Read Ateso Ikisila 24 Bible Online

Ikisila 24 - Ateso bible

Ikisila 24

¹ “Naeyaŋaaria etuŋanan aberu aimany, kosodi arai mam edumunit aminunio kakonyeneke, naarai edumunit ŋesi akirot naka ileic kamake, iwadikakini ŋes ebalua loka aireŋear, kititiŋ ŋes, kosodi aireŋear ŋes kotogoke.

²Kenyou ŋin kotogoke, epedori alosit adukokin etuŋanan ece.

³Arai kela ŋes okilenike lokiareit, kosodi aiwadikakin ŋes ebalua loka aireŋear, kititiŋ ŋes, kosodi aireŋear kotogoke; arai da ketwana okilenike lokiareit loamanyit ŋes;

⁴ Okilenike losodit loereŋeari ŋes, mam emanyi ŋes bobo, naarai amunaun; naarai erai akirot ŋin naketal kakonyen nuka EJAKAIT: sirikitidiaka akwap nakiinakinit EJAKAIT Ekonideke airum.

⁵ “Naemanyia etuŋanan ateran, mam elomari kajore, karaida ainakinio adioswam kere; esalakini ore ekaru ediopet, aitalakar aberuke naamany.

⁶ “Mam ituŋanan eyai akaŋas arai atapen araun aititiŋet: naarai eyait aijar naka ituŋanan araun aititiŋet.

⁷ “Arai kikamun etuŋanan ekokoi idiokoinacanake luka idwe luka Isirael, kikonak ŋes bala ebulesit, arai agwelar ŋes; eario do ekokolan ŋol: ilemari kwaŋin aronis kamakon.

⁸ “Kocoito adeka naka atapon, koric kojokan aswam kere nukisisianakinete yes isasedotin Ilebin: kwape ecorakinia eoŋ kes, iricete yesi aswam kwaŋin.

⁹ Kiitutu nuabu EJAKAIT Ekusideke kiswamak Miriam korot ipote yesi koMisiri.

¹⁰ “Naiyuunia eidunyetekon idiobore, sirikiloma togoke aomare aititineteke.

¹¹Ibwoi kokiŋa eyaŋauni etuŋanan loiyuunit ijo kiborekon aititiŋet kiŋa neijai ijo.

¹²Arai erai ŋesi lokican, mam iperio aititineteke:

¹³ Inyakakini ŋes aititiŋet keloma akoloŋ, tetere eperi anapitoke, kilipakin jo arereŋ: eraun adolit kamakon kakonyen nuka EJAKAIT Ekonideke.

¹⁴ “Sirikiroik ekejaanakinan loeropio loicana loilwaritoi, arai erai loka iinacanakon, arai loka imo luejaas akwapukon oreriakon:

¹⁵ Kapaaranike iinakini ŋes eropitike, eriŋa akoloŋ kelomara; naarai icana ŋesi, ipuda eketau: kinyek amonyia jo kama ejai EJAKAIT, koraun adiakaret kamakon.

¹⁶ “Mam lukapapa eario kanuka adiakaret naka idwe, karaida idwe aario kanuka adiakaret naka lukapapa: eario ŋinituŋanan kanuka adiakareteke.

¹⁷ “Sirikibelok etube loka imoit, karaida loka ikoki, karaida ayaŋaar inapen luka apuserut aitaraun aititiŋet:

¹⁸Konye kiituni ebe irai kolo ebulesit koMisiri, kolaku EJAKAIT Ekonideke jo kaŋina: kanuka ŋun kecorakinit jo aiswamaenen akirot ŋin.

¹⁹ “Naisakia emanikorikon, kimurwok eisuta komanikor, sirikiboŋo aomare: eraun loka imoit, ka ikoki, ka apuserut: tetere kisirereŋi jo EJAKAIT Ekonideke kaswamisio kere nuka akaninikon.

²⁰Naideŋio araito nuka ekitoikon loka eseitun, sirikinyogok bobo aide atenunake: eraunos ŋun nuka imoit, ka ikoki, ka apuserut.

²¹Naitukonokinia imusabibun luka emanikorikon loka emusabibu, sirikinyogok bobo: eraunos ŋul luka imoit, ka ikoki, ka apuserut.

²²Iituni ebe irai kolo ebulesit kakwap nako Misiri: kanuka ŋun ŋes kecorakinia jo aiswamaenen ŋun.