Read Ateso Luka 9 Bible Online

Luka 9 - Ateso bible

Luka 9

¹ Konyarau lutomon ka luarei nepepe, koinak apedor ka apolou kama ejaas ajokin kere, ka aitaŋaleun adekesia.

²Kiyakia kes alimonokin ajakanut naka Edeke, ka aitaŋaleun da lukadekak.

³ Kotema kes atiar, “Sirikiyaŋaasi ibore kere yenikerot, karaida ebela, karaida ecoe, karaida inyamat, karaida apesan, karaida ajaut kikason iarei.

⁴ Kaŋolitogo loilomanarete, kosalenenete nen, aitodol nainyounioto alosit.

⁵ Ŋul lumam kisukunyikinete yes, nainyounioto kotoma ore kaŋol, kilakilakenenete adae nuka akejenekus araut akajenak kamakec.”

⁶Koloto kesi, kiriamas ireria, elimonokinete Akiro Nukajokak, ka aitaŋaleun da kaŋiniibois.

⁷ Kosodi kiira ekabaka Kerode nukiswamao kere; kiyaloŋoŋ noi, naarai kebalas ituŋa ice ebe, ajaru Yokana kotoma okatwak;

⁸ka ice da ebe, “Atakanu Eliya”; ka ice da ebe, “Ajaru ediopet kotoma onabin lukolo sek.”

⁹ Kobala Kerode ebe, “Abu kajepa akou naka Yokana; konye iŋai bo lo loapupi eoŋ akiro nuetia nen?” Kokoto aanyun ŋes.

¹⁰ Kosodi keboŋut ikiyakia kitejenut Yesu akiro kere nuapotu kiswamata, Koyaŋa kes, kogita kiton ore loenyaritai Betesaida.

¹¹Konye nakejenuniata ikodeta kotupasi ŋes; kisukunyik kes kaiyalama kolimok kes nuka ajakanut naka Edeke, kitaŋaleu da lukipudas aitaŋaleunio,

¹²Kejotaki akoloŋ; kopotu lutomon kaarei mama ejai, kotemasi atiar, “Kotwar ekodet, tetere elosete toma oreria ka amanat da nuidunyatar, kodumutu neeperete ka inyamat da; naarai kijaa ne amodiŋ.”

¹³Konye kotema kes atiar, “Koinakisi yesi kes lunyaman.” Kotemasi atiar, “Emamei sio ibore yenedeparit imugatin ikany ka agaria aarei; arai mam kilosit agwelakin etuŋat lo kere inyamat.”

¹⁴Naarai emwaasi ikiliok bala ilukumin ikany. Kotema ikekesisiak atiar, “Kisiboikis kes katukon bala akaisakany ŋinitukot.”

¹⁵Kiswamata kwaŋin, kisiboikis kes kere.

¹⁶Kolem imugatin lukany, ka agaria aarei, kosesen akuj, kisirereŋ kes, kobilibil; koinak ikesisiak akoranakin ekodet.

¹⁷ Konyama, kimonikinos kere; kotukonokinai atutubeta nuabilibila nukesalete, iditai itomon ka luarei.

¹⁸ Kosodi kanen, napilipi ŋesi kogitara, kojaas ikekesisiak nenipe kaŋes: kiŋit kes ebe, “Ebalas ikodeta ebe arai eoŋ iŋai?”

¹⁹ Koboŋokis ebe, “Yokana Lokebatisan; konye ice Eliya; ice da ebe ajaru ediopet konabin lukolo sek.”

²⁰ Kotema kes atiar, “Ido bo yes kibalas ebe arai eoŋ iŋai?” Koboŋok Petero ebe, “Ijoŋ Kristo loka Edeke.”

²¹Konye kicor kes, kisimik alimokin idiotuŋanan akirot ŋin.

²² Kobala ebe, “Ibusakinit Okoku loka etuŋanan aiticanio nuipu, egirete da imakio ka isasedotin lupeti ka ikewadikak, ka aiar, kapaaran da nakiwuniet ejaruni.”

²³ Kolimok kes kere ebe, “Arai ekoto ituŋanan aitup eoŋ, koŋerokin ilopet, korioŋ ekemusalaba ŋinipaaran, katup eoŋ.

²⁴ Naarai ŋin yenekoto aitajar akeijar etwaniari; konye ŋin yenetwaniari akeijar kanukaŋ, itajari ŋes,

²⁵Naarai ajokis anyoin arai kedumu ituŋanan akwapin kere, kitoolio arai kotwania akeijar?

²⁶ Naarai yenirumete ileic kanukaŋ, kanuka akakiro da, irumete ileic Okoku loka etuŋanan da kanukeŋ, naebunio kaibusesuke, ka naka Papa, ka naka imalaikan da lukalaunak.

²⁷Konye abeit katemari yes atiar, Ejaas ice kaluebwoete kane lumam iirete cut atwanare aitodol neaanyuniata ajakanut naka Edeke.”

²⁸ Kosodi kanen akaulo kakiro kaŋun bala apaarasia akanykauni, koyaŋa Petero ka Yokana ka Yakobo, kodoka oroŋat ailip.

²⁹Napilipi, kogelakin epone loke ereeteke, kiliacanata ikenapen komwekimwekete,

³⁰Ido koany, kineras ituŋa iarei kaŋes, lukeraas Musa ka Eliya;

³¹ luketakanete kaibuses, kineras akiro nuka atwanareke naelosi ŋesi aitodolikin koYerusalem.

