Read Ateso Ikisila 4 Bible Online

Ikisila 4 - Ateso bible

Ikisila 4

¹ “Aso natikwana, ijo Isirael, kopup ikisila ka itubesia, lukesisianakini aiswamaenen; tetere ibusete, ilomarete irumete da akwap nakiinakini EJAKAIT, Edeke loka lukapapaakus.

² Siriyatanakinete akirot nakecorakini yes, karaida aiŋoŋar, tetere iricete aicorakineta nuka EJAKAIT Ekusideke nukecorakini yes.

³ Aanyut akusikonye nukesubi EJAKAIT kanuka Baal-peor: naarai ituŋa kere luatuparito Baal-peor, abu EJAKAIT Ekusideke komudia kokidiŋikus.

⁴Konye yes luipotu kiketakinos kama kEJAKAIT Ekusideke ejari ŋinidiopet kayesi lolo.

⁵Koany, kesisianak yes ikisila ka itubesia, kwape kecorakinia EJAKAIT Ekadeke, kiswamaenenete kwaŋin kotoma akwap nailomarete airum.

⁶ Aso kocoito aiswamaenen; naarai ŋin ŋes acoakus ka aijenekus kakonyen nuka atekerin nuepupunete ikisila ŋul kere, etemarete ebe, ‘Abeit ateker na nakos eraas ituŋa lukacoa ka lukaijen.’

⁷ Naarai ateker nakos naanyoin, ejai edeke diekec, kwape ejaar EJAKAIT Edekewok nakiwoneeneneo ŋes?

⁸Ido ateker nakos naanyoin, ejaas ikisila ka itubesia luebeito kwape ejaatar ikisila ŋul kere, luebwaik eoŋ akonyenekus lolo?

⁹ “Konye kocoite, kidari noi ekonitau, kinyeis akiro aimurwokin nuaanyut akonikonye, kinyeis da anyoun kotaukon apaarasia kere nuka akoniijar; konye kitejenanakinenei ikonidwe ka idwe luka ikonidwe.

¹⁰ Apaaran nakolo ibwoia kakonyen nuka EJAKAIT Ekonideke koKoreb, nakatemaria eoŋ EJAKAIT atiar, ‘Kotukonokinai ituŋa, eoŋ da esiirari kes akakiro, kisisiaut ayoŋitenen eoŋ apaarasia kere nuebusioto kakwap, kisisianakinete kesi da ikecedwe.’

¹¹ Ipŋulotu yesi da kikunyakis kobwaata kokwap kemoru; kosaran emoru kiton otau loka akuj; ka amuton, ka idouon, ka amuton naijesi cucucuc.

¹² Kiner EJAKAIT kayes kokidiŋ akim; ipotu kopuput eporoto loka akiro, konye mam eanyuna idiobore; dimarai eporoto bon.

¹³ Abu kolimok yes akeitutuket, naabu kicorak yes aiswamaenen, kes aicorakineta atomon; ewadikat toma amor aarei.

¹⁴ Kecorak EJAKAIT kapak kaya aisisianakin yes ikisila ka itubesia, tetere iswamaenenete kakwap naidokarete airum.

¹⁵ “Aso kocounitos noi; naarai mam ipotu koanyut idiobore kapaaran naenerar EJAKAIT kayes koKoreb kokidiŋ akim:

¹⁶ kinyeis amunaun bonik, aikeun aput naepusit idiobore kere, aput naka yenikiliokit arai yeniberu.

¹⁷ Aput naka etiaŋ loejai akwap, aput naka akweny kere naejaas abebenoka naeporitoi kapak.

¹⁸Aput naka ibore kere yeneliat kokwap, aput naka ibore yenika ecor yenejai toma akipi kwap kalup.

¹⁹ Ido kinye aiteluor akonikonye akuj, kiany da akoloŋ, ka elap ka aacer, ŋes ajore kere nakokuju, kijodijodoorete jo aima kes, ka aijaanakin, luabu EJAKAIT Ekonideke kokorak ituŋa kere luejaas kwap kakuj kere.

²⁰ Konye abu EJAKAIT kolem yes kasua nuesaranete, koyaŋau koMisiri, araun kamakeŋ ituŋa luka airumet, kwape ejaar lolo.

²¹ Bobo da abu EJAKAIT kanyunyurik eoŋ kanukus, keyapoik eoŋ kenyek aidok Yorodan, karaida alomar akwap ŋin nakajokan nakiinakini EJAKAIT Ekonideke araun airumet:

²² Konye kebusakinit eoŋ atwanikin akwap na, mam kebusakinit aidok Yorodan: konye idokarete yesi, kirumata akwap ŋin nakajokan.

²³Kocounitos, kinyeis aimurwokin aitutuket naka EJAKAIT Ekusideke, naitutuki kayes, aikeun aput naepusit idiobore kere naabu EJAKAIT Ekonideke kisimik.

²⁴ Naarai erai EJAKAIT Ekonideke akim naidopori, Edeke loka ekolo.

