Read Ateso Ikisila 20 Bible Online

Ikisila 20 - Ateso bible

Ikisila 20

¹ “Nailomaria aitiji lukasurupokon, kiany abalasin, ka agalin, ka ituŋa lukitelekarito jo, sirikikurianar kes: naarai ejai EJAKAIT Ekonideke kajo, lokitolomuni jo kakwap nako Misiri.

²Kosodi naikunyakiniata ojie, ikunyakini esasedoti kosodi alimokin ituŋa ebe,

³‘Kiira, ijo Isirael, ikunyakis lolo aitiji lukasurupokus: kinyeis ikusitauon aiilor; sirikiyaloŋoŋoto, karaida amaran, karaida akurianar kes;

⁴ Naarai EJAKAIT Ekusideke, ŋes loelosi kayes, ŋes kijiikini yes lukasurupokus, aitajar yes.’

⁵ Elimokinete ijaka da ituŋa ebe, ‘Iŋai etuŋanan loedukit eketogo lokitetet, lomam einakinit akesubanit? Kolot koboŋo togoke, kinyek atwanikin ojie, kosodi ecetuŋanan ainakin asubanit.

⁶Iŋai da etuŋanan loirait akemana naka emusabibu, lomam enyamit araitoke? Kolot koboŋo togoke, kinyek atwanikin ojie, kosodi ecetuŋanan ainyam araitoke.

⁷ Iŋai da etuŋanan loisinerit apese, lomam emanyit ŋes? Kolot koboŋo togoke, kinyek atwanikin ojie, kosodi ecetuŋanan aimany ŋes.’

⁸ Iyatakinete ijaka alimokin ituŋa ebe, ‘Iŋai etuŋanan loekuriana, loekuruporo eketau? Kolot koboŋo togoke. Kinyeis itauon luka iinacanake da acalar bala etauke.’

⁹Kosodi naitanaŋiata ijaka akirokec mama ejaas ituŋa, edakakinete ikapolok luka ajoresio apolokinit ituŋa.

¹⁰ “Naikunyakinia ijo aitiji ere, ilimokini ŋes nukainapakin.

¹¹ Kosodi, arai kiiboŋok jo nukainapakin, koŋaik da jo, kosodete ituŋa kere luejaas toma araun ikeswamak ipelueik, ijaanakinete da jo.

¹²Arai kener ainapakin kajo, konye kitiji jo, irigauni do ŋes:

¹³ Nakijaikinia EJAKAIT Ekonideke ŋes akanikon, idanyi ŋolikiliokit kakwanis naka ekileŋ:

¹⁴ Konye aŋor, ka ludidik, ka ibaren, ka luejaas ore kere, luŋatan kere, ijoreori kanukon; inyami luŋatuna kaneejaas lukasurupokon, lukiinak EJAKAIT Ekonideke jo.

¹⁵Iswamakini kwaŋin ireria kere luelwaka kaneijai ijo, lumam eraas ireria luka atekerin nu.

¹⁶ Konye lukoreria luka ituŋa kalu lukiinakinit jo EJAKAIT Ekonideke araun airumet, mam itajari idiobore yeniyeŋa;

¹⁷Konye imudiari kes cut; Ekitit, ka Emorait, ka Ekanaanit, ka Eperisit, ka Ekibit, ka Eyebusit; kwape kicorakinia EJAKAIT Ekonideke jo:

¹⁸ Tetere mam kisisianakinete yes aiswamaenen nuka italesiakec kere, nueswamakis idekesiokec; kinyeis adiakar kwaŋin kama ejai EJAKAIT Ekusideke.

¹⁹“Nairigauniata ere apaarasia nuipu aitiji ŋes airum, sirikimudia ikitoke kanuka aijep kaep; naarai ipedori ainyam kes, sirikijep kes; naarai erai kereka ekitoi loka emanikor etuŋanan tape ijo irigauni ŋes?

²⁰Dimarai ikito bon luijeni ijo ebe mam enyamio, imudiari kes, ijepi da; idukuni lujiis aitijio ere lokitijie jo, aitodol naibiroror.