Read Ateso Yokana 11 Bible Online

Yokana 11 - Ateso bible

Yokana 11

¹ Kodeka etuŋanan, ekekiror Lasaro loko Betaniya, lokorekec loka Mariam ka Marita kinacike.

² Ŋes Mariam nakinyonyoanakini Ejakait akinyet, konina akekeje kitimake, ŋipeŋin nakedeka onaceke Lasaro.

³Aso kiyakiasi ainacan ŋun mama ejai Yesu ebe, “Ejakait, edeka ŋol loimina ijo.”

⁴ Konye nakiiraria Yesu kobala ebe, “Adeka na mam erai nakatwanare; konye kanuka aibuses naka Edeke, tetere itopoloorio Okoku loka Edeke kanuka ŋun.”

⁵Komina Yesu Marita ka inacike, ka Lasaro da.

⁶Aso nakiiraria ebe edek, kosalak nekejai apaarasia aarei,

⁷Kosodi kokau kaŋun kotema ikekesisiak atiar, “Kaloto bobo Yudaya.”

⁸ Kotemasi ŋes ikekesisiak atiar, “Rabi, koloje kwape kwana kikotos Iyudayan aibiribir kamor, ilosi teni bobo ŋipeŋina?”

⁹ Koboŋok Yesu ebe, “Mam kereka eraas isawan luka paaran itomon ka luarei? Arai elosi ituŋanan paaran mam iguikini, naarai eanyuni aica naka akwapin kanu.

¹⁰ Konye arai kelot kuare, iguikini, naarai emamei aica kotomakeŋ.”

¹¹ Kinera ŋun, kosodi kotema kes atiar, “Opaperowok Lasaro ejotoi, konye alosi eoŋ ketwekeny.”

¹²Kotemasi ikekesisiak ebe, “Ejakait, arai ejotoi, eŋaleuni.”

¹³Konye kinera Yesu nuka atwanareke, koomitos kesi ebe enera akiro nuka ajo.

¹⁴Kosodi kolimok Yesu kes kaitebeikin ebe, “Atwana Lasaro.

¹⁵ Ido eyalamikin eoŋ kanukus naarai amamei eoŋ kaŋina, tetere iyuunete. Konye kaloto do mamakeŋ.”

¹⁶ Kosodi Tomas loenyaritai Didumo[1] kobala ikepaup ikesisiak ebe, “Kaloto oni da, katwaka nepepe kaŋes.”

¹⁷Kosodi nakedolio Yesu kodum edaunit ŋesi apaarasia aoŋon kates,

¹⁸Keapias Betaniya ka Yerusalem, bala amairon aarei,

¹⁹keponitos ituŋa luipu ko Yudayan mama ejai Marita ka Mariam aipudun kes kanuka onacekec.

²⁰Kosodi nakiiraria Marita ebe ebunit Yesu, kolot aisiriam ŋes; kosalakinite Mariam togo.

²¹ Kosodi kotema Marita Yesu atiar, “Ejakait, arai kijai ijo ne, timam onaceka ketwana.

²²Konye kwana da ajeni ebe kere nuilipi ijo Edeke kiinakini Edeke.”

²³Kotema Yesu ŋes atiar, “Ejaruni onacekon.”

²⁴ Kotema Marita ŋes atiar, “Ajeni ebe ejaruni kotoma ajarun naka apaaran nakawasia.”

²⁵Kotema Yesu ŋes atiar, “Arai eoŋ ajarun ka aijar da; ŋin yenikeyuuni eoŋ, karaida ketwana, ejari.

²⁶ Ŋin da yenejari yenikeyuuni eoŋ mam etwani ikar kere. Iyuunit kereka ijo ŋun?”

²⁷ Kotema ŋes atiar, “Eebo, Ejakait; eyuunit eoŋ ebe irai ijo Kristo, Okoku loka Edeke, loebunit akwapin.”

²⁸Nakedaunia einer ŋun, kolot, konyarau kinacike Mariam kaiyeiyea, kobala ebe, “Ejai Ekesisianakinan ne, kinyarit jo.”

²⁹Nakiiraria ŋesi ŋun, kodetun atipet, kolot mamakeŋ.

³⁰ Aroko Yesu edoluno ore, konye aroko ejai aibois naesiriamia Marita.

³¹Kosodete Iyudayan luajaas ka Mariam togo ipudunete, nakeanyuniata edetun atipet ka alomar kiŋa, kotupasi ŋes, koomito ebe elosi ates aimony ŋina.

