Read Ateso Luka 15 Bible Online

Luka 15 - Ateso bible

Luka 15

¹ Kosodete kikunyakis iketelemak esolo ka ikadiakanarak kere akiirar ŋes.

² Kirurumata Iparisayon ka ikewadikak ebe, “Isukunyikini etuŋanan ŋol ikadiakanarak, emorete da kakes.”

³Kolimok kes awaragan na ebe,

⁴ “Iŋai bo kayes yenejaas amerekekin akwatat, keolio adiopet, mam kereka inyeini akaisakanykaoŋon ka nukanykaonon kamodiŋ, kolot amoot ŋin nakeoliorit aitodol needumunia?

⁵Kedau adumun, erioŋakini okeperinike, kolakara.

⁶Naedolio togoke, enyarauni ikepapero ka ikeidunyeta, kolimok ebe, ‘Kolakaros nepepe keoŋ, naarai adum akamerekek naaoliorit.’

⁷Katemari yes atiar, Kwape kwaŋin ŋes ejaunor alakara toma akuj kanuka ikadiakanaran idiopet yenitoronikin itia kanuka ituŋa akaisakanykaoŋon ka lukanykaoŋon lumam ipudasi aitoronikin.

⁸“Arai iŋai bo aberu, ejaas karupiyan atomon, arai koolio adiopet, mam inokokini atalake ka aipie etogo ka amoot kainyikokinit kiton needumunia?

⁹Kedau adumun, enyarauni akepapero ka akeidunyeta kolimok ebe, ‘Kolakaros nepepe keoŋ, naarai adum arupiya naaoliorit.’

¹⁰ Katemari yes atiar, Kwape kwaŋin ejai alakara kakonyen nuka imalaikan luka Edeke kanuka ikadiakanaran idiopet yenitoronikin.”

¹¹Kobala ebe, “Kojai etuŋanan lokejaas odweke iarei.

¹²Kotema lodidi papake atiar, ‘Papa, ae atutubet naka ikoniboro lukabeito eoŋ.’ Kokorak do kes lukejaatar.

¹³ Ketuboros apaarasia nuikidioko, kotukonok lodidi lukebeito ŋes kere, kolot akwap naelwana, kiweliwel ikeboro kaŋina koponesio luutai.

¹⁴Nakedaunia aitwasam kere, kodo ebeli akwap ya, kogeu ŋesi da aiyarorotoi.

¹⁵Kolot kimorikikinos kediopet kokulepek akwap, kijuka ŋol ŋes oronyike acok ipegei.

¹⁶ Koŋat aimonikin abubuk nukenyamete ipegei; kemamei da ituŋanan yeneinakini ŋes idiobore.

¹⁷Nakiitoki kotauke, kobala ebe, ‘Imwaasi ai ikejaanakinak luka papaka luenyamete inyamat kosala, eoŋ da kane atwani eteŋei.

¹⁸ Anyouni do kalot mama ejai papaka, kalimok ŋes ebe, “Papa, adiaka kama ejai akuj, kakonyenekon da;

¹⁹Mam bobo kebusakinit anyarao okokukon; kikonakinai bala ediopet kokejaanakinakakon.” ’

²⁰Konyou kobu mama ejai papake. Konye naperoko elwana, koany papake ŋes, kitim, koker kibirokin omurisiŋike, konu ŋes.

²¹Kotema okoku ŋes atiar, ‘Papa, adiaka kama ejai akuj, kakonyenekon da; mam bobo kebusakinit anyarao okokukon.’

²²Konye kobala papake ikekejaanakinak ebe, ‘Koyaŋautu atipet anapito naitelekarit aibuses, kitanapa ŋes; kitanapikis da egilut obokoritike, ka amuka da akejeke;

²³koyaŋautu da itaok yenirobok koarata, kanyama kalakaros;

²⁴ naarai okokuka lo abu kotwana, ajaru bobo; aoliorit, atakanu bobo.’ Kogeut alakar.

²⁵“Kojai okokuke lokapolon amana; konye napebuni aapikin ere, kiira lueruos ka ekosio.

²⁶Konyarau ediopet kotelepai kiŋit ebe, ‘Ikote bo ai ŋun?’

²⁷Kolimok ebe, ‘Abu onacekon, aaraki papakon itaok yenirobok, naarai abwatu ŋes eŋalei.’

²⁸ Konye konyunyurikin, mam abu kokoto alomar toma. Kolom papake kiŋa kiŋaiŋa.

²⁹Konye Koboŋok ŋesi papake ebe, ‘Koany, kejaanak jo ikar lu luipu, kwabo mam adiakit adioicorakinetekon; konye mam kiinakinit eoŋ imodiokalol, kalakarotor kikapapero.

³⁰Konye napabunio okokukon ŋol, loabu konyam ikoniboro nepepe kanudotea, iarak ŋes itaok yenirobok.’

³¹ Kotema papake atiar, ‘Ikakoku, ijai ijo keoŋ apaarasia kere, kere da lukijaar eoŋ eraas lukon.

³²Ibusakinit alakar ka aiyalamikin, naarai onacekon ŋol abu kotwana, ajaru bobo; aoliorit, atakanu bobo.’ ”