Read Ateso Luka 10 Bible Online

Luka 10 - Ateso bible

Luka 10

¹ Kosodi kokau kaŋun koseu Ejakait ice akaisakanykaarei, kiyakia kes iarei iarei aiŋarenikin ŋes alosit ŋolire ka ŋiniibois naekoto ŋesi elopet alosit.

² Kotema kes atiar, “Ipu idwenyan, konye ikidioko ikeswamak; aso kilipa Ejakait loka aidweny kijuk ikeswamak toma aidwenyeke.

³ Koloto yesi; koany, keyakiari yes kwape idwe luka amerekekin kokidiŋ opeen.

⁴ Sirikiyata eriagi, karaida ecoe, karaida amuk; sirikiyogata da ituŋanan korot.

⁵Ido ŋolitogo loilomanarete, kotemasi ber atiar, ‘Kojau ainapakin togo lo!’

⁶Arai kejaun okoku loka ainapakin kanen, esalakini ŋes ainapakinikus; arai mam, kiboŋokini yes ainapakinikus.

⁷ Kosalata ber togo ŋopeŋol, inyamete komasete lukiinakinete yes, naarai edolit ekeswaman aropio; siribwosenenete otogoi ice.

⁸ Ido ŋolire kere loilomanarete kiisukunyikis, konyamata inyamat lukiinakinete yes;

⁹kitaŋaleununete lukadekak luejaas nen, kolimonokinete ebe, ‘Ekunyu ajakanut naka Edeke mamakus.’

¹⁰ Konye ere kere loilomanarete, arai mam kisukunyikinete, kolomutu orotinike, kineras ebe.

¹¹ Kilakilakanakini yes adae nukakejenekosi; konye kojenutu na ebe, ‘Ekunyu ajakanut naka Edeke mamakus.’

¹² Katemari yes atiar, Kapaaran kaya, epatana Sodom atitiŋikin aitelekarit ere ŋol.

¹³ “Itukwi ijo Korasin! Itukwi ijo Betesaida Naarai arai kiswamatai koTuro ka Sidon nukapedor ŋun nukiswamatai kamakus, tikitoronikinos ŋosek, kiboiete kopukoi ka ekurwon.

¹⁴Konye apaaran naka etube epatanikini Turo ka Sidon atitiŋikin aitelekarit yes.

¹⁵ Ka jo da Kaparanaum, kitopoloorio kereka kiton akuj? Kijesario do kiton Okatwak.

¹⁶ “Yenikiirari yes, keirari eoŋ; yenikipaluni yes, kapaluni eoŋ da; yenikapaluni eoŋ epaluni lokejukuni.”

¹⁷Kosodete koboŋut kwi akaisakanykaarei kaiyalama, kobalas ebe, “Ejakait, kononokikis sio ajokin da kokirorikon!”

¹⁸ Kotema kes atiar, “Aany Satan ibiruni kokuju kwape keimilia.

¹⁹ Koany, kainakinit yes apedor aicakacak imunwo ka ikiritona, ido kama ejai apedor kere naka lokasurup; emamei da ibore kere yenikikonakini yes erono.

²⁰ Konye sirikiyalamikinos kanu kinonokikiniata yes ajokin; konye kiyalamikinos naarai iwadikatai ikusikiroria kotoma akuj.”

²¹ Kosawa kaŋol kolakar kOmoyo Lokalaunan, kotema atiar, “Kemalai jo, wu Papa, Ejakait loka akuj ka akwap, naarai ibu kimunonik akiro nu lukacoa ka lukaijen, kopukok da idwe ludidik; eebo, Papa, naarai kwaŋin ibu kitojokia kakonyenekon.

²² Kainak Papaka iboro kere; ido emamei yenejeni Okoku dimarai Papa, kwabo emamei yenejeni Papa dimarai Okoku, ka ŋin da yenekot Okoku apukokin ŋes.”

²³ Kosodi kibelokin mama ejaas ikekesisiak, kiner kakes kaiyeiyea ebe, “Isirereŋitoi akonye nuesesenete nuisesenete yesi.

²⁴ Naarai katemari yes atiar, ‘Apotu kimielas inabin luipu ka ikabakan aanyun nuisesenete yesi, mam eanyuna, ka akiirar da nuiirarete yesi, mam iirara.’ ”

²⁵ Ido koany, kobwo ericakisil ediopet kokodokod, kobala ebe, “Ekesisianakinan, ekonakini ai tetere erumi aijar naka ikar kere?”

²⁶Kotema ŋes atiar, “Iwadikatai bo inyo toma okisila? Isiomi biai?”

²⁷ Koboŋok ŋes ebe, “Komina Ejakait Ekonideke kekonitau kere, ka akoniijar kere, ka akonigogoŋ kere, ka akonicoa kere; ka ekoniidunyet da kwape iminari bon.”

²⁸ Kotema ŋes atiar, “Iboŋok kotenan; kikonaki nen, ijari.”

²⁹Konye ŋes ekoto aitoiokikin, kiŋit Yesu ebe, “Iŋai bo ekaidunyet?”

³⁰Koboŋok Yesu kobala ebe, “Abu etuŋanan kijesar anyoun koYerusalem alosit Yeriko, kiriamunos kikaŋatak, lukelacarete ŋes inapen, kibuŋata, koloto kinyeis eapie airidakin.

³¹Kosodi kanen kitor esasedoti orot ŋol; nakeanyunia ŋes, kinac kotubor,

³²Elebit da kwape kwaŋin, nakedolio aibois ŋin, koany ŋes, kinac kotubor.

³³ Konye Esamariat ediopet kalositeke, kedol nen nekejai; nakeanyunia, kitim ŋes,

³⁴kikunyak koen akemusuŋun, kobukok akinyet ka ebino; kibwanenik otiaŋake koyaŋa kiton togo loka ipejok, kimuke,

³⁵Apaaran nakiareit kolem adenarin[1] aarei koinak elopet etogo, kobala ebe, ‘Kimuke lo; ibore kere yenitaci aitedepar, katacakini jo naaboŋunio.’

³⁶Iŋai kaŋul kaluuni loiwomit ijo araut ekeidunyet kaje kalokiriamunos kikaŋatak”

³⁷Kotema atiar, “Ŋol lokitimi ŋes.” Kolimok Yesu ŋes ebe, “Kolot ijo da, kikonak nen.”

³⁸ Kosodete napebeete, koloma ore ediopet; kisukunyik aberu ekekiror Marita togoke,

³⁹Kejai ŋes kainacike naenyaritai Mariam, nakiboie kakejen nuka Yesu, iirari akekiro,

⁴⁰Konye abu Marita kitaaritoi kanuka aijaanakin naapol; kolot mama ejai Yesu kotema ŋes atiar, “Ejakait, mam kereka ipodo ebe kenyeinia kinacika aijaanakin bon? Aso kolimok ŋes keŋarak eoŋ.”

⁴¹Konye Koboŋok Ejakait kotema atiar, “Marita, Marita, iyaloŋoŋoi ilolonyi da kanuka akiro nuipu;

⁴² konye ipudai luikidioko, arai bo idiopet bon; naarai aseu Mariam ewai loejok, lomam edemario ŋes.”