Read Ateso Marako 2 Bible Online

Marako 2 - Ateso bible

Marako 2

¹ Akaulo kapaarasia ace, nakelomaria bobo Kaparanaum, kiirarai ebe ejai ore,

²Kotukokinos ituŋa luipu, komamei adiopak naesalit karaida kokek; kolimonokini kes akirot,

³Kopotu koinut ŋes etuŋanan lokasenyan ibwokito ituŋa iwoŋon.

⁴Namam kepedoriata aikunyakin ŋes kanuka ekodet, koketasi eswi kama kejai; kedaut apukor, kijesut akapet nakiperikinitoi lokasenyan.

⁵Nakeanyunia Yesu akeceiyuun, kotema lokasenyan atiar, “Okokuka, esionii akonidiakanareta.”

⁶Ikewadikak ice lukejaas nen iboiete, kopegas kotauonokec ebe,

⁷ “Kanukinyo inerar ŋol kwaŋin? Einyanakini Edeke. Iŋai bo epedori aisioni adiakanareta, dimarai Edeke bon?”

⁸Atipet kojenu Yesu kotauke ebe epegas kwaŋin kotauonokec, kotema kes atiar, “Kanukinyo ipegatatar kwaŋin kotauonokus?

⁹Ani bo naepatana, alimokin lokasenyan ebe, ‘Esionii akonidiakanareta,’ arai bo atemar ebe, ‘Konyou, kibwok akonikapet kolot?’

¹⁰Konye tetere ijenunete ebe ejai Okoku loka etuŋanan apedor kakwap aisioni adiakanareta” kanen kotema lokasenyan atiar,

¹¹“Katemari jo atiar, konyou, kibwok akonikapet, koboŋo orekon.”

¹²Atipet konyou, kibwok akekapet koloma kakonyenekec kere: koumokis kere, kitopoloosi Edeke, kobalas ebe, “Mam lem kianyununei nuikote nen.”

¹³ Konyou bobo kolot ariri kaŋolol. Kolot ekodet kere mama ejai, kisisianak kes.

¹⁴ Nakitoritor, koany Lebi okoku loka Alipayo iboie kaitelemis, kotema atiar, “Kotupunai.” Konyou kotupa ŋes.

¹⁵Kosodi kanen, nakiboio enyami koreke, kiboiete iketelemak esolo luipu ka ikadiakanarak da nepepe ka Yesu ka ikekesisiak; naarai araas luipu.

¹⁶Kotuparito da ikewadikak luka Iparisayon, ido nakeanyuniata ŋes emorete kikadiakanarak ka iketelemak esolo, kiŋita ikekesisiak atiar, “Kanukinyo emoriata ŋesi ka iketelemak esolo ka ikadiakanarak?”

¹⁷Nakiiraria Yesu, kotema kes atiar, “Lukagogoŋok mam ipudas emurwon, dimarai lukadekak. Mam abunit anyarit ikadolitok, dimarai ikadiakanarak.”

¹⁸ Aluŋete ikesisiak luka Yokana ka Iparisayon. Kopotu ituŋa mama ejai Yesu, kotemasi ŋes atiar, “Kanukinyo eluŋiata ikesisiak luka Yokana ka ikesisiak luka Iparisayon, konye ikonikesisiak mam eluŋete?”

¹⁹Koboŋok Yesu kes ebe, “Epedorete biai ipapero luka eteran ailuŋ eriŋa eteran ejai kakes? Apak kere naejaatar keteran, mam epedorete ailuŋ,

²⁰Konye eponito apaarasia nuedemarere eteran; eluŋete do kapaaran kaŋin,

²¹Emamei yenedonyokini atutubet naka egoe lokitetet anapito namojoŋ; arai kikonaki nen, atutubet nakitetet ecili ya namojoŋ, iyatakini acilat.

²²Emamei da yenebukokini ebino loitet oriagin lukemukule lumojoŋ; arai kikonaki nen, ecili ebino iriagin, imadiŋikin ebino ka iriagin da; konye ebukonokinio ebino loitet oriagin lukitetiak.”

²³ Kosodi kanen, nakitoritor amanat apaaran nakasabato, napelosete kogeut ikekesisiak aijeje aluŋuren nuka akima.

²⁴Kotemasi Iparisayon atiar, “Koany! Kanukinyo iswamaata numam ibus kapaaran nakasabato?”

²⁵ Kotema kes atiar, “Mam lem isiomito nukiswamai Daudi, nakipudar korieb eteŋei, ŋes ka ikepaup;

²⁶ kwape kelomaria togo loka Edeke apaarasia nukeraar Abiatar esasedoti lopeti, konyam Imugatin luka Aitodikin, lumam ibus ainyam dimarai isasedotin, koinak ikepaup da?”

²⁷ Kotema kes atiar, “Asubio Asabato kanuka etuŋanan, kwabo mere etuŋanan kanuka Asabato.

²⁸Kwaŋin Okoku loka etuŋanan ŋes Ejakait loka Asabato.”