Read Ateso Luka 11 Bible Online

Luka 11 - Ateso bible

Luka 11

¹ Kosodi kanen, nakilipia kaibois adiopet, nakedaunia, kotema ediopet kosesisiakake atiar, “Ejakait, kisisianakinai sio ailip, kwape kisisianakinia Yokana da ikekesisiak.”

² Kotema kes atiar, “Nailipiata, kineras ebe, Papakosi loejai toma akuj, ekonikiror kitalaunai. Akonijakanut kobu. Nuikoto kiswamai kakwap, kwape iswamaere kotoma akuj.

³Koinanakinai sio ikosinyamat luka ŋinipaaran;

⁴Kisionioi sio akosidiakanareta; naarai kisioniei isio lukapeseninikosi. Sirikiya sio toma acodunio, konye koyuunai sio kama ejai lokaronon.”

⁵Kotema kes atiar, “Iŋai kayesi yenejai ekepapero, kelot mama ejai kidiŋ kuare, kotema ŋes atiar, ‘Opaperoka, koyuunai ber kimugatin iuni;

⁶naarai adolu ekapapero mamaka ebuni kalosit, emamei eoŋ idiobore yenainakini ŋes ainyam’;

⁷ eboŋokini lokotogo ebe, ‘Sirikiitapas eoŋ; egolol ekek, kiperi eoŋ nepepe kikadwe koitada; mam apedori anyoun ainakin jo’?

⁸ Katemari yes atiar, Karaida mam enyouni ainakin naarai erai ekepapero, konye kanuka akeiŋaiŋait enyouni einakini ŋes luipuda kere.

⁹ Katemari yes atiar, Kilipa, kiinakinio; komoata, idumunete; kikuŋukuŋoto, kiŋaikinio,

¹⁰Naarai ŋin yenilipi ijaikinio, yenemoi edumuni, ka yenikuŋukuŋi da enaikinio.

¹¹Iŋai bo kayesi erai papa, arai kilipi ikokuke emugati, einakini tope amoru? Arai bo agar, ido aibois kagar einakini tope ŋes emun?

¹²Arai kilip abeet, einakini tope ekiriton?

¹³Aso arai yes lukaronok ijenete ainakin ikusidwe ainakineta nuejok, mam kereka itelekarit noi Papakus loejai toma akuj ainakin ŋul luilipete ŋes Emoyo Lokalaunan?”

¹⁴ Kosodi kanen ireŋeari ŋesi ajokit nabaŋ, Kelom ajokit, kiner lobaŋ; koumokis ikodeta.

¹⁵ Konye kobalas ice kakesi ebe, “Ireŋeari ŋesi ajokin kanuka Beelesebul ekapolon loka ajokin.”

¹⁶ Kocodut ice, kokotosi aanyunet naebuni kotoma akuj.

¹⁷Konye kejeni ŋesi akeceomisio, kotema kes atiar, “Ŋinijakanut naetiakatiakaun asurokin bon emudiar; arai etogo ketogo ibiror.

¹⁸Aso arai etiakatiakaun Satan bon, ikonakini ai akejakanut icasi? Naarai ibalasi yesi ebe ereŋeari eoŋ ajokin kanuka Beelesebul.

¹⁹Aso arai ereŋeari eoŋ ajokin kanuka Beelesebul, ido bo ikusidwe ireŋearete kanuka iŋai? Kanuka ŋun ŋes eraatar ŋul ikusikatubok.

²⁰ Konye arai ereŋeari eoŋ ajokin kebokorit loka Edeke, aso adolu ajakanut naka Edeke mamakus,

²¹Etuŋanan lokagogoŋ ekapi lujiisike idari alaroke, inapakina ikeboro:

²² Konye naebunokinia ekagogoŋon loedeparit ŋes, ipikori edemari lujiisike kere luamunokina ŋesi, ka akorokor iŋatanake.

²³ Ituŋanan yenimam ejai keoŋ, ŋes yenikekoloka; ituŋanan da yenimam etukonokini keoŋ, isiarakini.

²⁴“Kelonu emoyo loerono kotuŋanan, itori aiboisio nuemameete akip, emoot nekiyeŋunet; keoliki, ebala ebe, ‘Aboŋori togoka nekabunio.’

²⁵Keboŋu, edumuni epieitai, epesitai da.

²⁶ Kosodi do elosi eupunos kimoyon ice ikanykaarei luitelekarito ŋes aronis; elomarete kesi da esalete nen; ejautene loka ituŋanan kaŋin lokawasia eraun loerono adepar losodit.”

²⁷ Kosodi kanen, napinera akiro ŋun, kiworo adiopeberu kotoma okodet, kotema atiar, “Isirereŋitoi aliliget nakipotiere jo, ka ikisin da lukinaki.”

