Read Ateso Ikisila 33 Bible Online

Ikisila 33 - Ateso bible

Ikisila 33

¹ Na ŋes arereŋ naabu Musa etuŋanan loka Edeke kilipak Isirael eriŋa ŋes ketwana.

² Kotema atiar, “Abu EJAKAIT kobu koSinai, Kocaik kes koSeir; Koca komoru Paran, Kolom kolukumin itomon luka ikalaunak: Kakekan nakoteten ajai ekisil loka akim mamakec.

³ Eebo, emin ituŋa; Ejaas ikalaunakake kere akonikan: Apotu kiboikinos akejekon; Ijaikinio ŋinituŋanan akonikiro.

⁴ Abu Musa kicorak oni ekisil, Airumet naka ekodet loka Yakob.

⁵ Arai ŋesi ekabaka koYesurun, Naatukonokinere ikapolok luka ituŋa, Atekerin kere nuka Isirael.

⁶“Kojar Reuben, komam etwani; Konye kikidiokoto iketuŋa.”

⁷ Na ŋes arereŋ naka Yuda: kotema atiar, “EJAKAIT, kopup eporoto loka Yuda, Kitoloma ŋes neejaas iketuŋa: Abu koji kakekanin kanukeŋ; Iŋarakini ijo ŋes aitiji lukasurupoke.”

⁸ Naka Lebi da kotema atiar, “Tumimikon ka Urimikon ejaas ka etuŋananikon loka Edeke, Loibu kigimo koMasa, Loibu kitepeg kakipi nuka Meriba;

⁹ Loabala nuka papake ka nuka totoke ebe, ‘Mam aanyunit ŋes’: Mam ŋes abu kolimo ikeinacan, Karaida ajenun ikedwe: Naarai aricito akonikirot, Kidarete aitutuketekon.

¹⁰ Isisianakinete Yakob itubesiakon, Ka Isirael da ekisilikon: Ibwaikinete lukisupurununo akonyenekon, Ka ainakinet kere naicweio kotemukon.

¹¹ EJAKAIT, kisirereŋ iboroke, Kocam aswam naka akaninike: Kicum aipelor aŋabes nuka ŋul kaluenyoikinete ŋes, Nuka ŋul da luelaito ŋes, Tetere mam bobo enyounete.”

¹²Naka Benyamin kotema atiar, “Iboikin yeniminat yenika EJAKAIT kainapakin eiduny kaŋes; Imukorit ŋes apaaran kere, Iboienenei da kokidiŋ kikeperinike.”

¹³ Naka Yosep kotema atiar, “Kisirereŋ EJAKAIT akekwap; Koboro luketiai loepol luka akui, kakopyo, Kaidules naidipidipakina kwap.

¹⁴Koboro luketiai loepol luka araito nuka akoloŋ, Koboro luketiai loepol luka apol naka ilapio.

¹⁵ Koboro luepolok luka iroŋan lukolo sek, Koboro luketiai loepol luka iukon lumam enaŋete.

¹⁶ Koboro luketiai loepol luka alup ka ailelebakec, Kacamunio naka ŋol kaloiboie kokitwi; Kobu arereŋ akou naka Yosep, Kosiaduk loka ŋol kaloatiakario koinacanake.

¹⁷ Ekiyai loka emonoke, erai apolou nakeŋ; Amumwarake eraas amumwara nuka ekosobwan: Kes eremoria ŋesi ituŋa, kes kere, kiton osaŋe loka akwap: Eraas kesi ilukumin itomon luka Epuraim, Eraas da ilukumin luka Manase.”

¹⁸Naka Sebulun kotema atiar, “Sebulun, kolakar kotoma alomarikon; Isakar da kotoma owemaikon.

¹⁹ Enyararete ituŋa oroŋat; Einakinete kaŋina asuban nuka adolit: Naarai ijujuete luidilas kaŋolol, Ka luketiai loepol luibwaitai kasiŋe.”

²⁰ Naka Gad kotema atiar, “Isirereŋitoi ŋol loitalalai Gad: Iboie bala aŋatuny, Epoopoi kakan, eebo esiaduk loka akou.

²¹ Abu kokorakin atutubet nasodit kanukeŋ, Naarai eŋadakinitai ewai loka lokesilan Kobu nepepe kalukapolok luka ituŋa, Kitodol abeit naka EJAKAIT, Ka itubesia koIsirael.”

²² Naka Dan kotema atiar, “Erai Dan ikoku yenika eŋatuny, Yenesomun koBasan.”

²³ Naka Naputali kotema atiar, “Wu Naputali, loimono asianut, Loileleba arereŋ naka EJAKAIT: Irumi ijo ari nakoto ka eŋalakimak.”

²⁴ Naka Aser kotema atiar, “Isirereŋitoi Aser kidwe; Kocamunai koinacanake, Kidomak ŋesi akekeju akinyet.

²⁵Eraunos agolitokon asuat ka aisinit; Kwape kapaarasiakon, kwape kwaŋin ejaunor agogoŋukon.”

²⁶ “Emamei yeneputos ka Edeke, wu Yesurun, Loibwaneni akuj aiŋarakin jo, Kajokisike kakuj.

²⁷ Edeke lomam enaŋi ŋes amecisikon, Kigagat kakanin numam enaŋete: Ereŋea lukasurupo kakonyenekon, Kobala ebe, ‘Komudia.’

²⁸ Iboie Isirael kainapakin, Atan naka Yakob ejai bon, Kakwap naka akima ka ebino; Eebo etepi akekuj akopyo.

²⁹ Kisirereŋitoi jo, wu Isirael: Iŋai loeputos kajo, ituŋa luitajarit EJAKAIT, Ebuku loka aiŋarakiniokon, Ŋol ŋes ekileŋ loka ajokisikon! Kinonokikinete jo lukasurupokon; Icakacakai ijo aiboisiokec nuiceleleete.”