Read Ateso Marako 13 Bible Online

Marako 13 - Ateso bible

Marako 13

¹ Nakelomunia koyekalu, abu ediopet kokesisiakake kolimok ŋes ebe, “Ekesisianakinan, koany amoru nu kwape ejaatar, ka aduketa nu da kwape ejaatar!”

²Kotema Yesu ŋes atiar, “Iany aduketa nu nuepolok? Mam esalakin amoru adiopet kuju kanace, namam etiyakinio.”

³Nakiboioo kotoma omoru loka Iseitunin atereikina eyekalu, kiŋita ŋes Petero ka Yakob ka Yokana ka Anderea kaiyeiyea ebe,

⁴“Kolimokinai, ejaunete bo ŋun wori? Anyoin da aanyunet naka apak naeapuuniata ŋun kere aitodolikinio?”

⁵Kogeu Yesu atemar kes atiar, “Kocoito kinyek ituŋanan aitapaar yes.

⁶Epote rwaru luipu kokirorika, kobalas ebe, Eoŋ ŋopeŋol; itapaarete kesi luipu.

⁷Naiirariata nuka ijiisio ka iemuto luka ijiisio, sirikiyaloŋoŋoto: ibusakinit ŋun ajaun; konye koroko awasia edoluno.

⁸ Naarai enyoikini ateker asurokin ateker, ka ajakanut da asurokin ajakanut: ejaununete amaraneta nuka akwap kaiboisio nuegelegela; ejaunun da ebel: ŋun ŋes ageunet naka ariebo naka aidoun.

⁹ “Konye kocoito yesi ikulepek: naarai kiyaŋaarete yes airabisia; kibuŋao katukosia; ibwoete kakonyen nuka ikayaitok ka ikabakan kanukaŋ, araut ikajenak kamakec.

¹⁰ Ibusakinit ber Akiro Nukajokak alimonokinio atekerin kere,

¹¹Nakiyaŋaariata yes aijaikin atubokinio, sirikiliŋa aiyaloŋoŋ nuinerete: konye nukiinakinio kosawa kaŋol kinerata ŋun: naarai mere yes inerasi, dimarai Emoyo Lokalaunan.

¹² Ijaikini onac onaceke atwanare, papa da ikekoku; enyoikinete idwe da lukauriakakec, tetere eario.

¹³ Kiŋarunete yes ituŋa kere kanuka ekakiror: konye yenetitiŋikini kiton awasia, ŋes itajario.

¹⁴ Konye naianyuniata etal loemudiari ebwoi nemam ibusakinit (yenesiomi kojenu), ŋes konyet ekeriata ŋul luejaas Yudaya oroŋan.

¹⁵ Ituŋanan yenejai kuju togo sirikedoku, karaida alomar ayaŋaar ibore kotogoke.

¹⁶Yenejai mana da sirikeboŋu kau ayaŋaar akenapito.

¹⁷Konye itukwi kes nuepotiete, ka nuitanakete da kapaarasia kaŋun!

¹⁸Kilipata yesi kinyek apak ŋin adolun kiporo.

¹⁹ Naarai eraunos apaarasia ŋun nukican, numam peŋo etakanunito ameun kasubio naasubia Edeke kiton kwana, komam bobo ejaunete cut.

²⁰Kedim Ejakait aiŋoŋar apaarasia timam kitajari akuan kere; konye kanuka luseuna, luabu ŋesi koseu, eŋoŋa apaarasia.

²¹Kapak kaŋin arai kitemari yes ituŋanan ebe, ‘Koany, ejai Kristo ne’; arai bo, ‘Koany, ejai laije’; sirikiyuut.

²² Naarai enyounete luKriston lukeŋalak ka inabin lukeŋalak, itodikinete ŋul aanyuneta ka nukaumokin da, tetere itapaarete luseuna, arai epedoros.

²³Konye kocoito yesi kadau aikwenyar yes eroko akiro nu kere epona.

²⁴ “Konye kapaarasia kaŋun akaulo ka ican ŋul, itumutonorio akoloŋ, mam elap ecauni,

²⁵ ibirununos aacerin kotoma akuj, itamaranio da nukapedor nuejaas toma akuj.

²⁶ Kosodi konyet eanyunete Okoku loka etuŋanan ebuni kodouon, kapedor naepol ka aibuses.

²⁷ Kosodi ijukuni imalaikan, etukonokini luseunake anyoun kokwamin iwoŋon, ameun kosaŋe loka akwap kiton osaŋe loka akuj.

²⁸Aso kisisiautu akewaragan kama ejai etini; kedaut aketenieik alibun, itolomuni akekui, ijenunete ebe eapie apak naka aidweny.

²⁹Aso yes da, naianyuniata ŋun edolunete, kojenut ebe eapie ŋesi, kokek,

³⁰Abeit katemari yes atiar, Mam edaun atur na aitodol naejaunotor akiro ŋun kere.

³¹Edaunos akuj ka akwapin, konye akakiro mam edaunos cut.

³² “Konye akiro nuka apaaran kaya ka esawa da emamei yenejeni, karaida imalaikan luejaas toma akuj, karaida Okoku, dimikito Papa bon.

³³Kocoito, kokwenyete, kilipete: naarai mam ijenete naejaikinor apak.

³⁴ Eputos bala etuŋanan ekepejon loiboiororoi kacekwap, kinyeinite eketogo, koinakinite ikebulesin apolou, ŋinituŋanan akeswam, kicorakinite da ekagolon aikweny.

³⁵ Aso kokwenyete: naarai mam ijenete naebunio ejakait loka etogo, arai eboŋ, arai kidiŋ ebai, arai naeruikinioto ikokoroi, arai tupuruc;

³⁶kinyek aŋesun atipet kodum yes ijotoete.

³⁷Ido nukalimokini yes, alimokini kere, ebe Kokwenyete.”