Read Ateso Ikisila 25 Bible Online

Ikisila 25 - Ateso bible

Ikisila 25

¹“Arai kejaun epeget otuŋa, kosodete aponare atubokinio, kotubokis ikatubok kes; itojokete kesi ikadoliton, itetelekarete ikaronon:

² Kosodi kanen, arai ibusakinit ikaronon aleio, iteperikini ekatubon ŋes, aleio kakonyeneke, kwape ajaar aronisike, kimarete.

³ Epedori atubokin ŋes aleio ibelai akaisaoŋon, sirikedepa ŋul: arai kitedepa aile ŋes ibelai luipu adepar ŋul, esilior onacekon kakonyenekon.

⁴ “Sirikien aituk naka emoŋ arai ipudapudai aicom akima.

⁵ “Arai iboiete iinacan nepepe, kotwana ediopet, komamei ikoku yenisapat, mam aberu naka lokatwan edukokini eloŋwait: elomari onace loka okilenike mamake, irumi ŋes, aiswamakin ŋes nuibusakinito onace loka okilenike.

⁶ Kosodi irumi ikiyai yenewuruuni ŋesi ekiror loka onaceke loatwana, kinyek ekekiror amwatar koIsirael.

⁷ Arai mam etuŋanan ekoto airum aberu naka onaceke, elosi aberu naka onaceke orute mama ejaas imakio, etemari ebe, ‘Eŋerit onace loka okilenika aitoboŋikin onaceke ekiror koIsirael, mam keswamakinit eoŋ nuibusakinit onace loka okilenika.’

⁸Enyaraunete do imakio luka ereke ŋes, inerakinos kaŋes: arai kebwo, kotema atiar, ‘Mam akoto airum ŋes.’

⁹ Ebuni aberu naka onaceke mamake kakonyen nuka imakio, elacuni amukat kaje kakejuke, imuikini da aimul oreeteke; eboŋokini ŋesi ebe, ‘Iswamakinio kwaŋin etuŋanan lomam edukokinit onaceke etogo.’

¹⁰ Emaikinio ekekiror koIsirael, Etogo loka ŋol kaloelacaritai akemukat.

¹¹“Arai eutas ituŋa iarei, kosodi aberu naka ediopet aikunyakin ayuun okilenike kakan naka ŋol loesenesenei ŋes, arior akekan, aitiŋ ŋes itouke:

¹² Itubori akekan, mam akonikoŋu itimi ŋes.

¹³ “Siriejaas ocoekon imisanin luegelegela, loepol, ka loedit.

¹⁴Siriejaas togo aitemisio nuegelegela, naepol, ka naedit.

¹⁵ Ijaunos jo kemisani loedolit lokabeit; ijaunos jo kaitemis naedolit nakabeit: tetere ipuaros akonipaarasia kakwap nakiinakinit jo EJAKAIT Ekonideke.

¹⁶ Naarai ŋul kere luiswamaete akiro ŋun, kes luiswamaete numam edolito, eraas luketal mama ejai EJAKAIT Ekonideke.

¹⁷ “Kiitu nuabu Amalek kiswamak jo korot ilomuni koMisiri;

¹⁸ Kwape abu kiriamakinotor kajo korot, kodany lukon lukokau, kere luakalanyaka luajaas kaukon, iiloro ijo, kopasite da; mam ŋes abu koyoŋ Edeke.

¹⁹ Kanuka ŋun, kiinak EJAKAIT Ekonideke jo aiyeŋun kama ejaas lukasurupokon lukilukunito, kakwap nakiinakinit jo EJAKAIT Ekonideke araun airumet nairumi ijo, imwatari aiitunet naka Amalek kokwap kakuj; sirikiimurwok.