Read Ateso Marako 11 Bible Online

Marako 11 - Ateso bible

Marako 11

¹ Nakeapiariata Yerusalem, die ka Betapage ka Betaniya, moru loka Iseitunin, kijuka iarei kokesisiakake,

²Kotema kes atiar, “Koloto kiton ore loisesenete: atipet kilomasi idumunete ikoku yenika asigiria eenitai, yenimam lem ibwanenit idiotuŋanan; kolacut, koinut.

³ Arai kitemari yes ituŋanan ebe, ‘Kanukinyo iswamaata kwaŋin?’ ilimokinete ŋes ebe, ‘Ejakait ipuda ŋes, ido inyakuni bobo ne atipet.’ ”

⁴Koloto, kodumut isigiria eenikinitai okek kiŋa orot; kolacut.

⁵Kotemasi ice kalukebwoete kanen atiar, “Kanukinyo ilacariata yesi isigiria?”

⁶Koboŋokis kes kwape alimokinitor Yesu: kocamakis kes alosit.

⁷Koinut Yesu isigiria, kocakanakis ikecenapen; kibwanen ŋesi.

⁸Kopetanakis luipu ikecenapen orot; ice da akui nukejepununete kamanat.

⁹ Kiworoto ituŋa lukiŋarenikinito ka luketupakinito ebe, “Kosana! Isirereŋitoi loebunit kokiror loka Ejakait!

¹⁰Isirereŋitoi ajakanut naebunit, naka papaakosi Daudi! Kosana kuju noi kakuj.”

¹¹ Koloma ŋesi Yerusalem, toma oyekalu; nakedaunia asesen iboro kere, naarai kitiboŋit akwap konyou kolot Betaniya nepepe kalutomon kaluarei.

¹²Apaaran naatupakini, nakeponiata ko Betaniya, korieb eteŋei.

¹³ Kiteluo etini kama elwana eribiribi, kolot aanyun arai diat epedori adumun amodioraito kotomakeŋ; nakedolokinio mam edumuna amodioraito dimarai akui bon; naarai mam kerai apak naka itinin.

¹⁴ Koboŋok kotema ŋes atiar, “Sirikenyam ituŋanan araitokon amear lolo kiton ikar kere.” Kopupete ikekesisiak.

¹⁵ Kodoloto Yerusalem: koloma toma oyekalu, kogeu aireŋear lukegwelanarete ka lukegwelete kotoma oyekalu, kobuburiana imesan luka ikesiecanarak arupian ka iicoloŋo luka ŋul kalukegwelanarete ajeleik;

¹⁶kwabo mam ecamakina ituŋanan aibwokit ibore kotoma oyekalu.

¹⁷ Kisisianak kes, kotema atiar, “Mam kereka iwadikatai ebe, ‘Enyarao ekatogo etogo lokilipet kanuka atekerin kere’? Konye yes ituluosi abua naka ikaŋatak.”

¹⁸Kiirasi isasedotin lupeti ka ikewadikak ŋun, komoata epone loemudiariata; naarai kekuriaka ŋes, naarai keumokinit ekodet kere kanuka akeisisianakin.

¹⁹Nakitiboŋenenaa akwap kolomanarenenei kore.

²⁰ Nakitorioto tupuruc, koanyutu etini ŋol kerinyo ameun kakeje.

²¹Kiitu Petero akiroke, kotema atiar, “Rabi, koany, kerinyo etini lokilamakini ijo.”

²² Koboŋok Yesu kotema kes atiar, “Kiyuutu Edeke.

²³ Abeit katemari yes atiar, Ŋinituŋanan yenelimokini eroŋat lo ebe, ‘Koukor, kocakakin aŋolol’; komam ebuonokini kotauke, konye kiyuunite ebe nuinera edolete; iswamakinio.

²⁴ Kanuka ŋun katemari yes atiar, Akiro kere nuilipete ka nuiŋaiŋaete kiyuunito ebe kiinakinitai, ido kiswamakinio.

²⁵ Naibwoenenaata ilipete, kisioniete, arai ijaas kakirot kayenice; tetere Papakus loejai toma akuj isioniei akusiibucanar. [

²⁶Konye arai mam yes isioniete, Papakus da loejai toma akuj mam isioniei akusiibucanar.]”

²⁷ Kodoloto bobo Yerusalem: ido nakitoritor oyekalu, kopotu isasedotin lupeti ka ikewadikak ka imakio mama ejai;

²⁸kotemasi ŋes atiar, “Iswamai ijo nu kapolou anyoin? Iŋai da kiinakini jo apolou nakiswamaa nu?”

²⁹Kotema Yesu kes atiar, “Mere eoŋ da keŋit yes akirot adiopet, yes da koboŋokis eoŋ, ŋes konyet kalimokiniata apolou nakeswamaa nu.

³⁰Aibatisa naka Yokana kebuni kotoma akuj, arai bo kotuŋa? Koboŋokinoi.”

³¹Kiŋitanakinos bonik ka bonik, kobalas ebe, “Arai kiitema ebe, ‘Kebuni kotoma akuj’; etemari ŋesi ebe, ‘Aso kanukinyo mam kiyuuniata ŋes?’

³²Konye arai kiitema ebe, ‘Kebuni kotuŋa’ kokuriaka ituŋa: naarai aomito ituŋa kere ebe kerai Yokana enabi abeit.

³³Koboŋokis Yesu ebe, ‘Mam kijeni.’ ” Kotema Yesu kes atiar, “Eoŋ da mam kalimokini yes apolou nakeswamaa nu.”