Read Ateso Luka 7 Bible Online

Luka 7 - Ateso bible

Luka 7

¹ Nakedaunia akekiro kere kopupete ituŋa, koloma Kaparanaum.

² Kejai ekapolokiton-erioŋet ekebulesit lokemina noi, lokedeka eapikinit airidakin,

³Nakiiraria ŋol eemut loka Yesu, kiyakia imakio luka Iyudayan ailip ŋes abunore aitaŋaleun ekebulesit.

⁴Nakedolioto kesi mama ejai Yesu, kiŋaiŋaata noi, kobalas ebe, “Ibus ŋesi, kiswamaki nu:

⁵naarai emin awokoteker, kidukok sio akositukos.”

⁶Kouparos Yesu kakes, Nakeapikinia etogoke, kiyakik ekapolokiton ikepapero kotema atiar, “Ejakait, sirikitaar: naarai mam eoŋ kebusakinit jo alomun kwap kekaswi.

⁷Ŋes mam aomitor aibusakin abunore mamakon: konye kolim akirot bon, eŋaleuni ekatelepat.

⁸Naarai eoŋ da arai etuŋanan lokayaitai, ejaas iserikalei luayait eoŋ: ido alimokini ediopet ebe, ‘Kolot’, elosi; ece da ebe, ‘Bia,’ ebuni; ekabulesit da ebe, ‘Kiswama na,’ ido iswamai.”

⁹Nakiiraria Yesu akiro ŋun, koumok kanukeŋ, kibelokin kolimok ekodet loketupit ŋes ebe, “Katemari yes atiar, Mam lem adumunit aiyuun naepol naetia na, karaida toma Isirael kere.”

¹⁰Nakeboŋoriata lueyakunitai ore, kodumut ebulesit keŋaleu.

¹¹Kosodi kanen ketubor apak naedit kolot ore loenyaritai Nain, koupas ikekesisiak kaŋes ka ekodet loepol.

¹² Nakeapiaria orute loka ere, koany, kibwokunitai lokatwan kiŋa, lokerai loteluna, totoke da kerai apuserut: kejaas ituŋa luipu lukore nenipe kaŋes.

¹³Nakeanyunia Ejakait ŋin kitim, kotema ŋes atiar, “Sirikimony.”

¹⁴Kikunyak kotiro ekirigi lokibwokitere, kobwout lukibwokito. Kotema atiar, “Etelepat, katemari jo atiar, Konyou.”

¹⁵ Kiboikin lokatwan kogeu einer. Koinak ŋes totoke.

¹⁶ Kokuriakaros kere; kitopoloosi Edeke, kobalas ebe, “Atakanu cama enabi lokapolon kamawok!” ebe da, “Aanyana Edeke iketuŋol”

¹⁷Kisiarakinos akiro ŋun toma Yudaya kere, ka akwap kere naidunyatar.

¹⁸ Apotu ikesisiak luka Yokana kolimokis ŋes akiro ŋun kere.

¹⁹ Kenyarau Yokana iarei kokesisiakake kiyakia mama ejai Ejakait, iŋisit ebe, “Irai kereka ijo ŋol loebunit, arai bo kedarata ece?”

²⁰Nakedolioto ituŋa mamakeŋ, kobalas ebe, “Kijukunit Yokana Lokebatisan sio mamakon iŋisit ebe, ‘Irai kereka ijo ŋol Iocbunit, arai bo kedarata ece?’ ”

²¹Kosawa kaŋol kitaŋaleu luipu akecedekesia, ka ican ka imoyon lueroko; koinak imudukiok luipu aanyun.

²² Koboŋok kotema kes atiar, “Koloto, kolimokis Yokana ŋun nuianyut ka nuiirarito da; ekwenyunete imudukiok, elosete iŋwalasik, iswagio lukatapon, epupete ikimiŋiok, itajario lukatwak, elimonokinio da lukican akiro nukajokak.

²³Isirereŋitoi da ŋol lomam itiguikin kanukaŋ.”

²⁴Kosodi kedaut ikiyakia luka Yokana alosit, kogeu alimokin ikodeta nuka Yokana ebe, “Kilomarete alosit amodiŋ aanyun inyo? Egada lokijaŋijaŋ! ekwam?

