Read Ateso Ikisila 34 Bible Online

Ikisila 34 - Ateso bible

Ikisila 34

¹ Kodoka Musa kapuutona nuka Moab moru Nebo, aidi naka Pisiga, loitei Yeriko, Kitodik EJAKAIT ŋes akwap kere naka Gilead, kiton Dan;

² Ka Naputali kere, ka akwap naka Epuraim ka Manase, ka akwap kere naka Yuda, kiton aŋolol nakoiŋaren;

³ Ka Eŋalakimak, ka Apuuton naka aditot naka Yeriko ere loka idukudukun kiton Soar.

⁴ Kotema EJAKAIT ŋes atiar, “ŋin ŋes akwap naabu keyapoik Aburaam, ka Isaak, ka Yakob, ebe, Ainakini aurikon: kesireik jo kakonyekon, konye mam idokari ŋina.”

⁵ Kwaŋin kotwanik Musa ekejaanakinan loka EJAKAIT akwap naka Moab, kwape ajaar akirot naka EJAKAIT.

⁶ Kidaik ŋes aditot akwap naka Moab naitei Bet-peor: konye emamei ituŋanan yenejeni atesike kiton lolo.

⁷ Arai Musa loka ikar akwatat ka akaisaarei naatwania: mam akekoŋu awariwari, karaida akegogoŋ aiŋoŋooro.

⁸ Kibworoto idwe luka Isirael Musa kapuutona nuka Moab apaarasia akaisauni: kwaŋin kitanaŋai apaarasia nuka aibworo Musa.

⁹ Eleleba Yosua okoku loka Nun emoyo loka acoa, naarai edokokinit Musa ŋes akekanin: kopupenenete idwe luka Isirael ŋes, kiswamata kwape ecorakinitor EJAKAIT Musa.

¹⁰ Mam bobo ejauna enabi koIsirael loeputos ka Musa, loanyununos ka EJAKAIT:

¹¹Kotoma aanyuneta kere ka nukaumokin, nuejukari EJAKAIT ŋes aiswamakin Parao, ka ikekejaanakinak kere, ka akwapuke kere, kakwap nako Misiri;

¹²Kotoma akan nakagogoŋ, ka etasuro kere loepol, loabu Musa kiswama kakonyen nuka Isirael kere.