Read Ateso Marako 14 Bible Online

Marako 14 - Ateso bible

Marako 14

¹ Kosodi esalito apaarasia aarei eroko epucit loka Aleleŋ ka imugatin lumam itubuunitoi kedolo: komoata lusasedotin lupeti ka ikewadikak epone lokikamunet kapirianut, ka aiar ŋes,

²Naarai kobalas ebe, “Mere toma apak naka epucit, kinye diat ecelet ajaun otuŋa.”

³ Nakejaar ŋesi Betaniya togo loka Simon lokatapon, iboie enyami, kobu aberu nakejai ekube loka akinyet naelai naka etiai loepol naeuru maa: kobwaŋ ekube, kobukok akouke.

⁴Konye kojaas ice lukenyunyuras, kotemanaros atiar, “Kanukinyo emadiŋikinor akinyet kopone kaŋol?

⁵Naarai tikepedor agwelar akinyet ŋin adenarin akwat auni ka aitedepar da, kokoranakinai lukican.” Kitorona ya.

⁶Konye kotema Yesu atiar, “Kinyekisi; kanukinyo itiyaloŋoŋooto ŋes? Keswamak eoŋ aswam naejok.

⁷ Naarai apaarasia kere ejaas lukican nepepe kayes, ido naikototor ipedorete aiswamakin kes nuejok: konye eoŋ mam kija kayes apaarasia kere.

⁸Eswama nuepedorit: ageik ainyonyoikin akakuan akinyet kanuka aidaare.

⁹Ido abeit katemari yes atiar, Neelimonokinio Akiro Nukajokak kotoma akwapin kere, ŋin naeswama aberu na elimorio akiitunitor ŋes.”

¹⁰ Konyou Yuda Isikariot, lokerai ediopet kotomon kaluarei, kolot mama ejaas isasedotin lupeti, tetere ijaikini ŋes mamakec.

¹¹Kosodete nakiirariata, kiyalamikinos, kisumunoto ainakin ŋes arupian. Komo apak naejokiar aijaikin ŋes mamakec.

¹² Kapaaran nasodit naka imugatin lumam itubuunitoi, naearere lukaleleŋ, kotemasi ikekesisiak ŋes atiar, “Ai bo ikoto kaloto ketemokis konyamak lukaleleŋ?”

¹³Kiyakia iarei kokesisiakake kotema kes atiar, “Koloto ore, iriamunos yesi ketuŋanan loibwokit amot naka akipi: kotupasi ŋes.

¹⁴ Kere neelomari, kolimokis elopet etogo ebe, ‘Ebala Ekesisianakinan ebe, Ani bo akagola nakipejok, neanyamakini lukaleleŋ nepepe kikakesisiak?’

¹⁵Kitodikini ŋesi yes agola naepol nakokuju epesitai itemokino: kitemonokis nen kanuwok.”

¹⁶Konyout ikekesisiak, koloto ore, kodumut kwape kelimokinitor: kitemokis lukaleleŋ.

¹⁷ Nakimukoki akwap kobu nepepe kalutomon kaluarei.

¹⁸ Napiboiete enyamete, kotema Yesu atiar, “Abeit katemari yes atiar, ediopet kayesi lokimori keoŋ kabilakini nat ebotet.”

¹⁹Kogeut akadakin, kotemanasi ediopet ediopet atiar, “Eoŋ ca nat ya?”

²⁰Kotema kes atiar, “Ediopet kotomon kaluarei, lokicunyi keoŋ atibo,

²¹Naarai elosi Okoku loka etuŋanan kwape kiwadikatere kanukeŋ; konye itukwi, etuŋanan ŋol loebilakini Okoku loka etuŋanan ebotet! Tiejok kama ketuŋanan kaŋol arai mam kewuruunitai.”

²² Napenyamete, kolem emugati, kedau aisirereŋ, kobilibil, koinak kes, kotema atiar, “Kolemutu: lo ŋes akakuan.”

