Read Ateso Matayo 6 Bible Online

Matayo 6 - Ateso bible

Matayo 6

¹ “Kocoito kinyeis aswam nukadolitekus kakonyen nuka ituŋa, tetere eanyunete kesi: naarai arai kiswamata nuikote nen, mam idumunete eropit kama ejai Papakus loejai toma akuj.

²“Aso naikoria ainakineta nukaitim, sirikituru arupepe kakonyenekon, kwape iswamaata lukesoswai kotoma atukosia, korotin da, tetere itopoloorete ituŋa. Abeit katemari yes atiar, Adaut adumun eropitikec.

³ Konye jo naikoria ainakineta nukaitim, kinyek akonikan nakokediany ajenun nuiswamai nakoteten;

⁴korau akoniikor nakaiyeiyea; Papakon da loeseseni kaiyeiyea kiropi jo.

⁵ “Nailipiata da, siriraas kwapelukesoswai; naarai eminasi ailip kobwoete katukosia ka asisiarin da nuka irotin, tetere etakanete kotuŋa. Abeit katemari yes atiar, Adaut adumun eropitikec.

⁶ Konye jo nailipenenaa, kolomanari toma agolakon, kidau agolokin ekonikek, kilip Papakon lokaiyeiyea, Papakon da loeseseni kaiyeiyea kiropi jo.

⁷ “Ido nailipiata sirinyogonyogoete akiro atai, kwape ka Imo; naarai eomitos ebe iirario kanuka akirokec nuipu.

⁸ Aso sirikiputokinos kaŋul: naarai ejeni Papakus nuipudasi yesi, eriŋa kilipa.

⁹ Aso kilipenenete yesi kwanata: Papakosi loejai toma akuj, Ekonikiror kitalaunai.

¹⁰ Akonijakanut kobu. Nuikoto kiswamai kakwapin Kwape iswamaere kotoma akuj.

¹¹Koinakinai sio lolo ikosinyamat luka lolo.

¹² Kisionioi sio akosipesenin, Kwape kisionio isio lukapeseninikosi.

¹³ Sirikiya sio toma acodunio, Konye koyuunai kama ejai lokaronon. [Naarai ajakanut, ka apedor, ka apolou, eraas nukon, ikar kere, Amen.]

¹⁴ Naarai arai isioniete yesi luce akeceibucanareta, Papakus da lokotoma akuj kisionie yes.

¹⁵Konye arai mam yes isioniete luce akeceibucanareta, Papakus da mam kisionie yes akusiibucanareta.

¹⁶ “Bobo da nailuŋiata, siriraas kwape lukesoswai luinyorididos ireeta; naarai emunaunete ireetakec, tetere etakanete kotuŋa ebe eluŋete. Abeit katemari yes atiar, Adaut adumun eropitikec.

¹⁷Konye jo, nailuŋia, kinyonyoenenei akinyet akoukon, kilosi da akonikonyen,

¹⁸tetere mam itakanuni kotuŋa ebe iluŋi, dimarai Papakon lokaiyeiyea: Papakon da loeseseni kaiyeiyea, kiropi jo.

¹⁹ “Siriŋadanakinete kanukus abar akwapin, neemunaariata ikajekel ka amasikin da, ido neebokiata ikokolak ka akokwaar.

²⁰ Konye kiŋadanakinete kanukus abar akuj, nemam emunaariata ikajekel ka amasikin, ido nemam ebokiata ikokolak ka akokwaar da.

²¹Naarai nepejai akonibar, nepenen ejaikin ekonitau da.

²² “Atala naka akuan ŋes akoŋu: aso arai eteni akonikoŋu, akonikuan kere ecauni.

²³ Konye arai erono akonikoŋu, akonikuan kere emutono. Aso arai emutono aica naejai kotomakon, epol ca ma amuton ŋin!

²⁴ Emamei ituŋanan yenepedori aijaanakin ijaka iarei; naarai arai elai ediopet, komina loce; arai bo iketakin kediopet, emeni loce. Mam ipedorete aijaanakin Edeke ka aijaanakin abar da.

²⁵ “Aso do katemari yes atiar, Siriyaloŋoŋoete kanuka akusiijar, Iuinyamete ka luimasete; karaida kanuka akusiwat, luinapete. Mam kereka aijar itelekarit inyamen, ka akuan da anapito?

²⁶ Kosesenata akweny nuka apak, mam eyeete, karaida aidweny, karaida atukonokin Emono; konye itanyami kes Papakus lokotoma akuj. Mam kereka yes itelekaritos ŋun ketiai?

²⁷Iŋai bo kayesi kiyaloŋoŋ epedori aiyatakin akeibut?

²⁸Kanukinyo iyaloŋoŋooto kanuka anapito? Koomito aapecelun nuka ais, kwape epolooto; mam itaaritos, ido mam eojiete:

²⁹ konye katemari yes atiar, Ka Solomon da kotoma aibusesuke kere mam esiritoi kojokan kwape adiopet kaŋun.

³⁰Aso arai itanapi Edeke kwaŋin inya luka ais, luejaas lolo, ecakario moi oupa, mam kereka itelekari aitanap yes, okwe yes luedit aiyuun?

³¹Aso sirikiyaloŋoŋoto kobalas ebe, ‘Kinyami inyo?’ Arai ‘Kimasi inyo?’ Arai, ‘Kinapi inyo?’

³² Naarai emoete Imo ŋun kere; kwabo ejeni Papakus lokotoma akuj ebe ipudas ŋun kere.

³³ Konye komoata ber yesi akejakanut, ka akedolit da; ido kiyatakinio ŋun kere.

³⁴ “Aso sirikiyaloŋoŋoto nuka moi: naarai iyaloŋoŋi moi kanukeŋ. Edaunit apaaran aronisike.