³² Kosodi nakedolio Mariam nekejai Yesu, koany ŋes, kibirokin akejeke, kotema atiar, “Ejakait, arai kijai ijo ne timam onaceka ketwana.”

³³ Nakeanyunia Yesu ŋes emonyi, ka Iyudayan da lukeupas kaŋes emonyete, komulau eketau, kokadak,

³⁴kotema atiar, “Ibwaikinito ai?” Kotemasi ŋes atiar, “Ejakait, bia koany.”

³⁵ Komony Yesu,

³⁶Kosodete kotemasi Iyudayan atiar, “Koany, kwape lem keminar ŋes!”

³⁷Konye kobalasi ice kakesi ebe, “Ŋol lokitwekenyuni akonye nuka emuduki mam tikepedo aisimik ŋol atwanare?”

³⁸ Kosodi Yesu, komulau bobo eketau, kodol ates; kerai abua, kerapakinitai amoru.

³⁹ Kotema Yesu atiar, “Kolemasi amoru.” Kobala Marita inac naka lokatwan ebe, “Ejakait, eur kwana, naarai edaunit apaarasia aoŋon etwanit.”

⁴⁰ Kotema Yesu ŋes atiar, “Mam kereka kalimokinit jo ebe arai iyuunit, ianyuni aibuses naka Edeke?”

⁴¹Kosodete kolemasi amoru. Kikeu Yesu akekonye akuj, kotema atiar, “Kemalai jo Papa, naarai kiira eoŋ.

⁴² Kajen ebe kiiranari eoŋ apaarasia kere, konye kener nu kanuka ekodet kalo loejai ne, tetere iyuunete ebe jo kijukunit eoŋ.”

⁴³Nakedaunia einer ŋun, kiworo keporoto loepol ebe, “Lasaro, kolom.”

⁴⁴Kolom lokatwan, eenitai akanin ka akeje kigoen luka aida; eenitai akekonye da keitabala. Kotema Yesu kes atiar, “Kolacasi ŋes, koosikis kolot.”

⁴⁵ Kosodete kiyuutu ŋes luipu kotoma oYudayan lukeponito mama ejai Mariam, lukeanyunito nueswamat Yesu.

⁴⁶Konye ice kakesi koloto mama ejaas Iparisayon, kolimokis nukiswamai Yesu.

⁴⁷Kosodete isasedotin lupeti ka Iparisayon kotukokis aurianet, kobalas ebe, “Kikwaikini ai? Naarai iswamai etuŋanan ŋol aanyuneta nuipu.

⁴⁸Arai kiinyei, iyuunete ŋes ituŋa kere: epote Iromayon kidemarete oni aiboisiwok ka awokoteker da.”

⁴⁹Konye ediopet kakesi, ŋes Kaiapa, lokerai losasedoti lopeti kokaru kaŋol, kotema kes atiar, “Mam ijenete adiokirot kere.

⁵⁰ Kwabo mam iwomito ebe ibusakinit ediopetuŋanan atwanare kanuka ituŋa, kinye ateker kere amudiar.”

⁵¹ Mam ŋes kinera akirot ŋin kanukeŋ bon; konye naarai kerai losasedoti lopeti kokaru kaŋol, abu kodwar ebe etwani Yesu kanuka ateker;

⁵² kwabo mere kanuka ateker kaŋin bon, konye tetere etukokini nepepe idwe luka Edeke lukisiarakinos araut ipe,

⁵³Ameun kapaaran kaŋin kinerut nuka aiar ŋes.

⁵⁴Kanuka ŋun mam bobo Yesu alosi kaitebeikin kotoma oYudayan, konye konyou kaŋina kolot aibois naeapias kamodiŋ, kiton ore loenyaritai Epuraim; kosal ŋina nenipe kikekesisiak.

⁵⁵ Keapie Aleleŋ naka Iyudayan; kodokasi luipu Yerusalem anyoun kamanat aliŋakin Aleleŋ, tetere italaunos.

⁵⁶Kosodete komoata Yesu, kineranakinos ebwoete koyekalu ebe, “Iwomito inyo? Mam kereka ŋes ebuni opucit lo?”

⁵⁷Kicorakinito isasedotin lupeti ka Iparisayon ebe arai kejenu ituŋanan neejai, kitejenu kes, tetere ikamunete.