Read Ateso Ikisila 9 Bible Online

Ikisila 9 - Ateso bible

Ikisila 9

¹ “Kopup, ijo Isirael: idokari ijo Yorodan lolo, alomar airum atekerin nuepolok nuegogoŋ da adepar jo, ireria luepolok luebwaitai kiton akuj.

² Ituŋa luepolok lueojak da, odwe luka Anakim, luijeni ijo, luipupu ijo ebakai ebe, ‘Iŋai epedori abwoikin odwe luka Anak?’

³ Kojen do lolo ebe, EJAKAIT Ekonideke ŋes lokiŋarenikinit jo bala akim naenyami; emudiari ŋesi kes, itukukumi kes kakonyenekon: ireŋeari ijo kes kwaŋin, imudiari kes atipet, kwape kilimokinia EJAKAIT jo.

⁴ “Sirikiner ijo kotaukon, kedau EJAKAIT aireŋear kes kakonyenekon ebe, ‘Kanuka adoliteka, ŋes kayaunia EJAKAIT eoŋ airum akwap na’: kwabo ereŋea EJAKAIT atekerin nu kakonyenekon kanuka aronisikec.

⁵ Mere kanuka adolitekon, karaida kanuka aitenara naka etaukon, ilomaria ijo airum akecekwap: konye kanuka aronis naka atekerin kaŋun ŋes ireŋeara EJAKAIT Ekonideke kes kakonyenekon, tetere iticasi akirot naabu EJAKAIT kiyapoik lukapapaakon, Aburaam, ka Isaak, ka Yakob.

⁶“Kojen do ebe mam EJAKAIT Ekonideke kiinakinit jo airum akwap na naejok kanuka adolitekon; naarai iraas yesi ituŋa lueninik imurisiŋa.

⁷ Kiitu, sirikiimurwok, kwape ibu kitunyunyurikinia EJAKAIT Ekonideke kamodiŋ: ageun kapaaran nailomunia kakwap nako Misiri aitodol naidolunioto aibois na, ipaliikinito EJAKAIT.

⁸ KoKoreb da, ipotu kitunyunyurikis EJAKAIT, abu EJAKAIT konyunyurik yes, tikimudiarit da.

⁹ Naadokaritor eoŋ moru aijaun amor, kes amor nuka aitutuket naetutukikinit EJAKAIT yes, kasodi aiboi komoru apaarasia akaisaoŋon ka akuaresia akaisaoŋon; mam abu kanyam atap, karaida aimat akipi.

¹⁰Kejaik EJAKAIT eoŋ amor ŋun aarei nuewadikatai kebokorit loka Edeke; ewadikatai kes kwape ejaatar akiro kere nuabu EJAKAIT kolimok yes komoru kokidiŋ kakim kapaaran naka atukokin.

¹¹Kosodi kedaunos apaarasia akaisaoŋon ka akuaresia akaisaoŋon, kainak EJAKAIT eoŋ amor ŋun aarei, kes amor nuka aitutuket.

¹² Katema EJAKAIT eoŋ atiar, ‘Konyou, kijesar atipet; naarai amunaunos ikonituŋa luitolomuni koMisiri; apaasi atipet korot loabu kecorak kes; asubut aput naacaluna.’

¹³ “Katema bobo EJAKAIT eoŋ atiar, ‘Aany ituŋa lu, ido koany, eraas ituŋa lueninik imurisiŋa:

¹⁴ Aso do kinyeinai, kamudia kes, kamwata ekecekiror kokwap kakuj: ketuluori jo ateker naegogoŋ naepol da adepar kes.’

¹⁵Kasodi kebelokin kejesun komoru, konoki emoru akim: kojaas da amor ŋun aarei nuka aitutuket akaninika aarei.

¹⁶Abu kasesen, ido koany, ipotu kodiakasi kama ejai EJAKAIT Ekusideke; ipotu kiswamaut itaok yenicaluna: ipotu kopaasi atipet korot lokicorakinit EJAKAIT yes.

¹⁷ Abu ketiŋ amor ŋun aarei, kacaka kes kakaninika, kabwaŋ kes kakonyenekus.

¹⁸ Abu kebiror kwap kakonyen nuka EJAKAIT, kwape kapak kaya, apaarasia akaisaoŋon ka akuaresia akaisaoŋon; mam abu kanyam atap karaida aimat akipi; kanuka adiakaretakus kere nuipotu kodiakasi, kanuka aswam nueroko kakonyen nuka EJAKAIT aitunyunyurikinia ŋes.

¹⁹ Naarai akuriana anyunyura ka akadakin naapol, nakinyunyurikinitor EJAKAIT amudiar yes, Konye abu EJAKAIT kapupok eoŋ kapak kaŋin da.

²⁰Abu EJAKAIT konyunyurik noi Aaron tiemudiarit ŋes: abu eoŋ kelipak Aaron da apak ŋipeŋin.

²¹ Abu kalem adiakaretekus, itaok yenipotu kosubut, kecwe ŋes kakim, kepudapud ŋes, kedupudupo, aitodol neasubia bala apua: kewelak apuake aguurut naijesuna komoru.

²² “KoTabera, ka Masa, ka Kiburot-kataaba da ipotu kitunyunyurikis EJAKAIT.

²³ Ido nakijukaria EJAKAIT yes koKades-barunea ebe, ‘Koloto, kirumata akwap nakainak yes’; ipotu kipaliikis aicorakinet naka EJAKAIT Ekusideke, koŋeroto aiyuun ŋes karaida apupun ekeporoto.

²⁴ Ipalionokis EJAKAIT ageun kapaaran nakajenunia yes.

²⁵“Kebiror do kwap kakonyen nuka EJAKAIT apaarasia akaisaoŋon ka akuaresia akaisaoŋon nuabu kebiror; naarai abu EJAKAIT kobala ebe ekoto amudiar yes.

²⁶ Abu kelip EJAKAIT ebe, ‘Wu EJAKAIT Edeke, sirikimudia ikonituŋa ka airumetekon, nailaku kapoloukon, naitolom koMisiri kakan nakagogoŋ.

²⁷Kiitu ikonibulesin, Aburaam, ka Isaak, ka Yakob; sirikite aninik naka ituŋa kalu, karaida aronisikec, karaida adiakaretekec:

²⁸ Kinyek akwap nakitolomunia ijo sio atemar ebe, “Naarai mam EJAKAIT abu kopedo aitolomar kes akwap naabu kisumun kes, ido naarai alait kes, ŋes etolomaria kes aarakin amodiŋ.”

²⁹ Kwabo eraas ikonituŋa, airumetekon da, naitolomuni ijo kapedorikon naepol ka akanikon naerioro.’