Read Ateso Ikisila 28 Bible Online

Ikisila 28 - Ateso bible

Ikisila 28

¹ “Kosodi kanen arai kipup ijo kojokan eporoto loka EJAKAIT Ekonideke airic aiswamaenen aicorakinetake kere nukecorak jo lolo, kitopoloori EJAKAIT Ekonideke jo adepar atekerin kere nuka akwap:

² Epote da arereŋesio nu kere mamakon, kidolokinete jo, arai kipup ijo eporoto loka EJAKAIT Ekonideke.

³ Kisirereŋio jo kore, kisirereŋio da komanikor.

⁴ Isirereŋio aur naka akonikuan, ka araito nuka alupokon, ka aur naka ibarenikon, eiyas loka aitukukon ka ludidik luka esipanikon.

⁵Isirereŋio editakon ka amotikon nakigures.

⁶ Isirereŋio nailomununia, kisirereŋio da nailomanaria.

⁷ “Edanyi EJAKAIT lukasurupokon lukinyoikinete jo kakonyenekon: elomunete asurokin jo korot ediopet, ekerete kakonyenekon korotin ikanykaarei.

⁸ Icorakini EJAKAIT arereŋ odulaakon, ka aswamisiokon kere nuiswamaenenei; kisirereŋi ŋesi jo kakwap nakiinakinit EJAKAIT Ekonideke.

⁹ Kiticasi EJAKAIT yes araun ituŋake lukalaunak kwape kiyapoikinio yes; arai iricito yesi aicorakineta nuka EJAKAIT Ekusideke alosenen korotinike.

¹⁰ Eanyunete ituŋa kere luka akwap ebe kimaikinitai ekiror loka EJAKAIT; kiyoŋete jo.

¹¹ Itupui EJAKAIT ajokisiokon, kaur naka akuanakon, aur da naka ibarenikon, araito da nuka alupokon, kakwap naabu EJAKAIT kiyapoik lukapapaakon ainakin jo.

¹² Kiŋaikini EJAKAIT jo aiŋadisike naejok ainakin akwapukon akiru kapakike, aisirereŋ aswam kere naka akonikan: iyuununei atekerin nuipu, konye mam jo iyuun kamakec.

¹³Kiinakini EJAKAIT ijo araun ekaliŋan konye mere ekerikakinan; ijaun ijo kuju bon, mam ijaun kwap; arai kipup ijo aicorakineta nuka EJAKAIT Ekonideke, nukecorak ijo lolo airic aiswamaenen;

¹⁴ Komam ipaari ainyein adio kakiro nukecorak yes lolo, apaar teten arai kediany, atupar icedekesio aijaanakin kes.

¹⁵ “Konye kereka, arai mam jo ipupuni eporoto loka EJAKAIT Ekonideke airic aiswamaenen aicorakinetake kere ka ikisilake nukecorak jo lolo; kibunokinete jo ikenito lu kere, kidolokinete da.

¹⁶Kikenio jo kore, kikenio jo komanikor.

¹⁷Ikenio editakon ka amotikon nakigures.

¹⁸ Ikenio aur naka akuanakon, ka araito nuka alupokon, eiyas loka aitukukon, ka ludidik luka esipanikon.

¹⁹Kikenio jo nailomununia, kikenio da nailomanaria.

²⁰ “Kijukakini EJAKAIT jo iken, aiticaneta, ka airetakin kotoma aswamisiokon kere, aitodol nakimudiarere jo, aitodol da naiolioro ijo atipet; kanuka aronis naka aswamisiokon, nukijalia ijo eoŋ.

²¹ Kitulanari EJAKAIT jo aitodol nakimudiaria jo kakwap nailomari airum.

²² Kidanyi EJAKAIT jo keluera, ka ekamidi, ka abuun, ka amwanis naepol, ka ekileŋ, ka ekure, ka airouroun; kibwapete jo aitodol naiolioro.

²³Akujukon da naejai kuju akoukon eraun aisinit, ka alup nuejaas kwapukon eraunos asuat.

²⁴Ituluori EJAKAIT akiru naka akwapukon apua ka asiŋei: kibunokinete jo kokuju, aitodol nakimudiarere jo.

²⁵ “Kidanyi EJAKAIT jo kakonyen nuka lukasurupokon: ilomari korot ediopet asurokin kes, ikeri korotin ikanykaarei kakonyenekec: iraun etasuro kama ejaas ajakanuto kere nuka akwap.

