Read Ateso Yokana 14 Bible Online

Yokana 14 - Ateso bible

Yokana 14

¹ “Sirikiyaloŋoŋoto ikusitauon; kiyuutu Edeke, eoŋ da kiyuunai.

²Togo loka Papaka ejaas aiboisio nuipu; arai mere kwaŋin tikalimokis kereka yes ebe alosi aitemokin yes aibois?

³ Arai kalot eoŋ aitemokin yes aibois, aboŋuni bobo kesukunyu yes mamakaŋ, tetere neajai eoŋ ijaikinos yesi da nen.

⁴Ijenete yesi erot loalosi eoŋ,”

⁵Kotema Tomas atiar, “Ejakait, mam sio kijeni neilosi ijo; kijenuni biai erot?”

⁶ Kotema Yesu atiar, “Arai eoŋ erot, ka abeit, ka aijar da; emamei yenebuni mama ejai Papa, dimikito itorit tomakaŋ.

⁷Arai kiijenete eoŋ, tikijenutu Papaka da; amear kwana ijenete ŋes, ianyut da.”

⁸Kotema Pilip atiar, “Ejakait, kitodikinai Papa, kidauni.”

⁹ Kotema Yesu atiar, “Ajai lem eoŋ kayes apak naetia nen kere, mam jo da kijeni eoŋ, Pilip? Yenikaanyunit eoŋ, eanyunit Papa; aso biai bo ibalar ijo ebe, ‘Kitodikinai Papa’?

¹⁰ Mam kereka jo iyuunit ebe ajai eoŋ toma Papa, Papa da tomakaŋ? Akiro nuabala yes mam enera kanukaŋ bon; konye Papa loiboie tomakaŋ iswamai akeswamisio.

¹¹ Kiyuunai ebe ajai eoŋ toma Papa, Papa da tomakaŋ; arai mere kwaŋin, kiyuunai kanuka aswamisio akulepek.

¹² “Abeit, abeit, katemari yes atiar, Yenikeyuuni eoŋ, iswamai ŋesi da aswamisio nueswamai eoŋ; iswamai da aswamisio nuitelekarito ŋun, naarai alosi neejai Papa.

¹³ Akirot kere nailipete kokirorika, eswamai ŋin, tetere itopoloorio Papa kotoma Okoku;

¹⁴ Arai kilipa akirot kere kokirorika, eswamai ŋin.

¹⁵ “Arai kiminas eoŋ, iricete akaicorakineta.

¹⁶ Eoŋ da elipi Papa, kiinakini ŋesi yes Ekayuunan ece, tetere ejaenena kayes ikar kere,

¹⁷ ŋes Emoyo lokabeit, lomam epedorete akwapin adumun; naarai mam eanyunete ŋes karaida ajenun; ijenete yesi ŋes; naarai esalit mamakus, ejaenena da tomakus.

¹⁸“Mam kenyeinete yes iraas ikokiok; abuni mama ijaas.

¹⁹ Apak edit mam kaanyunete bobo akwapin; konye yes kianyunete; naarai ajari eoŋ, yes da ijarete.

²⁰ Kapaaran kaŋin ijenunete ebe ajai eoŋ toma Papaka, yes da tomakaŋ, eoŋ da tomakus.

²¹ Ŋin yenejaas kakaicorakineta, koricite da kes, ŋin ŋes kamina eoŋ: ŋin da yenikamina eoŋ, eminuni Papaka, eoŋ da aminuni ŋes ka aitakanikin mamake.”

²² Kotema Yuda (mere Isikariot) atiar, “Ejakait, ikwaikini ai ikoto aitakanikin mamakosi, kwabo mere akwapin?”

²³ Koboŋok Yesu ebe, “Arai kamina ituŋanan, erici da akakirot, eminuni Papaka, sio da kiponi mamakeŋ kitarauni ŋes ekosire.

²⁴ Ŋin yenimam kamina eoŋ, mam erici akakiro; akirot da naiirarete mam erai nakaŋ dimarai naka Papa lokejukuni.

²⁵“Kalimokis yes akiro ŋun, naariŋar ajai kayes.

²⁶ Konye Ekayuunan, ŋes Emoyo Lokalaunan, loijukuni Papa kokirorika, kisisianakini ŋol yes akiro kere, kisiituni da kere nukalimokinit yes.

²⁷ Kenyeiniata ainapakin; kainak yes akainapakin; mere kwape einakiniata akwapin, kainakinia eoŋ yes. Sirikiyaloŋoŋoto ikusitauon, kinyeis da akurian.

²⁸ Ipuput eoŋ abala ebe, Alosi eoŋ, abuni da bobo mama ijaas. Arai kiiminasi eoŋ, tikilakaros, naarai alosi mama ejai Papa; naarai Papa ŋes lokapolon adepar eoŋ.

²⁹ Kwana da kalimok yes eriŋa edoluno, tetere naedolunio, kiyuut.

³⁰ Mam bobo kinera kayes akiro nuipu, naarai ebunit ekapolon loka akwapin kanu. Konye emamei ŋes adiokirot kotomakaŋ;

³¹ konye eswamai eoŋ kwape kecorakinitor Papa, tetere ejenunete akwapin ebe amina eoŋ Papa. Konyoutu do, kaloto kane.