Read Ateso Luka 20 Bible Online

Luka 20 - Ateso bible

Luka 20

¹ Kosodi kanen kapaaran adiopet nakisisianakinia ituŋa koyekalu, ka alimonokin da akiro nukajokak, koponikis ŋes isasedotin lupeti ka ikewadikak nepepe kimakio.

²Kotemasi ŋes atiar, “Kolimokinai iswamai ijo nu kapolou anyoin, bobo da iŋai bo kiinakini apolou ŋin?”

³Koboŋok ebe, “Eoŋ da keŋisi yes akirot adiopet; kolimokis;

⁴aibatis naka Yokana kebuni kereka kotoma akuj arai bo kotuŋa?”

⁵Kiŋitanakinos bonik ka bonik, kobalas ebe, “Arai kiitema ebe ‘Kebuni kotoma akuj’, etemari ŋesi atiar, ‘Aso kanukinyo mam kiyuuniata ŋes?’

⁶Konye arai kiitema ebe, ‘Kebuni kotuŋa’ kibiribirete oni ituŋa kamor; naarai acamunito ebe kerai Yokana enabi.”

⁷Koboŋokis ebe mam kejenete nekebunio.

⁸Kotema Yesu kes atiar, “Eoŋ da mam kalimokini yes apolou nakeswamaa nu.”

⁹ Kogeu alimokin ituŋa awaragan na ebe, “Abu etuŋanan kira amana naka emusabibu, kititiŋ ikakoriok, kolot akwap ace kiboioror apak naeoj,

¹⁰ Kapak naka aidweny kiyakia ebulesit mama ejaas ikakoriok, tetere einakinete araito nuka emusabibu; konye kibuŋata ikakoriok ŋol, kireŋeasi titai.

¹¹Kiyakia ebulesit ece: kibuŋata ŋol da, kisuruma ileic, kireŋeasi titai.

¹²Kiyakia lokiwuniet da: kimusuŋata ŋol da, kocakasi kiŋa,

¹³Kobala ejakait loka amana naka emusabibu ebe, ‘Ekonakini ai? Ejukari okokuka lominat: elemuni eyoŋete ŋes.’

¹⁴Konye nakeanyuniata ikakoriok, kinerut bonik ka bonik, kobalas ebe, ‘Lo ŋes lokeruman: aso kaarata ŋes, tetere eraun airum nawok.’

¹⁵Kocakasi kiŋa kamana naka emusabibu, koarata. Aso ikonakini kes ai ejakait loka amana naka emusabibu?

¹⁶Ebuni emudiari ikakoriok ŋul, einakini ice amana naka emusabibu.” Nakiirariata ŋun, kobalas ebe, “Madi akuj!”

¹⁷ Konye kosesen kes, kotema atiar, “Anyoin apolou naka akirot kana naiwadikatai ebe, ‘Amoru nakeŋerete ikadukok, ŋin ŋes keponi kitaraunai amoru nakapolon naka agor?’

¹⁸ Ŋinituŋanan yenibirokini kuju amoru ŋin ebilibiliun; konye ŋin yenibirokin amoru ipicipicari ŋes cut.”

¹⁹ Apotu ikewadikak ka isasedotin lupeti komooto aikamun ŋes kosawa kaŋol, konye kokuriaka ituŋa; naarai apotu kojenut ebe inerakinit kes awaragan ŋin.

²⁰ Kiteikinitoi, kijukasi ikarotak, lukijoseete araut lukabeit, tetere ikamunete ŋes kakiroke, kosodete aijaikin ŋes mama ejai ayait ka apolou naka ekayaiton.

²¹Kiŋita kobalas ebe, “Ekesisianakinan, kijeni ebe inera, isisianakini da nukabeit, kwabo mam isei ituŋa, konye isisianakini erot loka Edeke kotoma abeit.

²²Ibus kereka sio ainakin Kaisar esolo, arai bo mam?”

²³Konye kojeni akecepirianut, kotema kes atiar,

²⁴“Kitodikinai adenarit. Nakaŋai aput na, ka nuiwadikatai?” Koboŋokis ebe, “Nuka Kaisar.”

²⁵Kotema kes atiar, “Aso kotacakis Kaisar nueraas nuka Kaisar, ka Edeke da nueraas nuka Edeke.”

²⁶Ido mam apedorete aikamun ŋes kakiroke kakonyen nuka ituŋa; koumokis akeboŋokin koŋatakis.

²⁷ Kopotu ice koSadukayon mamakeŋ, luebalas ebe emamei ajarun, kiŋita ŋes ebe,

²⁸ “Ekesisianakinan, abu Musa kiwadikak sio ebe, arai ketwana onace ketuŋanan, loemanyit, komamei ikoku, ibusakinit onaceke ayaŋaar aberu, kodumak onaceke aur.

²⁹Aso kejaas iinacan ikanykaarei: komany losodit aberu, kotwana komamei ikoku;

³⁰ka lokiareit da,

³¹Koyaŋa Iokiwuniet da; ka ice da kere ikanykaarei, kotwaka komam inyeinito idwe.

³²Kawasia kotwana aberu da,

³³Aso kotoma ajarun eraun ŋin aberu nakaŋai? Naarai kemanyito ikanykaarei kere.”

³⁴Kotema Yesu kes atiar, “Emanyete odwe luka akwapin kanu, emanyario da;

³⁵konye ŋul luimaritai araut luibusakinito adolokin akwap ya ka ajarun kokatwak, mam emanyete, karaida amanyio.

³⁶ Naarai mam epedorete atwakare bobo: naarai eriakakinos ka imalaikan; kes da eraas idwe luka Edeke, kanu eraatar idwe luka ajarun.

³⁷ Konye ebe itajarunio lukatwak, abu Musa da kitodik, kotoma owai loka Ekiyot, nakelimoria Ejakait araut Edeke loka Aburaam, ka Edeke loka Isaak, ka Edeke loka Yakob da.

³⁸ Mam ŋes erai Edeke loka lukatwak, dimarai loka lukajarak; naarai ejarete kere kamakeŋ,”

³⁹Koboŋokis ikewadikak ice, kotemasi atiar, “Ekesisianakinan, iner ejok.”

⁴⁰Naarai mam bobo etitiŋikino aiŋit akirot.

⁴¹ Kotema kes atiar, “Biai bo ebalatatar ituŋa ebe erai Kristo okoku loka Daudi?

⁴² Naarai Daudi elopet inera koitabo loka Isabulin ebe, ‘Abu Ejakait kotema Ekajakait atiar, Kiboikin akanika nakoteten.

⁴³Aitodol neebwaikinia lukasurupokon araut iicoloŋ yenika akejekon.’

⁴⁴Aso enyarit Daudi ŋes Ejakait, kikonakini bo ai erai ikekoku?”

⁴⁵ Kopupete ituŋa kere, elimokini ikekesisiak ebe,

⁴⁶“Kocoito ikewadikak, luekotos alosit konapitos ikason Iueojak, kominasi aiyogao kagwelanareta, ka aiboikin aiboisio nukokuju katukosia, ka iicoloŋo lukapolou kopucin;

⁴⁷ecamete itogoi luka apuserun, kanuka ejose da ilipete ailipasia nueojak; edumunete ŋul atubokinio naitelekarit.”