Read Ateso Ikisila 14 Bible Online

Ikisila 14 - Ateso bible

Ikisila 14

¹ “Iraas yesi idwe luka EJAKAIT Ekusideke: sirikigera akusiwat, karaida abaren ereet kanuka lukatwak.

² Naarai iraas yesi ituŋa lukalaunak kaneejai EJAKAIT Ekusideke, kiseu EJAKAIT yes araut ituŋake obe, kotuŋa kere luejaas akwap.

³ “Sirinyamenenei ibore kere yeniketal.

⁴ Lu kes itiaŋ luinyamete: emoŋ, ka amerekek, ka akinei.

⁵Amiam, ka amori, ka emalet, ka akinei naka ais, ka eloba, ka ekal, ka ecilil.

⁶Ka ŋinitiaŋ kere yenetiakak emagegeret, ka yenimwaasi atutubeta aarei nuka emagegeret, yeninyogonokini anyak ikenyamat, kotiaŋ, inyamete ŋin.

⁷Konye mam inyamete lu kotiaŋ luinyogonokinete anyak ikecenyamat, arai kaŋul luimwaasi atutubeta aarei nuka emagegeret: akaala, ka ipoo, ka enyuru, naarai inyogonokinete anyak ikecenyamat, konye mam imagegerekec etiakak, eraas lumam elaete kamakus.

⁸Ka epege, naarai etiakak emagegereteke konye mam inyogonokini anyak ikenyamat, erai lomam elai kamakus: sirikinyama akecekiriŋ, sirikitirosi da akecewat nukatwak.

⁹“Inyamete lu koboro kere luejaas akipi: inyamete ŋin yenejaas isigigirio ka aabel:

¹⁰Sirikinyama ŋin yenemameete isigigirio ka aabel; erai yenimam elai kamakus.

¹¹“Inyamete akweny kere nuelaete.

¹² Konye lu kes lumam inyamete: emorukaalet, ka ekokom, ka ogaria;

¹³Ekulukulu, ka egole, ka etoori koponeke;

¹⁴Ka ŋolikuruk koponeke;

¹⁵Ka ekuulu, ka etoori loka akuare, ka eroagol, ka ecur koponeke.

¹⁶Ekoloroc, ka etukuri loepol, ka etukuri loesubit bala ejaas amumwara;

¹⁷Erere, ka atarukot, ka etotoet;

¹⁸Etolut, ka egoro koponeke, ka aoŋor, ka emenia.

¹⁹Iboro kere lueliatos luejaas abebenoka eraas lumam elaete kamakus: mam enyamenenoo.

²⁰Ipedorete ainyam akweny kere nuelaete.

²¹ “Sirinyamenenete ibore yenetwani bon kanuke: ipedori ainakin emoit loejai orekon, konyam; arai ipedori aitwegel lokacekwap: naarai iraas yesi ituŋa lukalaunak mama ejai EJAKAIT Ekusideke. “Siripoenenei ikalol kakile nuka totoke.

²² “Kodunyite alemanar idiopet kotomon yenika amiokon kere, naelomuni komanikor ŋolikaru.

²³ Inyamakini akonyen nuka EJAKAIT Ekusideke, kaibois naeseuni ŋesi aisiboikin ekekiror, idiopet kotomon yenika akimakon, ka ebinokon, ka akinyetekon, ka ikiyaik luka isipaninikon luka aituk ka amerekekin; tetere isisiauni ayoŋit EJAKAIT Ekonideke apaarasia kere.

²⁴ Arai elwana alosit kaneijai ijo, tape mam ipedori aibwok, naarai elwana aibois kamakon, naeseuni EJAKAIT Ekonideke aisiboikin ekekiror, nakisirereŋio EJAKAIT Ekonideke jo:

²⁵Ŋes konyet igwelaria ŋes apesan, kosodi ajen apesan, kitiŋ kakonikan, alosit aibois naeseuni EJAKAIT Ekonideke:

²⁶Igweli kapesan kaŋun yenipuda ekonitau, imoŋin, arai amerekekin, arai ebino, arai nuitemerete, arai yenekot ekonitau: inyamakini nen akonyen nuka EJAKAIT Ekonideke iyalamikin, ijo ka ekonikal:

²⁷ Mam ijali Elebit loejai orekon; naarai emamei ŋes akorakinet karaida airumet kajo.

²⁸ “Kosaŋe loka ŋulukar iuni, iyaŋaununei lukitomonet kere luka amiokon kokaru kaŋol, iŋadakini kes orekon:

²⁹ Elebit da, naarai emamei akorakinet karaida airumet kajo, ka emoit, ka ikoki, ka apuserut, luejaas orekon, epote ainyam kimonikinos; tetere kisirereŋi jo EJAKAIT Ekonideke kaswamisiokon kere nuiswamai.