²⁶Eraun atesikon akiriŋ naka akweny kere, ka itiaŋ luka akwap, emamuun yenetwarari kes.

²⁷ Kitedeki EJAKAIT jo abusio nuka Misiri, ka ajimii, ka ijip, ka aipii, numam ipedori aŋaleun.

²⁸Kitedeki EJAKAIT jo ikerep, ka amudukanut, ka arieŋun naka etau:

²⁹Ituriaitoi paaran, kwape eturiaitor emuduk kamuton, komam ikerianar koponesiokon: kiroikinio kiŋasio jo duc, emamuun yenikitajari jo.

³⁰ Isineri ijo apese, konye eperete ecetuŋanan kaŋes: iduki ijo etogo, konye mam iboikini toma: irai emanikor loka emusabibu, konye mam inyami araitoke.

³¹Eario emoŋokon kakonyenekon, konye mam jo inyami ŋes: kidemario asigiriakon kakonyenekon kadedeŋ, konye mam kinyakakinio: einakinio lukasurupokon amerekekinikon, emamuun yenikitajari jo.

³²Ekorakinio icetuŋa ikonidwe lusap ka lupesur kosesenete akonikonye, konye itegete kanuka aimuit kes apaaran kere: ido kimamikinete jo nuipedori aswam.

³³ Enyami ateker namam jo ijeni araito nuka alupokon, ka aitaaritoikon; konye kiroikinio jo kicikakinitete duc:

³⁴Kikerepikini ijo kanuka nueanyunete akonikonye.

³⁵Ibwaikini EJAKAIT abusio nueroko noi: akuŋinikon, ka akejenekon, numam ipedori aŋaleun, ageun kotau loka akejukon kiton osiaduk loka akoukon.

³⁶ “Kiyaŋaari EJAKAIT jo, ka ekabakakon loidakakini ayait jo, mama ejai ateker namam jo ijeni, ijo ka lukapapaakon, ijaanakini kaŋina idekesio ice akito ka amor.

³⁷ Iraun aumokinet, ka awarag, ka ikienis kotuŋa kere lukireŋeikini EJAKAIT jo.

³⁸ Iyei ikinyom luipu omanikor, konye isakun idis; naarai enyami emaase kes.

³⁹Irai amanat nuka emusabibu icapi kes konye mam imasi ebino, karaida aideŋ araito; naarai enyami ekurut kes

⁴⁰Ejaunos iseitunin oikorunokon kere, konye mam inyonyoikin akinyetekec naarai edounenete araito nuka eseitunikon.

⁴¹ Iwurie idwe lusap ka lupesur konye mam eraunos lukon; naarai eŋatario.

⁴²Enyamiari emaase ikitokon kere ka araito nuka alupokon.

⁴³Iyatanakini emoit loejai mamakon adokari kuju adepar jo; iyatanakini ijo aidoor kwap.

⁴⁴ Kiyuununei ŋes jo, konye mam jo iyuuni ŋes: eraun ŋesi ekaliŋan, ka jo da ekerikakinan

⁴⁵Kibunokinete jo ikenito ŋul kere, kibwapete jo, kidolokinete jo, aitodol nakimudiarere jo; naarai mam ibu kopup eporoto loka EJAKAIT Ekonideke airic aicorakinetake ka ikisilake luabu kicorak jo:

⁴⁶ Eraunos kaneijai ijo aanyunet ka aumokinet, kaneejai aurikon da ikar kere.

⁴⁷ “Naarai mam ijaanakinit EJAKAIT Ekonideke kailel, kaiyalama naka etau, kanuka aidiles naka iboro kere:

⁴⁸ Kanuka ŋun ijaanakini ijo lukasurupokon luijukuni EJAKAIT asurokin jo, koriebi eteŋei, kojakite akur kimujalal, kipuda iboro kere: idokokini ajookot naka asuat omurisiŋikon aitodol nakimudiaria jo.

⁴⁹ Eyaŋauni EJAKAIT ateker kama elwana asurokin jo, anyoun kosaŋe loka akwap, kwape eporitor emorukaalet, ateker namam jo ijenuni akeŋajep.

