Read Ateso Ikisila 16 Bible Online

Ikisila 16 - Ateso bible

Ikisila 16

¹ “Kidarenenei elap loka Abib, koricenenei da aleleŋ naka EJAKAIT Ekonideke: naarai kolap loka Abib ŋes kitolomunia jo EJAKAIT Ekonideke kakwap nako Misiri kuare.

² Iinakini lukosipanin luka aituk ka amerekekin araun asubanit naka aleleŋ naka EJAKAIT Ekonideke, kaibois naeseuni EJAKAIT aisiboikin ekekiror.

³ Sirinyamenenei imugatin luitubuunitoi kasubanit kaŋin; inyamenenei imugatin lumam itubuunitoi apaarasia akanykaarei, kes imugatin luka aiticanitoi; naarai ilomuni ijo kakwap nako Misiri komarani: tetere iituni apaaran nailomunia ijo kakwap nako Misiri apaarasia kere nuka akonikijar.

⁴ Mam edumakinio yenikitubuunet oikorunokon kere apaarasia akanykaarei; karaida aiteperoor akiriŋ kere naiinakini araut asubanit apaaran nasodit eboŋ, akuare kere kiton tupuruc.

⁵Sirikijaik asubanit naka aleleŋ koreriakon kere, lukiinakinit jo EJAKAIT Ekonideke:

⁶ Konye kaibois naeseuni EJAKAIT Ekonideke aisiboikin ekekiror, nen ijaikinia asubanit naka aleleŋ eboŋ, naelomaria akoloŋ, kapak nailomunia koMisiri.

⁷ Ipei inyami da kaibois naeseuni EJAKAIT Ekonideke: ibelokin tupuruc aboŋor owemanakon.

⁸ Inyamenenei imugatin lumam itubuunitoi apaarasia akanykape: kapaaran nakikanyetekaarei ejaun atukokinet nakayamakina mama ejai EJAKAIT Ekonideke; siriswamaenenei adioswam.

⁹ “Imaruni asabaton akanykaarei: ameun kapak naigeunia aisak akima ŋes igeunia aimar asabaton akanykaarei.

¹⁰ Idarenenei epucit loka asabaton mama ejai EJAKAIT Ekonideke, kwape ejaar aitemis naka ainakinet naka akot naka akonikan, nakiinakini, kwape kisirereŋitor EJAKAIT Ekonideke jo:

¹¹ Ilakanari kakonyen nuka EJAKAIT Ekonideke, ijo ka okokukon ka akokukon, ka ekejaanakinanikon, ka akejaanakinanikon, ka ikoki ka apuserut, luejaas mamakon, kaibois naeseuni EJAKAIT Ekonideke aisiboikin ekekiror.

¹² Iitununenei ebe irai kolo ebulesit koMisiri: koricenenei aitodol ikisila ŋul.

¹³ “Kidarenenei epucit loka iswamin apaarasia akanykaarei, kidau aiŋadanakin lukopejalikon ka lukacuesikon naka ebino:

¹⁴ Ilakanari kopucitikon, ijo ka okokukon, ka akokukon, ka ekejaanakinanikon, ka akejaanakinanikon, ka Elebit, ka imoit, ka ikoki ka apuserut, luejaas orekon.

¹⁵Idarenenei epucit mama ejai EJAKAIT Ekonideke apaarasia akanykaarei kaibois naeseuni EJAKAIT: naarai kisirereŋi jo EJAKAIT Ekonideke kamiokon kere, kaswamisiokon kere, ilakanari cut.

¹⁶“Etakanunete ikiliokokon kere kakonyen nuka EJAKAIT Ekonideke irwan auni ŋolikaru kaibois naeseuni ŋesi; kopucit loka imugatin lumam itubuunitoi, kopucit da loka asabaton, kopucit da loka iswamin: mam itakanunete kakonyen nuka EJAKAIT komam ibore:

¹⁷ Einakini ŋinituŋanan kwape epedoria, kwape kisirereŋitor EJAKAIT Ekonideke jo.

¹⁸“Koseu ikatubok ka ijaka koreriakon kere lukiinakinit jo EJAKAIT Ekonideke, kwape ejaatar atekerinikon: etubokinete kesi ituŋa ketube loedolit.

¹⁹ Sirikibelok etube; sirikitiak ituŋa; karaida ayaare ainakinet; naarai itumudaki ainakinet akonye nuka lukacoa, aitapaar akiro nuka ikadoliton.

²⁰ Itupenenei naedolit cut, tetere ijari, irumi akwap nakiinakinit jo EJAKAIT Ekonideke.

²¹ “Sirikiraik Asera naka ediopone kere loka ekitoi eiduny ketem loka EJAKAIT Ekonideke, loiswamauni ijo.

²² Karaida asipokin epir; loelait EJAKAIT Ekonideke.