Read Ateso Marako 15 Bible Online

Marako 15 - Ateso bible

Marako 15

¹ Atipet tupuruc sek kinerut isasedotin lupeti ka imakio ka ikewadikak, ka aurianet kere, koenata Yesu, koyaŋaasi, kijaikis Pilato.

² Kiŋit Pilato ŋes ebe, “Irai kereka ijo Ekabaka loka Iyudayan?” Koboŋok kotema atiar, “Ijo ibala.”

³Kiwosatos ŋes isasedotin lupeti kakiro nuipu.

⁴Kiŋit bobo Pilato ŋes ebe, “Mam cabo iboŋokini akirot? Koany akiro nuetia nen nukiwosatere,”

⁵ Mam bobo Yesu eboŋokino akirot; koumok Pilato.

⁶Kopucit atapit aosikin kes eenat ediopet, loelipete.

⁷Kejai etuŋanan lokenyaritai Baraba, lokeenitai nepepe kalukipaliikinete, lukearete ituŋa kotoma aipaliikin ŋin,

⁸Kobu ekodet kogeu ailip aiswamakin kes kwape kenaikinitotor.

⁹Koboŋok Pilato kes ebe, “Ikotosi kaosikis yes Ekabaka loka Iyudayan?”

¹⁰ Naarai ajeni ŋesi ebe ainakis isasedotin kanuka ekolo.

¹¹Konye kisidikoto isasedotin lupeti ekodet ebe, koosik gwai Baraba.

¹²Koboŋok bobo Pilato, kotema kes atiar, “Aso ekonakini ai ŋol loibalasi yesi ebe erai Ekabaka loka Iyudayan?”

¹³Kiworoto bobo ebe, “Kibubuk ŋes.”

¹⁴Kotema Pilato kes atiar, “Kanukinyo, naanyoin aronis nakiswamai?” Konye kiyatakisi kesi aiworo noi ebe, “Kibubuk ba.”

¹⁵Kosodi kokoto Pilato aisiyalamikin ekodet, koosik kes Baraba, ido kedau aida Yesu koinak tetere ibubukinio.

¹⁶Kitolomasi ŋes iserikalei alaro, naerai Epuraitorion[2], kotukokis erioŋet kere.

¹⁷Kitanapa anapito namuge, kojeata aboko naka ikukwa, kitanapikis akouke.

¹⁸Kogeut ayogan ŋes ebe, “Yoga, ijo Ekabaka loka Iyudayan!”

¹⁹Kinomonomata akouke kagada, kimwaanakis aimul, kokukonokinos komaata.

²⁰ Kosodete kedaut akienar ŋes, kolacasi anapito namuge, kitanapata akenapito. Kitolomasi kiŋa aibubukin.

²¹ Kitiŋaasi etuŋanan lokitorit, Simon Lokurenayot lokebuni kamanat, papa loka Alegesanda ka Rupo, tetere erioŋi emusalaba loka Yesu.

²²Koyaŋaasil aitodol aibois naenyaritai Gologota, apolouke ebe, Aibois naka Abelekek naka Akou.

²³ Koinakis ebino lokinyalakinitai lukesai; konye mam abu kocam.

²⁴ Kibubukis ŋes, kokorokorata ikenapen, kilamilamata eroet, aanyun lueyaŋaari ŋolituŋanan.

²⁵Kerai esawa lokiwuniet, kibubukis ŋes.

²⁶Kojai da ebalua loka nueosatai ŋes loewadikatai kuju ebe, “EKABAKA LOKA IYUDAYAN.”

²⁷Kibubukis ikaŋatak iarei nepepe kaŋes; ediopet kakanike nakoteten, ka ediopet da kakanike nakokediany. [

²⁸ Kosodi kitodolikinoi Nukiwadikatai ebe, “Aponi kimarakinai nepepe kalukepali.”]

²⁹ Lukitorito nen koinyanakinete ŋes, kimuŋumuŋete da akecekwes, kobalas ebe, “Aso cado! Ijo loikesi eyekalu, ka adukun kotoma apaarasia auni,

³⁰kitajarun cani, kodoku komusalaba!”

³¹Kikote nen da isasedotin lupeti kokienatar ŋes bonik ka bonik nepepe kikewadikak, kobalas ebe, “Etajar ice; mam epedori aitajarun bon.

³² Kristo, Ekabaka loka Isirael, kodoku komusalaba, kaanyutu, keyuutu da.” Ŋul da lukibubukinitoi nepepe kaŋes kimuasi ŋes.

³³ Napekedolo esawa lokikanyet kape, kojau amuton akwap kere kiton osawa lokikanyet kaoŋon.

³⁴ Kosawa lokikanyet kaoŋon kodelo Yesu keporoto loepol kobala ebe, “Eloi, Eloi, lama sabakatani?” apolouke ebe, “Ekadeke, Ekadeke, kanukinyo kijalakinia eoŋ?”

³⁵Ice kalukebwoete kanen, kiirasi, kobalas ebe, “Koany, enyarit Eliya.”

³⁶ Koker ediopet, kileleb acago ebino loedwar ria, kibwaik toma agada, kitamat ŋes, kobala ebe, “Kinyeisi; kaanyutu arai cani ebuni Eliya aitodokun ŋes.”

³⁷Konye Yesu kodelo keporoto loepol, kiridak.

³⁸ Kocila aigalisit naka eyekalu kaarei ameun kokuju kiton kwap.

³⁹Keanyu ekapolokiton lokebwoi kanen atereikina, ebe eridaki kwaŋin, kobala ebe, “Abeit etuŋanan lo kerai Okoku loka Edeke.”

⁴⁰ Kojaas da aŋor nukesesenete kama elwanikina: kotomakec kejai Mariam Magadalene, ka Mariam toto naka Yakob lodidi ka Yose, ka Salome da,

⁴¹nuaupenenas kaŋes, naajaar Galilaya, ijaanakinete ŋes; ka aŋor ace da nuipu nukedokarete nenipe kaŋes Yerusalem.

⁴² Kosodi napekitiboŋ, naarai kerai Aitemonokin, ŋes atemar ebe apaaran naeliŋakini nakasabato,

⁴³kobu Yosep loko Arimataya, esot lokaurianet, lokemunokina ajakanut naka Edeke; kotitiŋior koloma mama ejai Pilato, kilip akuan naka Yesu.

⁴⁴Koumok Pilato kwape ketwania atipet: konyarau ekapolokiton, kiŋit arai teni kedau atwanare.

⁴⁵Kedau ajenun kama kekapolokiton, kocam ainakin Yosep akuan.

⁴⁶Kogwel ŋesi egoe loka ebaputa, kolacu akuan, konunukik ogoe loka ebaputa, kibwaik toma ates nakikeitoi atiiba; kikokorik amor okek loka ates.

⁴⁷Kosesenete Mariam Magadalene ka Mariam toto naka Yose aibois naebwaikinio.