²⁵Konye bo kilomarete asesen inyo? Etuŋanan lokenapit anapito naanebek? Koany, luisiritoi kaluibusak, luenyamete da luetaitaete, ejaas toma alaroi nuka ikabakan.

²⁶ Konye kilomarete asesen inyo? Enabi? Eebo, katemari yes atiar, loitelekarit enabi.

²⁷ Ŋol ŋes iwadikatere nu ebe, ‘Koany, ejukari ekakiyakia kakonyenekon, Loitemonokini ekonirot kakonyenekon.’

²⁸ Katemari yes atiar, Kotoma lukeuriete aŋor emamei yenepol aitelekarit Yokana: konye loedit kotoma ajakanut naka Edeke ŋes epol aitelekarit ŋes.”

²⁹ (Nakiirariata ituŋa kere, ka iketelemak esolo da, kitogogoŋoto adolit naka Edeke, naarai kibatisauna kaibatisa naka Yokana.

³⁰ Konye koŋeroto Iparisayon ka iricakisila ainerun naka Edeke, naarai mam apotu kibatisaunos kamakeŋ.)

³¹“Aso do etupusi kinyo ituŋa luka atur kana, eputosi kesi kinyo?

³²Eputosi kidwe luiboiete kagwelanaret, konyaras, kobalas ebe, ‘Kikut alamarun, mam yes esoma; Kibwolol, mam yes emonya.’

³³ Naarai kobu Yokana Lokebatisan komam enyami karaida aimat ebino; ibalasi yesi ebe, ‘Ejai ajokit’.

³⁴Kobu Okoku loka etuŋanan enyami emasi da; ibalasi yesi ebe, ‘Koany, ekeraŋat lo, ekameran da, epapero loka iketelemak esolo ka ikadiakanarak!’

³⁵Konye ikedwe kere kes itojokere Acoa.”

³⁶ Kosodi konyara ediopet koParisayon Yesu aimor kaŋes. Koloma togo loka Eparisayot, kiboikin ainyam.

³⁷ Ido koany, kepupu aberu nakore kaŋol, nakerai nakadiakanaran ebe eboikin togo loka Eparisayot ainyam, koyau ekube loka akinyet;

³⁸ kobwo kokauke koapie kakejeke, emonyi, kogeu aitodoonokin akiyo akejeke, koninana kitima luka akouke, konu akejeke, kinyonyoanak akinyet.

³⁹Keanyu Eparisayot lokenyararit, kotema kotauke atiar, “Arai kerai etuŋanan lo enabi, tikejenu aberu ŋin erai iŋai, ido nakepone enyoin, naetironori ŋes, naarai erai nakadiakanaran.”

⁴⁰Koboŋok Yesu kotema atiar, “Simon, ejai akirot naakoto alimokin jo.” Kotema atiar, “Aso, Ekesisianakinan, kiner.”

⁴¹Kotema atiar, “Kejaas etuŋanan kalukapesen iarei; kiburai ediopet adenarin akwat akany, lokiareit da akaisakany.

⁴²Amameete kes nutacet, abu kitim kes kere iarei. Kotoma kes luarei, iŋai bo eminuni ŋes aitelekarit?”

⁴³Koboŋok Simon ebe, “Aomit ebe je lokisionio nuipu.” Kotema ŋes atiar, “Itub kotenan.”

⁴⁴ Kibelokin mama ejai aberu kotema ŋesi Simon atiar, “Iany ijo aberu na? Alom eoŋ togokon, mam jo einakina akipi nuka akejeka, konye na etodoonoki akiyo akejeka ka anina da kitimake.

⁴⁵ Mam jo ibu konu eoŋ, konye ameun napenan alomunia mam na inyeina ainu noi akakeje.

⁴⁶Mam jo ibu kinyonyo akinyet akouka, konye na enyonyo akinyet akejeka,

⁴⁷Kanuka ŋun katemari jo atiar, Isionio akediakanareta nuipu, naarai epol akemin; konye yenisionio nuikidioko, edit akemin.”

⁴⁸ Kotema ŋesi ŋin atiar, “Esionii akonidiakanareta.”

⁴⁹Kosodete kogeutu lukemorete kaŋes atemanar atiar, “Iŋai ca lo, loisioniei adiakanareta?”

⁵⁰ Kotema ŋesi aberu atiar, “Kitajar jo akoniiyuun; kolot inapakina.”