Read Ateso Luka 23 Bible Online

Luka 23 - Ateso bible

Luka 23

¹ Konyou atukot kere, koyaŋaasi Yesu mama ejai Pilato.

²Kogeutu aosan, kotemasi atiar, “Kianyu lo itapaari atekerekosi, ka aiteŋer ituŋa ainanakin Kaisar esolo, ebala ebe ŋes elopet erai Kristo ekabaka.”

³ Kiŋit Pilato ŋes ebe, “Irai kereka ijo ekabaka loka Iyudayan?” Koboŋok ebe, “Ijo ibala.”

⁴Kobala Pilato isasedotin lupeti ka ikodeta ebe, “Mam aanyunit akirot naerono kotuŋanan kalo.”

⁵Konye kiketakis kesi noi, kobalas ebe, “Isidiki ituŋa, isisianakini kotoma Yudaya kere, ameun koGalilaya kiton ne da.”

⁶Kiira Pilato ŋun, kiŋit arai erai etuŋanan ŋol Egalilayat.

⁷ Nakejenu ebe erai eyaitono loka Kerode, kijuka ŋes mama ejai Kerode, naarai kejai ŋesi da Yerusalem kapaarasia kaŋun.

⁸ Kosodi napekeanyu Kerode Yesu, kiyalamikin noi, naarai abu kokoto lem aanyun ŋes, naarai abu kiiranar akekiro, komuno aanyun aanyunet naiswamai.

⁹Kiŋiriŋit ŋes kakiro nuipu; konye ŋes mam eboŋokino amodiokirot.

¹⁰Kobwaata isasedotin lupeti ka ikewadikak, kiwosata ŋes kakiro nuipu.

¹¹Kosodete Kerode nepepe kikeserikalei kowena Yesu, koboliatar; kitanapata anapito naibus, kinyakas mama ejai Pilato.

¹²Kosodi kapaaran kaŋin kominunos do Kerode ka Pilato, naarai kekolosi lem.

¹³Kosodi kotukonok Pilato isasedotin lupeti ka ikayaitok ka ituŋa,

¹⁴kotema kes atiar, “Kiinut etuŋanan lo kwape loitapaari ituŋa, eoŋ da eŋitana ŋes kakonyenekus, ido koany, mam abu kaany amodiodiakaret kotoma akiro ŋun kere nuiwosatotor ŋes.

¹⁵Karaida Kerode, naarai enyaku ŋes mamawok. Aso koany, emamei akirot kere naeswamat naibusakinit atwania;

¹⁶kanuka ŋun alecori ŋes kasodi aosikin.” [

¹⁷Kibusakinit ŋes aosikin kes ediopet kopucit.]

¹⁸Konye kiworoto kere nepepe ebe, “Koyaŋa lo, koosik sio Baraba.”

¹⁹Kerai ŋesi etuŋanan lokeenitai kanuka aipaliikin kotoma ore, ka aiar da,

²⁰Kosodi kiner Pilato kakes bobo, kokoto aosikin Yesu;

²¹konye kiworoto ebe, “Kibubuk, kibubuk baa!”

²²Kolimok irwan nakiwuniet ebe, “Kanukinyo, naanyoin aronis naeswamat lo? Mam aanyunit kamakeŋ adiokirot naibusakinit atwania; kanuka ŋun alecori ŋes kasodi aosikin.”

²³Konye kes kiketakis, kilipa kiporotoi luepolok ebe ibusakinit ŋes aibubukinio. Kipikosi iporotoikec.

²⁴Kotub Pilato kwape eŋaiŋaitotor.

²⁵Koosik etuŋanan lokeenitai kanuka aipaliikin ka aiar, lokilipete; konye koinak Yesu aiswamakinio kwape kekototor.

²⁶ Nakeyaŋariata ŋes, kikamut Simon loka Kurene, lokebuni kamanat, kisirioŋa emusalaba, arionit atupitor Yesu,

²⁷Kotupite ekodet loepol loka ituŋa, ka aŋor da nukedipidipeete atorobusio ibworosi ŋes.

²⁸Konye kibelokin Yesu kobala ebe, “Yes apesur nuko Yerusalem, sirikiimonyata eoŋ, konye komonya akulepek, ka ikusidwe.

