Read Ateso Luka 21 Bible Online

Luka 21 - Ateso bible

Luka 21

¹ Kikeu akekonyen, koany ikabarak icakanakinete ainakinetakec toma aiŋadis,

²Koany apuserut adiopet nakican ecakakini ikapun iarei.

³ Kotema atiar, “Abeit katemari yes atiar, acakaki apuserut ŋin nakican luipu adepar ice kere:

⁴Naarai acakanakis ŋul kere kotoma luebarara, konye ŋin kotoma ocanike acakaki lukejaatar kere.”

⁵ Nakineratar ice nuka eyekalu, kwape kitubusitere kamor nuejok ka ainakineta, kotema atiar,

⁶ “Ŋun nuisesenete, epote apaarasia numam esalakinia amoru adiopet kuju kanace namam etiyakinio.”

⁷Kiŋita ŋes ebe, “Ekesisianakinan, ejaunete bo ŋun wori? Anyoin da aanyunet naeapuuniata ŋun adolun?”

⁸ Kotema atiar, “Kocoito kinyein aitapaar yes; naarai epote luipu kokirorika, kobalas ebe, ‘Eoŋ ŋopeŋol!’ Ebe da, ‘Aapuu apak!’ Aso sirikitupasi ŋul.

⁹ Naiirariata rwaru nuka ijiisio ka iceleta, sirikikuriakaros, naarai ibusakinit ber ŋun ajaun, konye mam awasia edoluni atipet.”

¹⁰ Kosodi kotema kes atiar, “Enyoikini ateker asurokin ateker, ka ajakanut da asurokin ajakanut.

¹¹Ejaununete amaraneta nuepolok nuka akwap, ejaunun da ebeli, ka atular kaiboisio nuegelegela; ejaunete nuketasuro ka aanyuneta nukos abunore kotoma akui.

¹² Konye eriŋa ŋun edoluno, kikamunete yes, kireete, kijaikinete yes kakonyen nuka atukosia ka aidarisia, kiyaŋaario kakonyen nuka ikabakan ka ikayaitok kanuka ekakiror.

¹³Eraunete ŋun akajenak kamakus.

¹⁴ Aso kibwaikisi otauonokus ebe sirikiwomoomata ber nuiboŋokinete;

¹⁵ naarai kainakinete yes aituk ka acoa, numam lukasurupokus kere epedorete aitepeg karaida airebokin.

¹⁶Kijaikinete ikauriakakus, ka iinacanakus, ka lukatekerekus, ka ipaperokus, earete ice kayesi;

¹⁷ kiŋarunete yes ituŋa kere kanuka ekakiror.

¹⁸ Konye mam eoliori etimat ediopet loka akwesikus.

¹⁹ Kotoma atitiŋikinikus ikucaunete akusiijar.

²⁰“Konye naianyuniata irimorito ajoresio Yerusalem, aso kojenut ebe aapiki amudiarioke.

²¹Ŋes konyet ekeriata ŋul luejaas Yudaya oroŋan, kolomutu ŋul luejaas kotomake kiŋa, sirikelomasi ŋul luejaas amanat;

²² naarai eraas nu apaarasia nuka einyaŋane, tetere edolete kere nuiwadikatai.

²³ Itukwi kes nuepotiete, ka nuitanakete da kapaarasia kaŋun! Naarai ejaun ationus naepol toma akwap, ka anyunyura da asurokin ateker na.

²⁴ Eŋianakinere akwanis naka ekileŋ, ijoreorio toma atekerin kere; icakacakaete Imo Yerusalem, aitodol naedolioto apakio nuka Imo.

²⁵ Ejaunete moolo aanyuneta toma akoloŋ ka elap ka aacer, ido toma akwap aburun naka atekerin, nuebuonokinos kanuka agat naka aŋolol ka akailan;

²⁶ ipirisiaros itauon luka ituŋa kanuka akurian, ido kanuka aidaret akiro nueponikinito akwap: naarai itamaranio nukapedor nuka akuj.

²⁷ Kosodi konyet eanyunete Okoku loka etuŋanan ebuni kodou kapedor ka aibuses naepol.

²⁸ Konye naegeuniata ŋun atakanun, kikeutu akwesikus, kosesenata kuju, naarai aapu alakuniokus.”

²⁹ Kolimok kes awaragan ebe, “Koanyutu etini, ka icekito kere.

³⁰Apak naegeuniata ailib, ianyunete, ijenunete da kanukus ebe aaput apaarasia nuka aidweny,

³¹Aso do, yes da, naianyuniata akiro ŋun ketakanut, kojenutu ebe aapu ajakanut naka Edeke.

³²Abeit katemari yes atiar, Mam edaun atur na, aitodol naejaunotor akiro kere.

³³ Edaunos akuj ka akwapin; konye akakiro mam edaunos cut.

³⁴ “Konye kocoito yesi kinyek airaŋanut ka emeret ka aiyaloŋoŋ da naka aijar kana aisilaŋirir ikusitauon, konesakin apaaran ŋin kwape ipokia akuluma.

³⁵ Naarai edolokini ituŋa kere luejaas akwapin kere.

³⁶ Konye kokwenya apakio kere, kiŋaiŋaata tetere idumunete agogoŋ aiku kakiro ŋun kere nuedolokinete, ka aibwo da kakonyen nuka Okoku loka etuŋanan.”

³⁷ Kisisianakinenei ŋinipaaran koyekalu, konye kolosenenei apero kuare moru loenyaritai loka Iseitunin.

³⁸Kodilenenete ituŋa kere tupuruc sek alosit mama ejai oyekalu akiirar ŋes.