²⁵ “Naiwurienena idwe, ka idwe luka idwe, kodaunito do yesi apak naepol kakwap, kosodete amunaun bonik, aikeun aput naepusit idiobore kere, ka aswam nueroko kakonyen nuka EJAKAIT Ekonideke, aitunyunyurikin ŋes:

²⁶ Anyaraunit akuj ka akwap araun akajenakakus lolo, ebe, itwakete cut atipet kakwap nailosete airum okekwa loka Yorodan; mam akusipaarasia ipuaros, konye imudiaros cut.

²⁷ Kisiarisiarari EJAKAIT yes otuŋa, ideuni etiaikus edit katekerin, nukireŋeikini EJAKAIT yes.

²⁸ Ijaanakinete kaŋina idekesio, luesubete ituŋa kakecekanin, akito ka amor, lumam esesenete, karaida aipup, karaida ainyam, karaida aiŋuun.

²⁹ Konye arai kimo ijo EJAKAIT Ekonideke kaŋina, idumuni ijo ŋes, arai kimo ijo ŋes kekonitau kere ka akoniijar kere.

³⁰ Naijaikinor ocan, nakidolokinioto da akiro ŋun kere kapaarasia nukokau iboŋuni mama ejai EJAKAIT Ekonideke, ipupuni do ekeporoto:

³¹ Naarai EJAKAIT Ekonideke erai Edeke loketimon, mam kijalakini, karaida amudiar jo, karaida aimurwokin aitutuket naka lukapapaakon naabu kiyapoik kes.

³² “Naarai kiŋit nuka apaarasia nuatuboros, nukigeikinete jo, ageun kapaaran naasubakinia Edeke ituŋanan akwap, ka anyoun kosaŋe ediopet loka akuj kiton osaŋe loce, arai ejauna akirot naeputos kakirot na nakos, arai epupunitoi naeputotor?

³³Epupunito kereka apeŋo ituŋa eporoto loka Edeke inera kokidiŋ kakim kwape ipupunioto yesi, kosodete aijar?

³⁴Arai abu Edeke kotamak alemun ateker kokidiŋ naka aceteker, kaigimoreta, ka aanyuneta, ka nukaumokin, ka ejie, ka akan nakagogoŋ, ka akan naerioro, ka nusogim nukos, kwape ajaatar kere nuabu EJAKAIT Ekusideke kiswama kanukus koMisiri kakonyenekus?

³⁵ Aponi kitodikin jo tetere ijenuni ebe EJAKAIT ŋes Edeke; emamei ece dimarai ŋes.

³⁶ Abu kisiira jo ekeporoto kakuj, tetere kisisianakini jo: abu da kitaany jo akekim naepol kakwap; kopup akekiro kokidiŋ kakim.

³⁷Kanu naarai abu komina lukapapaakon, abu koseu akeceur naetupakini, kitolom jo koMisiri kakepedor naepol, kojaenena kajo:

³⁸Aireŋear atekerin nuepolok nuegogoŋ da adepar jo kakonyenekon, aitolomar jo, ainakin jo akecekwap airum, kwape ejaar lolo.

³⁹ Aso do kojen lolo, kibwaik otaukon, ebe, EJAKAIT erai Edeke kokuju toma akuj, kwap da kakwap: emamei ece.

⁴⁰ Irici ijo ikekisila ka aicorakinetake, nukecorakini jo lolo, tetere ijaun ijo ejok, ka ikonidwe lukitupakinete jo, tetere ipuaros akonipaarasia kakwap nakiinakini EJAKAIT Ekonideke ikar kere.”

⁴¹ Kosodi Musa atiakar ireria iuni kokekwa loka Yorodan kama eŋiunia akoloŋ;

⁴²Tetere ikaaran ekereari ŋina, yeneari iidunyeteke komam epeleikinit, komam elait ŋes lem sek; tetere ekereari ore ediopet kaŋul kosodi aijar:

⁴³Kes lu, Beser kotoma amodiŋ, kapuuton, kanuka Ireubenin; ka Ramot kotoma Gilead kanuka Igadin; ka Golan kotoma Basan, kanuka Imanasin.

⁴⁴Lu kes ikisila luabu Musa kibwaik akonyen nuka idwe luka Isirael:

⁴⁵Nu kes aitejenuneta, ka ikisila, ka itubesia luabu Musa kolimok idwe luka Isirael naalomuniata koMisiri;

⁴⁶ Okekwa loka Yorodan kaditot naitei Betpeor, kakwap naka Sikon ekabaka loka Imorain, loeboie koKesibon, luadanyi Musa ka idwe luka Isirael naalomuniata koMisiri:

⁴⁷ Kirumata akekwap, ka akwap naka Og, ekabaka loka Basan, ikabakan luarei luka Imorain, luajaas okekwa loka Yorodan kama eŋiunia akoloŋ;

⁴⁸ Anyoun koAroer, naejai ariri naka aditot naka Arunon, kiton moru Sion (ŋopeŋol ŋes Kerumon).

⁴⁹Ka Araba kere okekwa loka Yorodan ari nakokide, kiton aŋolol naka Araba, kwap neijululuoro Pisiga.