²⁹ Naarai koany, epote apaarasia nuetemariata atiar, ‘Isirereŋitoi arakanin, ka aliligeta numam eurito, ka ikisin da lumam itanakito!’

³⁰ Kanen egeunete kesi alimokin iroŋan ebe, ‘Kibirunos mamakosi’; ka iukon da ebe, ‘Koraparai’.

³¹ Naarai arai kiswamata nu kokitoi loepalal, ikonakinete bo do ai kaloeonit?”

³²Koyaŋaasi ice da iarei, ikeswamak nueroko, aario nenipe kaŋes.

³³ Nakedolioto aibois naenyaritai Abelekek naka Akou, kibubukis ŋes nen, ka kwi ikeswamak nueroko, ediopet akanike nakoteten, ka ediopet da akanike nakokediany.

³⁴ Kotema Yesu atiar, “Papa, kisioni kes; naarai mam ejenete nuiswamaete.” Kokorokorata ikenapen kailamilam eroet.

³⁵ Kobwoete ituŋa esesenete; konye ikayaitok koinyanakinete kobalas ebe, “Etajari lem ice; kitajarun ŋes elopet, arai erai kito Kristo loka Edeke, Loseunake!”

³⁶ Kokienatar iserikalei da, koloto koinutu ŋes ebino loedwar ria;

³⁷kobalas ebe, “Arai irai cani Ekabaka loka lyudayan, kitajarun jo elopet!”

³⁸Kujuke da kojai aiwadikaet ebe, “LO ŊES EKABAKA LOKA IYUAYAN.”

³⁹Ediopet ka ikeswamak nueroko lukikajakinitai koluik ŋes kobala ebe, “Mere ijo Kristo? Kitajarun bon ka sio da!”

⁴⁰Koboŋok loce kitoron ebe, “Mam jo iyoŋit Edeke, naarai ijai ijo toma atubokinio napena?

⁴¹Erai na nakabeit kamawok; naarai kitacakinio nukibusakinito kanuka aswamisiowok; konye lo mam iswamat adiokirot naerono.”

⁴² Kotema atiar, “Wu Yesu, kiitunoi eoŋ nailomaria toma ajakanutukon.”

⁴³Kotema ŋes atiar, “Abeit katemari jo atiar, lolo ijaun nepepe keoŋ Paradais[2].”

⁴⁴ Kedol bala esawa lokikanyetekape, komutonor akwap kere kiton osawa lokikanyetekaoŋon.

⁴⁵ Komamu aica naka akoloŋ; kocila aigalisit naka aibois nakalaunan kaarei.

⁴⁶ Kodelo Yesu keporoto loepol ebe, “Wu Papa, ebwaikini ekamoyo akaninikon.” Kedau einer ŋun, kiridak.

⁴⁷Keanyu ekapolokiton nuadoikis, kitur Edeke, kobala ebe, “Abeit kerai etuŋanan lo loedolit.”

⁴⁸Ikodeta da kere luatukokina aanyun ŋun, keanyutu nuadoikis, koboŋosi ore edipidipeete atorobusio.

⁴⁹ Kere da lukejenete ŋes, ka aŋor nuketupito ŋes anyoun koGalilaya, kobwoete kama elwanikina, esesenete akiro ŋun.

⁵⁰ Ido koany, kojai etuŋanan ekekiror Yosep, lokerai lokaurianet, etuŋanan loejok loedolit da.

⁵¹ (Mam ŋes acamunit ainerunikec ka aswamisioitikec da.) Kerai ŋesi loka Arimataya, ere ediopet loka Iyudayan, edaret ŋesi ajakanut naka Edeke.

⁵²Kolot ŋol mama ejai Pilato, kilip akuan naka Yesu.

⁵³Kolacu, konunukik ogoe loka ebaputa, kiperik ates nakikeitoi atiiba, namam lem kiperikinitoi idiotuŋanan.

⁵⁴Kerai apaaran naka Aitemonokin, koapie asabato ageun.

⁵⁵Kotupito aŋor nukepote kaŋes koGalilaya, koanyutu ates, ka epone lokiperikinere akekuan.

⁵⁶ Koboŋosi kitemonokis lueuru maa ka akinyet.