⁵⁰ Ateker naededeŋ akekonyen, namam epod imakio karaida aitim ludidik:

⁵¹ Enyami aur naka ibarenikon, ka araito nuka alupokon, aitodol nakimudiarere: mam ŋes kinyeinia jo akima, arai ebino arai akinyet, arai eiyas loka aitukukon, karaida ludidik luka esipanikon aitodol nakimudiaria jo.

⁵² Kirigauni jo koruteikon kere, aitodol naetiyaikinotor arwatatinikon nueojak nuebwaitai, nuibu komuno, anatar akwapukon kere: kirigauni jo koruteikon kere nakiinak EJAKAIT Ekonideke jo.

⁵³ Inyami ijo aur naka akonikuan, akiriŋ naka idwekon lusap ka lupesur lukiinak EJAKAIT Ekonideke jo; kirigaunitete, kicikakinitete, kanekicikakinete lukasurupokon jo.

⁵⁴Etuŋanan loenonok kotomakus, loijamamai eraun loitei onaceke kakoŋu naerono, ka aberu naka atorobuke, ka Iuideun: kodweke luideikina ŋes:

⁵⁵Komam einakini idio kakesi akiriŋ naka idweke luenyami ŋesi, naarai emamei yenideikina ŋes; kirigaunitete, kicikakinitete kanekicikakinete lukasurupokon jo koruteikon kere.

⁵⁶Aberu naenonok naijamamai kotomakus, namam tiketamaki aicakakin akekeju alup kanuka aijamamake ka anonokuke, itei ŋesi okilenike loka atorobuke, ka okokuke ka akokuke kakoŋu naerono;

⁵⁷ Ka aŋasiepeke naelomuni kakejeke, ka ikedwe lueuruuni; naarai enyami kes kaiyeiyea kanuka eipud iboro kere: kirigaunitete, kicikakinitete, kanekicikakinete lukasurupokon jo koruteikon

⁵⁸ “Arai mam irici aitodol akiro kere nuka ikisila lu luiwadikatai oitabo lo tetere iyoŋi ekiror lo lokaibuses loeyoŋitai, EJAKAIT Ekonideke;

⁵⁹ Kijukakini EJAKAIT jo aiticaneta nukaumokin, ka aiticaneta nuka akoniwur, aiticaneta nukos, nuedaunete apak naepol, ka adekesia nueroko noi, nuedaunete apak naepol.

⁶⁰Kiinuni bobo jo adekesia kere nuko Misiri, nuibu koyoŋ; kidoŋete jo.

⁶¹Ŋinideka da, ka ŋiniiticanet, namam iwadikatai oitabo loka ikisila kalu, kiinuni EJAKAIT jo kes, aitodol nakimudiarere jo.

⁶² Isalete yesi ikidioko, kwabo iraas kolo yesi kwape aacer nuka akuj kanuka aipues; naarai mam ipotu kopupoto eporoto loka EJAKAIT Ekusideke.

⁶³ Kosodi kanen, kwape esiyalamikinitor EJAKAIT aiswamakin yes nukajokak, ka aitupuu yes; isiyalamikini kwaŋin EJAKAIT aitoolior yes, ka amudiar yes; kilemario do yes kakwap nailomarete airum.

⁶⁴ Kisiarakini EJAKAIT jo otuŋa kere, ageun kosaŋe ediopet loka akwap kiton osaŋe ece loka akwap; ijaanakini idekesio ice kaŋina, lumam lem ijenunit, ijo karaida lukapapaakon, kes akito ka amor.

⁶⁵ Mam jo idumuni aijamam kotoma atekerin ŋun, emameikini da akonikeju aibworar: konye ijaikini EJAKAIT jo kaŋina etau loemarani, ka akonye nuitegete, ka etau loitururwei:

⁶⁶Ibuonokini noi kanuka aijarakon; ikurianari kuare ka paaran, mam imuno akoniijar:

⁶⁷ Itemari tupuruc ebe, ‘Tiejok arai kerai eboŋ!’ Eboŋ da itemari ebe, ‘Tiejok arai kerai tupuruc!’ kanuka akurian naka etaukon naikurianaror, ido kanuka nueanyunete akonikonye.

⁶⁸ Kinyakari EJAKAIT jo Misiri kameerin, korot loabu kalimok jo ebe, ‘Mam bobo ianyuni ŋes’; igwelanaros kaŋina mama ejaas lukasurupokus araun ibulesin ka abulesin, konye emameun ituŋanan yenikigweli yes.”