Read Ateso Yokana 1 Bible Online

Yokana 1 - Ateso bible

Yokana 1

¹ Kageunet ajai Akirot, ajai Akirot mama ejai Edeke, korai Akirot Edeke.

² Kojai ŋol kageunet mama ejai Edeke.

³ Kesubio iboro kere kanukeŋ; kemamei ŋesi mam kesubi ibore kere yenikesubio.

⁴ Kojai aijar tomakeŋ; korai aijar ŋin aica naka ituŋa.

⁵ Ecai aica kamuton, ido mam amuton ipikorit.

⁶ Kobu etuŋanan, lokijukuni Edeke, ekekiror Yokana.

⁷ Kobu ŋol araut ekajenan, tetere itejenuni nuka aica kaŋin, tetere iyuunete kere kanukeŋ.

⁸ Mam ŋol kerai aica ŋin, dimarai kobu tetere itejenuni nuka aica.

⁹Kejai aica nakabeit naecaikini ŋinituŋanan ebunit toma akwap.

¹⁰ Kejai ŋesi toma akwap, kesubio akwap kanukeŋ, ido mam akwap abu kojenu ŋes,

¹¹Abu kobu obukeŋ, ido ŋul lukeraas iketuŋa mam apotu kisukunyut.

¹² Konye ŋul kere lukisukunyunete ŋes, koinak apedor araut idwe luka Edeke, kes ŋul luiyuunito ekekiror:

¹³ lumam keurio kaokot, karaida koipud loka akuan, karaida koipud loka ekiliokit, dimarai kanuka Edeke.

¹⁴ Koraun akirot akuan, kiboiororoi kamawok, (kaanyut oni da akeibuses, aibuses naka eteluna lokebuni kama ka Papa,) ileleba asianut ka abeit.

¹⁵ Etejenuni Yokana nukeŋ, eworoi ebe, “Ŋol ŋes loabu eoŋ kabala ebe, ŋol loebunit kokaukaŋ arau lokageikini; naarai ajai ŋesi sek ageikin eoŋ.”

¹⁶ Ido kotoma ailelebake kipou kere kadumutu, asianut da itia asianut.

¹⁷ Naarai ikisila etorunere neejai Musa, konye asianut ka abeit etorunere neejai Yesu Kristo.

¹⁸ Emamei ituŋanan yeneanyunit Edeke kapakio kere; Okoku loteluna, loejai atorob naka Papa, ŋol ŋes etejenuni.

¹⁹ Na ŋes aitejenunet naka Yokana, naejukakiniata lyudayan isasedotin ka Ilebin anyoun koYerusalem, aiŋit ŋes ebe, “Iŋai bo ijo?”

²⁰ Kolimo, mam abu kogir, konye kolimo ebe, “Mam eoŋ arai Kristo.”

²¹ Kiŋita ŋes ebe, “Inyo bo do? Irai kereka ijo Eliya?” Kotema atiar, “Mam arai,” “Irai kereka ijo enabi je?” Koboŋok ebe, “Mam.”

²²Kanuka ŋun kotemasi ŋes atiar, “Iŋai bo do ijo? Kaboŋokisi kwi lukiijukunete. Ibala bo ijo ai kanukon?”

²³ Kotema atiar, “Arai eoŋ eporoto loka yeniworoi kamodiŋ ebe, ‘Kitetenata erot loka Ejakait,’ kwape kineritor enabi Isaia.”

²⁴Ejukunitai kes kama ejaas Iparisayon.

²⁵ Kiŋita ŋes, kotemasi atiar, “Kanukinyo ibatisaa, arai mam jo irai Kristo, arai Eliya, karaida enabi je?”

²⁶ Koboŋok Yokana kotema atiar, “Ebatisai eoŋ kakip; konye ebwoi kokidiŋikus lomam yes ijenete,

²⁷ ŋes ŋol loebunit kokaukaŋ, lomam kebusakinit eoŋ ailac arukan naka amukatake.”

²⁸ Eswamao ŋun koBetaniya okekwa Yorodan, neajai Yokana ibatisai.