²⁸ Konye Yesu kobala ebe, “Konye ca, nuitelekarito, isirereŋitoi luiirarete akirot naka Edeke, koricata da!”

²⁹ Kosodi naketukokinotor ikodeta mamakeŋ, kogeu atemar kes atiar, “Atur na erai atur nakaronon; emoot aanyunet, kwabo mam einakinio aanyunet, dimarai aanyunet naka Yona.

³⁰ Naarai kwape keraar Yona aanyunet kama ejaas ituŋa luko Ninebe, kwape kwaŋin eraunia Okoku loka etuŋanan kama ejai atur na.

³¹ Enyouni akabaka naka Eŋalakimak kapaaran naka etube nepepe kituŋa luka atur kana, itetelekari kes akiro; naarai abu ŋesi kobu kosaŋe loka akwap akiirar acoa naka Solomon, ido koany, ejai ne yenitelekarit Solomon.

³² Enyounete ikiliok luka Ninebe kapaaran naka etube nepepe katur na itetelekarete ŋes akiro; naarai apotu kesi kitoronikinos kanuka alimonokin naka Yona, ido koany, ejai ne yenitelekarit Yona.

³³ Emamei yeninokokini atala kibwaik aipany arai toma obukit, dimarai ikajakini ocoget, tetere epedorete luelomunete aanyun aica.

³⁴ Atala naka akuan ŋes akonikoŋu; arai oteni akonikoŋu, akonikuan kere ecai; konye arai erono, akonikuan da emutono.

³⁵Aso kocoite kinye aica nakotomakon araun amuton.

³⁶Aso arai ecai akonikuan kere, komamei adiotutubet naemutono, ileleba kere aica pas, kwape katala nakinwakakinit jo kaicake.”

³⁷ Napinera, konyara Eparisayot ediopet oreke aimor kaŋes lukapaaran; koloma kiboikin ainyam.

³⁸ Keanyu Eparisayot ŋol koumok, naarai mam ber kilosit eroko enyama.

³⁹ Kotema Ejakait ŋes atiar, “Kwana yes Iparisayon itesegarete kiŋa kakolin ka asanin, konye kotomakus ileleba aiŋat ka aronis,

⁴⁰Ibaŋiok yesi! Lokesubi lukokuju mere ŋes lokesubi lukotoma da?

⁴¹Konye koinakisi lukotoma araut ainakineta nukaitim; ido koany, elaete kere kamakus.

⁴² “Konye itukwi yes Iparisayon! Naarai iinanakinete idiopet kotomon yenika alilot ka ecaboi ka ŋinikiyot kere, inyeinete etube ka amin naka Edeke; ibusakinit yes aswam ŋun komam inyeinete kwa da.

⁴³ Itukwi yes Iparisayon! Naarai iminasi iicoloŋo lukapolou katukosia, ka aiyogao kagwelanareta.

⁴⁴Itukwi yes! Naarai iputos katesin numam etakanete, nuitorito ituŋa komam ejenete.”

⁴⁵Koboŋok ediopet koricakisila kotema ŋes atiar, “Ekesisianakinan, kiner ijo kwaŋin kimoromor sio da.”

⁴⁶Kotema atiar, “Itukwi yes da iricakisila! Naarai isibwokete ituŋa ibwokon lukalaŋirok, konye yes ikulepek mam itirorete ibwokon kediopet kobokorokus.

⁴⁷Itukwi yes! Naarai idukete atesin nuka inabin luapotu lukapapaakus koara.

⁴⁸Aso iraas ikajenak icamunito da aswamisio nuka lukapapaakus; naarai kes lukearete, yes da idukete atesinakec,

⁴⁹Kanuka ŋun inera acoa naka Edeke ebe, ‘Ejukakini kes inabin ka ikiyakia, earete ice kakes, ereete,’

⁵⁰tetere itepesenio atur na aokot nuka inabi; kere, nukebukoros ameun kapetetait naka akwap,

⁵¹ ameun kaokot nuka Abel kiton aokot nuka Sakaria, lokearakinio kidiŋ ketem ka aibois nakalaunan. Eebo, katemari yes atiar, Itepesenio kotoma atur kana.

⁵²Itukwi yes iricakisila! Naarai ilemut alacetait naka aijen; mam yes ilomarito, ido itikokinito luakotos alomar.”

⁵³Nakelomunia kanen, kogeut ikewadikak ka Iparisayon aridakin jokan, ka aiŋitiŋit akiro nuipu,

⁵⁴ kolokata ŋes tetere ipoki kakirot naelomuni kaitukuke.