Read Ateso Yokana 19 Bible Online

Yokana 19 - Ateso bible

Yokana 19

¹Kosodi Pilato koyaŋa Yesu, koda ŋes.

²Kojeata iserikalei aboko naka ikukwa, kitanapikis akouke, kitanapata da anapito naamuge;

³ koponenenete mama ejai, kobalas ebe, “Yoga, Ekabaka loka Iyudayan!” Kibapanasi ŋes.

⁴Kosodi kolom bobo Pilato kiŋa, kotema kes atiar, “Koany ayaŋauni ŋes kiŋa mama ijaas, tetere ijenunete ebe mam eoŋ aanyunit adioronis kamakeŋ.”

⁵Kolom do Yesu, enapit aboko naka ikukwa ka anapito naamuge, Kotema Pilato kes atiar, “Koany etuŋanan!”

⁶Kosodete keanyutu isasedotin lupeti ka ikapolokitok, kiworoto ebe, “Kibubuk, kibubuk ba!” Kotema Pilato kes atiar, “Koyaŋaasi yesi, kibubukis, naarai mam eoŋ aanyunit adioronis kamakeŋ.”

⁷ Koboŋokis Iyudayan ebe, “Ejai sio ekisil, ido kanuka ekisil kaŋol ibusakinit ŋes atwanare, naarai abu kitarauna bon Okoku loka Edeke.”

⁸Kosodi nakiiraria Pilato akirot ŋin, kiyatak akurianar;

⁹koloma bobo oPuraitorion[2] kotema Yesu atiar, “Laali bo kibunio?” Konye mam Yesu eboŋokino.

¹⁰Kanuka ŋun kotema Pilato ŋes atiar, “Mam inera keoŋ? Mam ijeni ebe ejai eoŋ apedor aosikin jo, ejai da apedor aibubukin?”

¹¹ Koboŋok Yesu ebe, “Ti mam jo ijaas kapedor kere mamakaŋ, arai mam kidumunit abunore kokuju; kanuka ŋun ŋol lokejaikini eoŋ akaninikon ŋes erono adepar.”

¹² Ageun kapak kaŋin komoote Pilato aosikin ŋes, konye kiworoto Iyudayan ebe, “Arai kiwosik lo, mam irai epapero loka Kaisar; ŋolituŋanan loedakakini bon araun ekabaka itokokoli Kaisar.”

¹³Nakiiraria Pilato akiro ŋun, kitolom Yesu kiŋa, kiboikin oicoloŋ loka aitub, aibois naenyaritai Amor Nuepesitai, konye kAburanian enyaritai Gabata.

¹⁴Kerai da apaaran naka Aitemokin Aleleŋ; kerai bala esawa lokikanyetekape. Kotema Pilato Iyudayan atiar, “Koany, Ekabakakus!”

¹⁵ Kanuka ŋun kiworoto ŋul ebe, “Kolema, kolema, kibubuk!” Pilato kotema kes atiar, “Ebubukini kereka Ekabakakus?” Koboŋokis isasedotin lupeti ebe, “Emamei sio ekabaka ece dimarai Kaisar.”

¹⁶ Kosodi kijaik ŋes akaninikec aibubukinio.

¹⁷Koyata Yesu, koloma, erioŋit ekemusalaba kiton aibois naenyaritai Abelekek naka Akou, kAburanian ebe Gologota.

¹⁸Kibubukis nen, ka ice iarei nenipe kaŋes, ediopet epuai ka ece da epuai, ka Yesu kidiŋikec.

¹⁹Kiwadik Pilato aitejenunet, kikajak omusalaba; ewadikatai ebe, “YESU LOKO NASARET, EKABAKA LOKA IYUDAYAN.”

²⁰Kosioma luipu koYudayan aitejenunet ŋin, naarai keapie aibois nakibubukinitoi Yesu kore; kiwadikatai kAburanian, ka Aromayon, ka Ayonanin da.

