Read Ateso Luka 17 Bible Online

Luka 17 - Ateso bible

Luka 17

¹Kotema ikekesisiak atiar, “Mam eswakete nuitiguikinete abunore; konye itukwi ituŋanan ŋin yeneyaŋauni ŋun!

² Tiejok ituŋanan ŋin aenikin akukuse omurisiŋike, kocakakinai aŋolol itia aitiguikin idiopet kaludidik kalu.

³ Kocoito; arai kediak onacekon, kitoron ŋes; arai kitoronikin kisioni.

⁴ Arai kediak kamakon irwan akanykaarei kapaaran adiopet, koboŋu mamakon irwan akanykaarei, kobala ebe, ‘Etoronikin,’ kisioni ŋes.”

⁵ Kotemasi ikiyakia Ejakait atiar, “Kiyatakinai aiyuunikosi!”

⁶ Kotema Ejakait atiar, “Arai kijaas kaiyuun naetia ecokat loka ekaradali, tikilimokis esukamin lo ebe, ‘Koukor, kiraikin aŋolol.’ Tikiirimak yes.

⁷“Ido iŋai bo kayesi yenejai ekebulesit loekoriei arai loicokiei amerekekin yenelimokini ŋes atipet napeboŋunio kotoma amana ebe, ‘Kobia atipet kiboikin ainyam’.

⁸Arai bo elimokini ŋes ebe, ‘Kitemokinoi ikanyamat lukatiboŋ, koen aŋabet, kijaanak eoŋ, kiton neadaunia eoŋ ainyam ka aimat; kosodi konyet inyami ijo da ka aimat’?

⁹Imalai kereka ŋesi ebulesit naarai eswama nuecorakinitai?

¹⁰Kwape kwaŋin yes da, naidauniata aswam kere nukicorakinitai, kineras ebe, ‘Kirai isio ibulesin lumam ajokis; kiswama bon nukibusakinit aswam.’ ”

¹¹ Kosodi kanen napelosi Yesu Yerusalem, kitor kidiŋ Samaria ka Galilaya.

¹² Napelomari ore ediopet, kiriamunos kalukatapon itomon, lukebwoete kama elwana,

¹³kiworoto kobalas ebe, “Wu Yesu, Lokapolon, kitimoi sio.”

¹⁴ Nakeanyunia kes kotema atiar, “Koloto, kitodiaros mama ejaas isasedotin.” Ido napelosete kiswagarai.

¹⁵Kosodi ediopet kakesi nakeanyunia ebe aŋaleu, koboŋu, kitopolo Edeke keporoto loepol.

¹⁶Kibirokin ebuburia akejen nuka Yesu, kimala ŋes. Kerai da ŋol Esamariat.

¹⁷Koboŋok Yesu kiner atiar, “Mam eswagara itomon kere? Ai bo do ejaas kwi ikanykaoŋon?

¹⁸Mam ca etakanunit edio da aboŋun aitopoloor Edeke dimarai emoit lo?”

¹⁹ Kotema ŋes atiar, “Konyou, kolot; kitajar jo akoniiyuun.”

²⁰ Nakiŋisiata Iparisayon ebe ebuni bo wori ajakanut naka Edeke, Koboŋok kes kotema atiar, “Mam ebuni ajakanut naka Edeke iteio;

²¹ kwabo mam ineras ebe, ‘Koany, ejai lailo!’ arai, ‘Ejai laije!’ Naarai koany, ejai ajakanut naka Edeke tomakus.”

²²Kotema ikekesisiak atiar, “Epote rwaru apaarasia, nuimielatar aanyun adiopet kotoma apaarasia nuka Okoku loka etuŋanan, komam ianyunete.

²³ Kilimokinete ebe, ‘Koany, ejai laije!’ ‘Koany, ejai lailo!’ Sirikiloto, kwabo sirikitupasi da.

²⁴ Naarai kwape imiliaunia eimilia ameun kowai ediopet loka akuj, inwakit kiton owai ece loka akuj, kwape kwaŋin ejaunia Okoku loka etuŋanan kotoma apaaranike.

²⁵ Konye ibusakinit ber ŋes aiticanio nuipu, kogir atur na.

²⁶ Kwape kejaatar kapaarasia nuka Noa, kwape kwaŋin ejauniata kotoma apaarasia nuka Okoku loka etuŋanan.

²⁷ Konyama, komata, komanya, ka amanyio da, kiton apaaran nakelomaria Noa toma ataker, kijesun akalele komudia kere.

²⁸ Kwape kwaŋin kwape kejaatar kapaarasia nuka Lot; konyama, komata, kogwela, kogwelasi, kiraata, koduko da;

²⁹ konye kapaaran nakelomunia Lot koSodom, kotep akim ka acukuman abunore kakuj, komudia kere.

³⁰Ikote nen kapaaran naepukorere Okoku loka etuŋanan.

³¹ Kapaaran kaŋin, yenejai kuju togo, kojaas ikeboro toma togo, sirikijesun alemun; kwape kwaŋin yenejai mana sirikeboŋu kau.

³² Kiitut aberu naka Lot.

³³ Inituŋanan yenekoto aitajar akeijar, itooliori; ka ŋin da yenitooliori akeijar itajari.

³⁴Katemari yes atiar, kakuare kaŋin ejaunos ituŋa iarei oitada ediopet; eyaŋaario ediopet, inyeinio loce.

³⁵ Ejaunos aŋor aarei iricete nepepe; eyaŋaario adiopet, inyeinio nace. [

³⁶Ejaunos ituŋa iarei amana; eyaŋaario ediopet, inyeinio loce]”

³⁷ Kotemasi ŋes atiar, “Laali bo, Ejakait?” Kotema kes atiar, “Neejai akuan, etukonokinos da atarukon nen.”