²⁹ Kapaaran naatupakini koany Yesu ebunit mamake, kotema atiar, “Koany Imerekek yenika Edeke, yenelemari adiakar naka akwapin!

³⁰ Ŋol ŋes loabu eoŋ kenerite ebe, ‘Ebunit kokaukaŋ etuŋanan lokageikini, naarai ajai ŋesi sek ageikin eoŋ.’

³¹Kwabo mam abu kajeni ŋes; konye abu eoŋ kabu ebatisai kakipi tetere itodikinio ŋes Isirael.”

³² Kitejen Yokana ebe, “Aany Emoyo edokuni kokuju kwape kajele, kosal mamakeŋ.

³³ Kwabo mam abu kajeni ŋes; konye kabala ŋes lokejukuni eoŋ aibatis kakipi ebe, ‘Ŋol loianyuni Emoyo edokuni mamakeŋ kosalak, ŋes ŋol loibatisai kEmoyo Lokalaunan.’

³⁴ Aany eoŋ, etejen da ebe erai ŋol Okoku loka Edeke.”

³⁵Bobo da kapaaran naatupakini kobwoi Yokana nepepe kikekesisiak iarei;

³⁶ kosesen Yesu elosi, kotema atiar, “Koany Imerekek yenika Edeke!”

³⁷Kiirasi ikesisiak ŋul iarei inera ŋesi, kotupasi Yesu.

³⁸Kibelokin Yesu koany etupito ŋes, kotema kes atiar, “Imoete inyo?” Kotemasi ŋes atiar, “Rabi, (apolouke Ekesisianakinan,) iboie kai?”

³⁹Kotema kes atiar, “Kopotu ianyunete.” Koloto, koanyutu nekiboio; kosalakis mamakeŋ apaaran ŋin, naarai kerai bala esawa lokitomonet.

⁴⁰ Anderea, onaceke ka Simon Petero, ŋes arai ediopet kaluarei lueirarete Yokana, kotupasi Yesu.

⁴¹ Kodum ber ŋesi Simon onaceke, kotema ŋes atiar, “Kidumu Mesia,” (apolouke ebe Kristo).

⁴² Koyaŋa ŋes mama ejai Yesu. Kosesen Yesu ŋes, kotema atiar, “Ijo Simon okoku loka Yokana, Kinyarao Kepa” (apolouke ebe Petero, arai Amoru).

⁴³ Kapaaran naatupakini kokoto alosit Galilaya, kodum Pilip kotema ŋes atiar, “Kotupunai.”

⁴⁴Kerai Pilip loko Betesaida, ere loka Anderea ka Petero.

⁴⁵ Kodum Pilip Natanael, kotema ŋes atiar, “Kidum ŋol lokiwadikai Musa kotoma okisila, ka inabin da, Yesu loko Nasaret, okoku loka Yosep.”

⁴⁶ Kotema Natanael ŋes atiar, “Epedori tope ibore yenejok alomun koNasaret?” Kotema Pilip atiar, “Bia koany.”

⁴⁷ Koany Yesu Natanael ebunit mamakeŋ, kiner nuke ebe, “Koany, lokIsirael obe, loemamei aimod kotomakeŋ!”

⁴⁸Kotema Natanael ŋes atiar, “Kikonakini ai kijenuni eoŋ?” Koboŋok Yesu ebe, “Eriŋa Pilip kenyarauna jo, naijaar kwap ketiŋi abu kaany jo.”

⁴⁹ Koboŋok Natanael ebe, “Rabi, irai ijo Okoku loka Edeke! Irai ijo Ekabaka loka Isirael!”

⁵⁰Koboŋok Yesu ebe, “Naarai kalimok jo ebe abu kaany jo kwap ketiŋi, ŋes iyuunia? Ianyuni akiro nuepolok aitelekarit nu.”

⁵¹ Kotema ŋes atiar, “Abeit, abeit, katemari yes atiar, Ianyunete akuj eŋaara, ka imalaikan luka Edeke edokarete edokunete da mama ejai Okoku loka etuŋanan.”