²¹Kosodete isasedotin lupeti luka Iyudayan kotemasi Pilato atiar, “Sirikiwadika ebe, ‘Ekabaka loka lyudayan’, dimarai ebe, ‘Abala ŋesi ebe Eoŋ ekabaka loka Iyudayan.’ ”

²²Koboŋok Pilato ebe, “Nuewadik, ewadik.”

²³Nakedauniata iserikalei aibubukin Yesu, koyaŋaasi akenapito kokora katutubeta aoŋon, ŋoliserikalet nakeŋ, ka ekaso da. Konye ekasoke kemamei airiamasit, naarai kejeitai ameun kokuju kiton kwap;

²⁴ Kotemanaros bonik atiar, “Sirikiicil, konye kelamilamakisi eroet aanyun iŋai ebeikini.” Tetere edolete nukiwadikatai ebe, “Akorokorata anapitoka, Kilamilamata kanuka ekasoka.” Kiswamata iserikalei kwaŋin.

²⁵Konye kobwoete totoke ka inaci naka totoke, ŋes Mariam aberu naka Kelopa, ka Mariam Magadalene, eapiete kemusalaba loka Yesu.

²⁶ Kosodi keanyu Yesu totoke, ka ekesisian lokemina ebwoi kodie, kotema totoke atiar, “Toto, koany okokukon!”

²⁷Kosodi kotema ŋesi ekesisian atiar, “Koany totokon!” Ameun kosawa kaŋol koyaŋa ekesisian ŋin oreke.

²⁸ Kokau kaŋun, kojeni Yesu ebe aŋetakinos kere, tetere itodolikini nakiwadikatai kobala ebe, “Kajak akur.”

²⁹ Kejai nen amot naeleleba ebino loedwar; kibwaikis acago naileleba ebino ŋol loedwar kuju akwara, kikiasi kiton aitukuke.

³⁰Kedau Yesu aijaikinio ebino loedwar, kobala ebe, “Aŋetakinos.” Kitulur akekou, kijaik ekemoyo.

³¹ Aso naarai kerai apaaran naka Aitemonokin, kinyeis awat asalakin omusalaba apaaran nakasabato (naarai kerai nakasabato ŋin apaaran nakapolon), ŋes kilipiata Iyudayan Pilato akejekec abilio, tetere elemunio.

³²Kopotu do iserikalei kobilata akeje nuka losodit, ka nuka lokiareit lokibubukinitoi nenipe kaŋes;

³³konye kedolokis Yesu koanyut ebe kedau nan atwanare, mam ebila akejeke,

³⁴Konye ediopet koserikalei kicum amaranake kakwara, atipet kolomutu aokot ka akipi.

³⁵Ŋol da lokeanyuni itejenunit, ido akeitejenunet erai nakabeit, ŋes da ejeni ebe inera abeit, tetere yes da iyuunete.

³⁶ Naarai kedoikinete ŋun tetere edoli nakiwadikatai ebe, “Mam ebilio akekoit.”

³⁷ Ka nakiwadikatai ace da ebala ebe, “Esesenete moolo ŋol lokicumete.”

³⁸ Kokau kaŋun abu Yosep loka Arimataya lokerai ekesisian loka Yesu, konye kaiyeiyea kanuka akurian Iyudayan, kilip Pilato apedor alemar akuan naka Yesu: kisiik Pilato. Kosodi kolot, kolema akuanake.

³⁹ Kolot Nikodemo da, lokelosit ber mama ejai ŋesi kuare, koyaŋa lukesaete ka icicikwa luinyalal, bala alaŋir naka ilatirin akwatat.

⁴⁰Kosodete kolemut akuan naka Yesu, konunukikis ogoen luka ebaputa nepepe kalukesai, kwape ejaar epone loka Iyudayan loka aida.

⁴¹Nepenen nekibubukinitoi kejai emanikor; ido toma omanikor kejai ates nakitetet namam lem kibwaikinitai idiotuŋanan.

⁴²Kosodi kanuka Aitemonokin naka Iyudayan, kibwaikis Yesu nen, naarai aapie ates.