³² Kilurunito Petero ka lukejaas kaŋes ajo; konye nakekwenyuniata koanyutu aibusesuke, ka kwi da iarei lukebwoete kaŋes,

³³Kosodi kanen, napetiakas kaŋes, kotema Petero Yesu atiar, “Ekapolon, ejok oni ajaut ne; aso keswamata iswamin iuni; ediopet lokon, ediopet loka Musa, ka ediopet da loka Eliya.” Komam ejeni nukinera.

³⁴Napinera ŋesi ŋun, kobu edou, kiteribo kes; kokuriakaros nakelomariata odou.

³⁵ Kolom eporoto kotoma odou, kobala ebe, “Lo ŋes Okokuka, loseunaka; kiirasi ŋes.”

³⁶Napinera eporoto ŋol, kotakan Yesu bon. Kililiŋata kesi, komam elimokinete idiotuŋanan kapaarasia kaŋun adiokirot kanuaanyut.

³⁷ Kosodi kanen apaaran naatupakini nakedokuniata koroŋat, kiriamunos kekodet loepol.

³⁸Ido koany, kiworo etuŋanan kotoma okodet ebe, “Ekesisianakinan, keŋaiŋait, koany ikakoku; naarai erai ikateluna;

³⁹Ido koany, ikamununei ajokit ŋes, atipet isilalai; bobo da kisiilio, kokui ekuetete, mam inyeini dimarai kationis, idecideci ŋes,

⁴⁰eŋaiŋa ikonikesisiak aireŋear ŋes, konye mam epedoro.”

⁴¹Koboŋok Yesu kotema atiar, “Wu okwe yes atur namam iyuunit, naepaarit, etodoli eoŋ ai ajaut kayes, ka atitiŋikinit da yes? Koyau ma ikonikoku ne.”

⁴² Napebuni kibirok ajokit kwap, kisiilio. Kiretak Yesu ajokit naerono, kitaŋaleu isapat kinyakak papake.

⁴³Koumokis kere apolou naka Edeke. Konye napeumokinitos kere akiro kere nueswamai, kotema ŋesi ikekesisiak atiar,

⁴⁴ “Kitolomasi akiro nu akiikus; naarai einakinio Okoku loka etuŋanan akanin nuka ituŋa.”

⁴⁵ Konye mam kes apotu kojenut akirot ŋin, kimunonitai kamakec, kinyeis amisiikin; koyoŋata aiŋit apolou naka akirot kaŋin.

⁴⁶ Kogeut epeget kotomakec ebe iŋai bo kakesi eraun lokapolon.

⁴⁷Konye kejen Yesu epeget loka itauonokec, koyau ikoku yenididi, kisibwo kodieke,

⁴⁸ kotema kes atiar, “Ŋin yenisukunyikini ikoku yen kokirorika kesukunyikinit eoŋ, ŋin da yenikesukunyikini eoŋ, isukunyikinit ŋol lokejukuni; naarai loerai loedit kokidiŋikus kere, ŋol ŋes erai lokapolon.”

⁴⁹Koboŋok Yokana kotema atiar, “Ekapolon, kipou kaanyutu etuŋanan ireŋeari ajokin kokirorikon, kesimika ŋes, naarai mam kiupa kaoni.”

⁵⁰ Konye Yesu kotema ŋes atiar, “Sirikisimika; naarai ŋol lomam erai lokasurupikus, erai lokowaikus.”

⁵¹ Kosodi kanen, keapuut apaarasiake nuka aitodokario, kitogogoŋ akonyeneke alosit Yerusalem.

⁵² Kijuka ikiyakia aliŋakin ŋes, koloto kolomasi ore loka Isamarian tetere itemokinete kanukeŋ;

⁵³ konye mam kes apotu kisukunyikis, naarai atereit akekonyen aibe Yerusalem.

⁵⁴ Keanyut ikekesisiak Yakob ka Yokana ŋun, kobalas ebe, “Ejakait, ikoto kecorakis akim kodoku kokuju komudia kes [kwape kolo eswamaa Eliya]?”

⁵⁵Konye kibelokin, kitoron kes, [kotema atiar, “Mam ijenete epone loka emoyo loejai kayes. Naarai mam abunit Okoku loka etuŋanan amudiar aijar naka ituŋa, dimarai aitajar.”]

⁵⁶Koloto ore ece.

⁵⁷ Napelosete kesi korot, kotema etuŋanan atiar, “Katupenenei jo kama ilosi kere.”

⁵⁸Kotema Yesu ŋes atiar, “Ejaas ikuwei apanya, akweny da nuka apak ejaas akaisikec; konye Okoku loka etuŋanan emamei nama iperikini akekou.”

⁵⁹Kotema ŋesi ece atiar, “Kotupunai.” Konye kobala ebe, “Ejakait, kisiikinai ber kalot keda papaka.”

⁶⁰Konye kotema ŋes atiar, “Kinye lukatwak kidaata lukarwakakec; konye jo, kolot kolimono ajakanut naka Edeke.”

⁶¹ Kobala ece da ebe, “Ejakait, katupenenei jo; konye kisiikinai ber katwar ituŋa lukokaleka.”

⁶²Konye Yesu kotema ŋes atiar, “Emamei yenetiŋit emeleku lokimoŋin, kosesen kau, yenibusakinit ajakanut naka Edeke.”