Read Ateso Ikisila 19 Bible Online

Ikisila 19 - Ateso bible

Ikisila 19

¹ “Naemudiaria EJAKAIT Ekonideke atekerin, ikulepek akwap nakiinakinit jo EJAKAIT Ekonideke, kirum aiboisikec, kiboikin oreriakec ka otogoikec;

² itiakuni ireria iuni kokidiŋ kakwapukon nakiinakinit EJAKAIT Ekonideke airum.

³Itemokini erot, itiaki iikoruno luka akwapukon nakisurumi jo EJAKAIT Ekonideke kotoma atutubeta auni tetere ikaaran ekereari ŋina.

⁴“Na ŋes akirot naka ikaaran, yenekereari ŋina kojar: ŋin yenimam epeleikinit aiar eidunyeteke, komam lem sek elait ŋes;

⁵Kwape etuŋanan loelosi amagoro keidunyeteke aibet akito, kosodi aikeun aep ajepia ekitoi, koutor aep kakujup, kocam eidunyeteke, kotwana; ekereari ŋol ore ediopet kaŋul kojar;

⁶Kinyek ekenyaŋan aokot aidap ekaaran, eroko eketau enyunyura noi, kosodi adolokin ŋes, naarai elwana erot, ainom ŋes aiar; kwabo mam ebusakinit ŋesi atwanare, naarai mam abu kolaite ŋes lem sek.

⁷Kanuka ŋun, ŋes kecorakinitor ebe, Itiakuni ireria iuni.

⁸ Arai kitalal EJAKAIT Ekonideke eikorukon, kwape eyapoikinia lukapapaakon, ainakin jo akwap kere naabu kiyapoik ainakin lukapapaakon;

⁹ Arai kiric aicorakinet na kere aiswamaenen, nakecorakini jo lolo, aminenena EJAKAIT Ekonideke, alosenen duc korotinike; ŋes konyet iyatakinia ireria ice iuni, kogelara ŋul iuni:

¹⁰Tetere aokot numam akirot mam ebukorio kakwapukon, nakiinakinit jo EJAKAIT Ekonideke araun airumet, kosodete aokot abeikin jo.

¹¹ “Konye arai elait etuŋanan eidunyeteke, kosodi aperun ŋes, konyoik ŋes, kosodi ainom ŋes aiar; kokerea ore ediopet kaŋul:

¹²Ijukarete imakio luka ereke aomare ŋes, ijaikinete ŋes akan naka ekenyaŋan aokot, tetere eario.

¹³ Mam akonikoŋu itimi ŋes, konye ilemari aokot numam akirot koIsirael, tetere ijaun ejok.

¹⁴ “Sirikijul eikor loka eidunyetekon, loatubete lukolo sek, kotoma airumetekon nairumi, kakwap nakiinakinit jo EJAKAIT Ekonideke airum.

¹⁵ “Mam ekajenan ediopet enyoikini ituŋanan kanuka numam adolit, karaida kanuka adiakaret, kadiakaret kere naediakari: kakiro nuka ikajenak iarei arai kakiro nuka ikajenak iuni ŋes itogogoŋere akirot.

¹⁶ Arai kenyoiki ituŋanan ekajenan lomam edolit aitejenun adiakareteke;

¹⁷Ŋes do ebwoiata ituŋa ŋul iarei luepegas kakonyen nuka EJAKAIT, kakonyen da nuka isasedotin ka ikatubok luejaunos kapaarasia kaŋun;

¹⁸Eŋicete ikatubok kojokan; ido koany, arai erai ekajenan ekajenan loeŋalai, kitejenunite da nuka aiŋal kaneejai onaceke;

¹⁹ Ŋes konyet ikwaikiniata ŋes kwape aomitor ŋesi aikwaikin onaceke: ilemari kwaŋin aronis kamakon.

²⁰ Ido epupunete ŋul luesaleete, eyoŋete da, mam bobo iswamaete aronis ŋin kamakon.

²¹ Mam akonikoŋu itimi; egeli aijar aijar, akoŋu itia akoŋu, ekelai da itia ekelai, akan itia akan, akeju da itia akeju.