Read Ateso Ikisila 7 Bible Online

Ikisila 7 - Ateso bible

Ikisila 7

¹ “Nakitolomaria jo EJAKAIT Ekonideke akwap nailosi airum, ireŋeari atekerin nuipu kakonyenekon, Ekitit, ka Egirugasit, ka Emorait, ka Ekanaanit, ka Eperisit, ka Ekibit, ka Eyebusit, atekerin akanykaarei nuepolok, nuegogoŋ adepar jo;

² Ido nakijaikinia EJAKAIT kes mamakon, idanyi ijo kes; imudiari kes cut; mam itutuki kakes, karaida aitim kes:

³ Mam imanyasi kakes; mam ikorakini okokuke akonipese, karaida amanyakin okokukon akokuke.

⁴Naarai ibelokini ŋesi okokukon kinye atupit eoŋ, tetere ijaanakinete icedekesio; kwaŋin inepuni anyunyura naka EJAKAIT kamakus, kimudiari da atipet.

⁵ Konye iswamakinete kes kwanata; itiyanakinete itemwanakec, imunyumunyete ipirinokec, ijepejepete Aserimikec, icweete da akeceputosia nuegerer.

⁶ “Naarai iraas ituŋa lukalaunak kaneejai EJAKAIT Ekusideke: kiseu EJAKAIT Ekusideke araun ituŋake obe kotuŋa kere luejaas toma akwap.

⁷Mere naarai ipu yesi adepar icetuŋa ŋes kiminar EJAKAIT yes, koseu da; kwabo ikidioko yesi adepar ituŋa kere:

⁸ Konye naarai kimina EJAKAIT yes, ido naarai itodolit aiyaposit naeyapoikini lukapapaakus, ŋes do kitolomunia EJAKAIT yes kakan nakagogoŋ, kilakunia yes kotogo loka ebulesene, alemun kakan naka Parao ekabaka loko Misiri.

⁹ Aso do kojenutu ebe EJAKAIT Ekusideke, ŋes Edeke; Edeke lomunot, loericit aitutuket ka aitim kaneejaas lueminas ŋes, ka luericito aicorakinetake kiton aturio alukumit;

¹⁰ Eropi ŋupeŋul luelaito ŋes, amudiar kes: mam iyapi airop ŋipeŋin yenelait ŋes.

¹¹Kanuka ŋun irici aicorakinet, ka ikisila, ka itubesia lukecorak jo lolo aiswamaenen.

¹² “Kosodi kanen naarai ipupete itubesia lu, iricete aiswamaenen, itodoli EJAKAIT Ekusideke aitutuket ka aitim naabu kiyapoik lukapapaakus:

¹³ Ido kiminenena jo, kisirereŋenenei jo, kitupui jo: isirereŋi da aur naka akonikuan, ka araito naka alupokon, ka akimakon, ka ebinokon, ka akinyetekon, eiyas loka aitukukon ka amerekekinikon, kakwap naabu kiyapoik lukapapaakon ainakin jo.

¹⁴Kisirereŋio jo adepar ituŋa kere: emameun yenikiliokit arai yeniberu yenirakan kotomakus, karaida kobarenekus.

¹⁵ Elemari EJAKAIT adekesia kere kamakon; mam ibwaikini mamakon adio da kadekesia nueroko nuka Misiri, nuijeni ijo da, konye ibwaikini kes mama ejaas ŋul kere lukilaito jo.

¹⁶ Imudiari ituŋa kere lukijaikini EJAKAIT Ekonideke jo; mam akonikoŋu itimi kes: karaida aijaanakin ikecedekesio; naarai eraun ŋin atacit kamakon.

¹⁷ “Arai kitema kotaukon ebe, ‘Ipu atekerin ŋun adepar eoŋ; ademari eoŋ kes biai akecekwapin?’

¹⁸ Mam ikurianar kes: iituni jokan nuabu EJAKAIT Ekonideke kiswamak Parao, ka Misiri kere;

¹⁹Aigimoreta nukos nuapotu akonikonye koanyut, ka aanyuneta, ka nukaumokin, ka akan nakagogoŋ, ka akan naerioro, nakitolomunia EJAKAIT Ekonideke jo; iswamakini kwaŋin EJAKAIT Ekonideke ituŋa kere luikuriana ijo.

²⁰ Bobo da ijukari EJAKAIT Ekonideke ekaturuturut neejaas kesi, aitodol neetwakiata luideunos kakesi ka lueŋopete.

²¹ Mam ikurianar kes: naarai ejaenena EJAKAIT Ekonideke kajo, Edeke lokos loketasuro da.

²²Ireŋeari EJAKAIT Ekonideke atekerin ŋun motimot: mam imudiari kes katipet, kinyeis itiaŋ luka ais aiyatakin kamakon.

²³Konye kijaikini EJAKAIT Ekonideke jo kes, iticani kes kaiticaneta nukos, aitodol neemudiarere.

²⁴ Ijaikini ikabakanakec akanikon, itooliori Ijo ekecekiror kokwap kakuj: emamei ituŋanan yenikibwoikini jo, aitodol naimudiaria kes.

²⁵ Icwei aputosia nuegerer nuka idekesiokec: mam iŋobelei epuesa ka esabu loejaatar kesi; karaida ayaŋaun ŋes mamakon, kinyek aipok kanen: naarai erai naketal kaneejai EJAKAIT Ekonideke:

²⁶ Mam iyauni yeniketal togokon kinyek araun yenikenitoi kwape kaŋesi: italeori ŋes cut, ilai da ŋes cut; naarai erai ibore yenikenitoi.