Read Ateso Ikisila 27 Bible Online

Ikisila 27 - Ateso bible

Ikisila 27

¹Kicorakis Musa ka imakio luka Isirael ituŋa ebe, “Koricito aicorakineta kere nukecorak yes lolo.

² Kosodi kapaaran naidokiata Yorodan alosit akwap nakiinakinit jo EJAKAIT Ekonideke, isipokini ijo amor nuepolok, iladakini kes asiŋe;

³iwadikakini kes akiro kere nuka ekisil kalo, kidoka juwai; tetere ilomari akwap nakiinakinit jo EJAKAIT Ekonideke, akwap naeleleete akile ka esik, kwape kisumunio EJAKAIT Edeke loka lukapapaakon jo.

⁴ Kosodi naidokiata Yorodan, isipokinete amor ŋun, nukecorakini yes lolo, moru Ebal, iladakinete kes asiŋe.

⁵ Idukokini EJAKAIT Ekonideke etem nen, etem loka amor: sirikike kes kasuat.

⁶Iduki etem loka EJAKAIT Ekonideke kamor numam ikeitai: iinakini EJAKAIT Ekonideke ainakineta nuicweio kanen:

⁷Iinakini da asuban nuka ainapakin, inyamakini nen; ilakari ijo kakonyen nuka EJAKAIT Ekonideke.

⁸ Iwadikakini akiro kere nuka ikisila kalu amor ŋun kideleleete teniten.”

⁹Apotu Musa ka isasedotin Ilebin kotemasi Isirael kere atiar, “Kililiŋ, kopup, ijo Isirael; iraunos lolo yesi ituŋa luka EJAKAIT Ekusideke.

¹⁰Ŋes do irimaria eporoto loka EJAKAIT Ekonideke, aiswamaenen aicorakinetake ka ikisilake lukecorakini jo lolo,”

¹¹Kicorak Musa ituŋa kapaaran ŋipeŋin, ebe,

¹² “Lu kes ebwoete komoru Gerisim, ailipakin ituŋa arereŋ, kidokata Yorodan; Simeon ka Lebi, ka Yuda, ka Isakar, ka Yosep ka Benyamin:

¹³Lu kes ebwoete komoru Ebal kanuka ekenit; Reuben, ka Gad ka Aser, ka Sebulun, ka Dan ka Naputali.

¹⁴ Eboŋokinete Ilebin ituŋa kere luka Isirael keporoto kaloepol, ebe,

¹⁵ “ ‘Kikenoi etuŋanan loiswamauni aput naegerer arai nacaluna, naketal mama ejai EJAKAIT, aswam naka akanin nuka etuŋanan kaloepiiriana, asipokin kaiyeiyea.’ Eboŋokinete ituŋa kere ebe, ‘Amen.’

¹⁶ “ ‘Kikenoi yenemwaŋit papake arai totoke.’ Eboŋokinete ituŋa kere ebe, ‘Amen.’

¹⁷ “ ‘Kikenoi ŋol loisukunyikini eikor loka eidunyeteke.’ Eboŋokinete ituŋa kere ebe, ‘Amen.’

¹⁸ “ ‘Kikenoi ŋin yenitapaari emuduk korot.’ Eboŋokinete ituŋa kere ebe, ‘Amen.’

¹⁹ “ ‘Kikenoi ŋol loibelokini etube kaneejai imoit, ikoki, ka apuserut.’ Eoonokinete ituŋa kere ebe, ‘Amen.’

²⁰ “ ‘Kikenoi ŋol loeperete kaberu naka papake; naarai apuko anapito nakaŋabet naka papake.’ Eboŋokinete ituŋa kere ebe, ‘Amen.’

²¹ “ ‘Kikenoi ŋol loeperete kitiaŋ kere.’ Eboŋokinete ituŋa kere ebe, ‘Amen.’

²² “ ‘Kikenoi ŋol loeperete kinacike, akoku naka papake, arai akoku naka totoke.’ Eboŋokinete ituŋa kere ebe, ‘Amen.’

²³ “ ‘Kikenoi ŋol loeperete kaamuranike.’ Eboŋokinete ituŋa kere ebe, ‘Amen.’

²⁴ “ ‘Kikenoi ŋooinomi eidunyeteke kaiyeiyea.’ Eboŋokinete ituŋa kere ebe, ‘Amen.’

²⁵ “ ‘Kikenoi ŋol loeropio kanuka aiar ituŋanan yenimam akirot.’ Eboŋokinete ituŋa kere ebe, ‘Amen.’

²⁶ “ ‘Kikenoi ŋin yenimam itogogoŋi aitodol ikisila ŋul aiswamaenen.’ Eboŋokinete ituŋa kere ebe, ‘Amen.’