Read Ateso Ikisila 2 Bible Online

Ikisila 2 - Ateso bible

Ikisila 2

¹ “Kasodete aibelokin kaloto modiŋ korot loebei Aŋolol Nakareŋan, kwape kabalar EJAKAIT eoŋ: kerimosi emoru Seir apaarasia nuipu.

²Katema EJAKAIT eoŋ atiar,

³‘Irimosi eroŋat lo apaarasia nuipu: kibelokinos ari naka agolitomei.

⁴ Kicorak ijo ituŋa ebe, Itorete oikor loka ikusiinacan idwe luka Esau, luiboiete koSeir; kikuriakaros kesi yes: aso ca kocoito noi:

⁵ Sirikiŋolopata kakes; naarai mam kainakini yes akecekwap, mam karaida nepeicakakini etau loka akeju bon, naarai ainak Esau moru Seir airum.

⁶Igwelete inyamat lunyaman kapesan kamakec; igwelete da akipi numatan kapesan kamakec.

⁷Naarai kisirereŋit EJAKAIT Ekonideke jo kaswam kere naka akanikon; abu ŋesi kojenu alositekon kamodiŋ kana nakos: ajaenena EJAKAIT Ekonideke kajo ikar lu akaisaoŋon; amamei ibore yenibu kipuda.’

⁸ Kwaŋin katuboros kaneejaas iinacanawok idwe luka Esau, luiboiete koSeir, anyoun korot loka Araba, anyoun koElat, ka Esion-geber. “Kebelokinos ketoro orot loka amodiŋ naka Moab.

⁹ Katema EJAKAIT eoŋ atiar, ‘Sirikitunyunyurik Moab, karaida aitoŋolop kes kojie: naarai mam kainakini yes airum akekwap; naarai ainak idwe luka Lot airum Ar.’

¹⁰ (Apotu Iemim kiboioto kanen sek, ituŋa luapolok, kipu, koojak bala Inakaim:

¹¹Amaikinitai ŋul Irepaim, kwape Inakaim; konye enyarito Imoabin kes Iemim.

¹² Eboioto Ikorin da koSeir sek, konye kirumata idwe luka Esau aiboisikec; komudiasi kes kakonyenekec, kiboikinos aiboisikec; kwape eswamakinia Isirael akwap naka airumeteke, naainakini EJAKAIT kes.)

¹³‘Aso konyoutu do, kodokata aguurut Sered.’ Kipou kadokata aguurut Sered.

¹⁴ Apaarasia nukinyounio oni koKades-barunea, aitodol nakidokia aguurut Sered, emwaasi ikar akaisauni ka lukanykauni; aitodol naadaunor atur kere naka ituŋa lukajiok koidukurun, kwape eyapoikinitor EJAKAIT kes.

¹⁵ Bobo da aluikinit akan naka EJAKAIT kes, amudiar kes koidukurun, aitodol naadaunotor.

¹⁶“Kosodi kanen ketwaka ituŋa kere lukajiok, kodaunos da kotuŋa.

¹⁷Katema EJAKAIT eoŋ atiar,

¹⁸‘Itori ijo lolo Ar, oikor loka Moab:

¹⁹ Naikunyakinia neejaas idwe luka Amon, sirikitunyunyurik kes, karaida aitoŋolop: naarai mam kainakini jo airum akwap naka idwe luka Amon: naarai ainak idwe luka Lot airum ŋes.’

²⁰(Ŋin da emaikinitai akwap naka Irepaim: eboioto Irepaim kanen sek; konye enyarito Imorain kes Isamsumim;

²¹Ituŋa luapolok, kipu, koojak bala Inakaim; konye abu EJAKAIT komudia kes kakonyenekec: kirumata kesi, kiboikinos aiboisikec:

²² Kwape abu ŋesi kiswamakinia idwe luka Esau, luiboiete koSeir, naamudiaria Ikorin kakonyenekec; kirumata kesi, kiboikinos aiboisikec kiton lolo:

²³ Iabim da lueboiete koreria kiton Gasa, apotu Ikaputorim lualomunete koKaputor komudiasi kes, kiboikinos aiboisikec.)

²⁴ ‘Konyoutu, koloto, kitoroto aditot naka Arunon; koany, ainak Sikon Emorait, ekabaka loka Kesibon ka akwapuke akanikon: kogeutu airum ŋes, koŋolopata kitijioto ŋes.

²⁵ Ageun lolo ebwaikini etasurokon ka ailiilikon otuŋa luejaas kwap kakuj kere, luepupunete akirokon, kosodete amaran ka ariebakin kanukon.’

²⁶ “Abu kejuka ikiyakia anyoun kamodiŋ naka Kedemot mama ejai Sikon ekabaka loka Kesibon kakiro nuka ainapakin, ebe,

²⁷ ‘Kisiikinai ketor akwapukon: aderi erot lokapolon, mam apaari akan nakoteten karaida nakokediany.

²⁸ Kitwegeli ijo eoŋ inyamat lunyaman kapesan; ka akipi da numatan kapesan: kisiikinai ketor aitor kakeje;

²⁹ Kwape apotu idwe luka Esau luiboiete koSeir ka Imoabin luiboiete koAr keswamakiniata; aitodol naadokia Yorodan alomar akwap nakiinakinit EJAKAIT Ekosideke sio.’

³⁰ Konye mam Sikon ekabaka loka Kesibon abu kisiik oni aitor akwapuke: naarai abu EJAKAIT Ekonideke kitogogoŋ ekemoyo, kitininik eketau, tetere ijaikini ŋes akanikon, kwape ejaar lolo.

³¹Katema EJAKAIT eoŋ atiar, ‘Koany, ageu aijaikin jo Sikon ka akekwap: kogeu airum, tetere irumi akekwap.’

³²Kosodi Sikon alomun asurokin oni, ŋes ka iketuŋa kere, ejie koYakas.

³³ Kijaik EJAKAIT Ewokodeke ŋes mamawok; kadanyata ŋes ka odweke, ka ituŋake kere.

³⁴ Kerumata ireriake kere kapak kaŋin, kamudiasi cut ŋolire loeboioto ituŋa kotoma, ka aŋor ka ludidik; mam kipou kedeutu idio kakesi:

³⁵Dimarai kipou kaŋatutu ibaren, ka luŋatan lukiŋatuni koreria lukipou kerumata.

³⁶ Anyoun koAroer, loejai ariri naka aditot naka Arunon, kore da loejai aditot, kiton Gilead, amamei ere lokiwojakinit oni: abu EJAKAIT Ewokodeke kijaik kere mamawok:

³⁷ Dimarai akwap naka idwe luka Amon ŋes mam yes ikunyakinete; ariri kere naka ecor Yabok, ka ireria luka akwap nakiukon, ka neabu EJAKAIT Ewokodeke kitikok oni.