²³Kolem akoli da, kedau aimal, koinak kes; komatata kere.

²⁴ Kotema kes atiar, “Nu kes akaokot nuka aitutuket, nuebukoros kanuka ikepuak.

²⁵Abeit katemari yes atiar, Mam amasi bobo cut nuka araito naka emusabibu, kiton apaaran ya naamasia nukitetiak kotoma ajakanut naka Edeke.”

²⁶ Nakedauniata ayoore ekosio, koloto moru loka Iseitunin.

²⁷ Kobala Yesu kes ebe, “Iguikinos yesi kere: naarai iwadikatai ebe, ‘Ebuŋai rwaru ekecokon, isiarakinos amerekekin.’

²⁸ Konye kadau ajarun, keŋarenikinete yes alosit Galilaya.”

²⁹Konye kotema Petero ŋes atiar, “Karaida kiguikinos kere, konye eoŋ mam.”

³⁰ Kotema Yesu ŋes atiar, “Abeit katemari jo atiar, Lolo akuare na, eriŋa ekokor eruikino irwan aarei, kiŋeri eoŋ irwan auni.”

³¹ Konye kiyatak ŋesi noi kobala ebe, “Karaida kebusakinit atwanare kajo, mam kaŋeri jo cut.” Luce da kere kinerata kwape kwaŋin.

³² Kodolokis aibois ekekiror Getesemane; kobala ŋesi ikekesisiak ebe, “Kiboikinos ne, kelipi ber eoŋ.”

³³Koyaŋa Petero ka Yakob ka Yokana nepepe kaŋes, kogeu ainoŋanakin noi ka aburun.

³⁴ Kotema kes atiar, “Itururwei noi ekatau aapiar atwanare: kosalata yesi ne, kokwenyete.”

³⁵Kikunyak nediokasilon, kibiror ebuburia, kilip ebe arai kepedoros kinac esawa ŋol.

³⁶ Kobala ebe, “Aba, Papa, kere epedoros kamakon: kolemarai akoli na: konye mere nuakoto eoŋ, dimarai nuikoto ijo.”

³⁷Koboŋ, kodum kes ejotoete, kotema ŋesi Petero atiar, “Simon, ijotoi ca ijo? Mam ipedori aikweny esawa ediopet?

³⁸Kokwenya kilipa, kinyeis alomar acodunio; ekoto bo emoyo, konye ekalanyana akuan.”

³⁹Kikunya bobo, kilip, kinera akiro kwapekwa,

⁴⁰Koboŋ bobo, kodum kes ejotoete, naarai eluranaros ajo; mam apotu kojenut nueboŋokinete ŋes,

⁴¹Koboŋ bobo nakiwuniet, kotema kes atiar, “Iroko kereka ijotoete, iyeŋito? Aso do; adolu esawa; koany, einakinio Okoku loka etuŋanan akanin nuka ikadiakanarak.

⁴² Konyoutu, kaloto; koany, eapie lokabilaki eb otet.”

⁴³ Atipet napinera, kodolu Yuda, edioper kotomon kaluarei, koupas kekodet lokejaas ikileŋa ka ibelai, epote kama ejaas isasedotin lupeti ka ikewadikak ka imakio.

⁴⁴Koinakinite kes lokebilakini ŋes ebotet aanyunet, kobala ebe, “Loanui eoŋ, ŋes ŋol; kikamutu ŋes, koyaŋaasi ikokito.”

⁴⁵Napekedolu, atipet kolot mama ejai Yesu, kobala ebe, “Rabi”; konu noi.

⁴⁶Koriosi akecekanin, kikamut ŋes.

⁴⁷Konye ediopet kakesi lukebwoete eapie, kout ekekileŋ, kinom ebulesit loka esasedoti lopeti, kojepa akekit.

⁴⁸Koboŋok Yesu kotema kes atiar, “Ilomut teni yesi kikileŋa ka ibelai aikamun eoŋ, bala ekaŋatan?

