasokon, kinyeinia ŋes ekooti da.

⁴¹Ŋin da yenikitiŋaikini alosit amairo adiopet, kolot ka ŋes amairon aarei.

⁴²Yenikilipi, koinak, ka yenekot ayuunio kamakon sirikiboŋok epur.

⁴³ “Ipotu kiirasi kelimokinitai ebe, Komina eidunyetekon, kola lokasurupikon.

⁴⁴ Konye eoŋ katemari yes atiar, Kominasi lukasurupokus, kilipanakinete da lukimanito;

⁴⁵ tetere iraunete idwe luka Papakus loejai toma akuj; naarai itacaikini ŋesi akekoloŋ lukaronok ka lukajokak da, isitepikini akiru luedolito ka lumam edolito da.

⁴⁶Naarai arai iminasi lukiminas yes, idumunete eropit enyoin? Mam kereka iketelemak esolo iswamaete nuikote nen?

⁴⁷Arai da iyogaete iinacanakus bon, iswamaete nunyoika adepar ice? Mam kereka Imo iswamaete nuikote nen?

⁴⁸ Aso iraunete yesi luidolito, kwape edolitor Papakus lokotoma akuj.