⁴⁹ Ajaenena kayes ŋinipaaran toma oyekalu, esisianakini, komam kikamunete; konye ajaut nu tetere edolete Nukiwadikatai.”

⁵⁰Kosodete kojalakis ŋes kere, kokerata.

⁵¹Kotupa etelepat ediopet, lokijelokinit egoe lokebaputa bon. Kikamut ŋes,

⁵²Konye kinyek egoe lokebaputa, koker imujalal.

⁵³Koyaŋaasi Yesu mama ejai losasedoti lopeti; kotukonokinotor isasedotin lupeti kere ka imakio ka ikewadikak da.

⁵⁴Petero da kotupite kama elwana, kiton toma alaro naka losasedoti lopeti; kiboiete nepepe kikejaanakinak, ipieri akim.

⁵⁵ Komoata isasedotin lupeti ka aurianet kere ikajenak aluikin Yesu, tetere earete; mam edumuna.

⁵⁶Naarai apotu luipu kitejenut nukaiŋal, konye mam emorikikina akeceitejenun.

⁵⁷Kobwaata ice, kitejenut nukaiŋal, kobalas ebe,

⁵⁸ “Kipou isio keirasi ŋes ebala ebe, ‘Akesi eoŋ eyekalu lo lokedukio kakanin, adukuni ece kotoma apaarasia auni lomam edukio kakanin.’ ”

⁵⁹Karaida kwaŋin mam aitejenunikec emorikikina.

⁶⁰Kobwo losasedoti lopeti kokidiŋ, kiŋit Yesu ebe, “Mam cabo iboŋokini akirot? Anyoika ŋun nuetejenut ŋul aluikin jo?”

⁶¹ Konye ŋes kililiŋ, mam eboŋokino akirot, Kiŋit bobo losasedoti lopeti, kotema atiar, “Irai kereka ijo Kristo, Okoku loka Loituritoi?”

⁶² Kotema Yesu atiar, “Eoŋ ŋopeŋol; ido ianyunete rwaru Okoku loka etuŋanan iboie kakan nakoteten nakapedor, eupunos kidouon luka akuj.”

⁶³Kocil losasedoti lopeti ikenapen, kobala ebe, “Inyo bo kipudar bobo ikajenak?

⁶⁴ Iirasi ainyanakinike: iwomitos anu?” Kotubokis kere ebe ibusakinit atwanare.

⁶⁵Kogeut ice aimwaanakin aimul, korapakis akekonyen, kodipidipoto, kobalas ebe, “Komurwo.” Ikejaanakinak da lukeyaŋaarete, kibapanasi ŋes.

⁶⁶ Kosodi nakejaar Petero kwap alaro, kobu adiopet kakejaanakinak nuka losasedoti lopeti;

⁶⁷koany Petero ipieri akim, kosesen ŋes, kobala ebe, “Ijai nan ijo da nepepe ka Enasarayot je Yesu.”

⁶⁸Konye koŋer, kobala ebe, “Mam ajeni, ido mam apupi nuinera ijo.” Koloma kiŋa kiton neelomarere: koruik ekokor.

⁶⁹Koany akejaanakinan ya ŋes, kogeu bobo alimokin ŋul lukebwoete kanen ebe, “Erai lo lokec.”

⁷⁰Konye koŋer bobo. Apak edit bobo kolimokis Petero lukebwoete kanen ebe, “Abeit irai ijo lokec; naarai irai ijo Egalilayat.”

⁷¹Konye kogeu eilam ka aiyapo ebe, “Mam eoŋ ajeni etuŋanan ŋol loilimito yesi.”

⁷² Atipet koruik ekokor irwan nakiareit. Kiitu Petero akirot nakelimokini Yesu ŋes ebe, “Eriŋa ekokor keruikino irwan aarei, kiŋeri eoŋ irwan auni.” Komulau eketau, komony.