Read Ateso Yokana 20 Bible Online

Yokana 20 - Ateso bible

Yokana 20

¹ Apaaran nasodit nakasabato kodil Mariam Magadalene alosit ates, eroko emutono akwap, koany amoru ikokororitai awai kates.

² Koker, kolot mama ejai Simon Petero ka ekesisian ŋol lokemina Yesu, kolimok kes ebe, “Kelemar Ejakait kates, mam kijeni neibwaikinitai.”

³Kosodi konyou Petero ka ekesisian ece, koloto ates,

⁴Kokerata kere iarei, konye kilany ekesisian ŋol Petero, koliŋ adolore ates;

⁵kokukum, kireik toma, koany igoen lukebaputa ejaas nen, konye mam abu koloma.

⁶Kosodi kodolu Simon Petero da, etupakinit ŋes, koloma toma ates; koany igoen lukebaputa ejaas nen,

⁷ ka eitabala, lokejai akouke, mam kejaas kigoen lukebaputa konye kenunukitoi kaiboisike bon.

⁸Kosodi koloma da ekesisian ece, lokeliŋi adolore ates, koany ŋesi kiyuu da;

⁹ naarai mam ber kes ajenunito nakiwadikatai ebe ibusakinit ŋes ajarun,

¹⁰Kosodete koboŋosi bobo ikesisiak oreriakec.

¹¹Konye kebwoi Mariam kokiŋa eapie kates emonyi, napemonyi kokukum kireik toma ates;

¹²koany imalaikan iarei lukenapito luakwaŋak, iboiete, ediopet kakou, ediopet da kakejen kanekiperikinitoi akuan naka Yesu.

¹³Kes da kotemasi ŋes atiar, “Imonyi inyo, toto?” Kotema kes atiar, “Naarai kelemar Ekajakait, mam ajeni neibwaikinitai.”

¹⁴Kedau einer ŋun kibelokin kau koany Yesu ebwoi, komam ejeni ebe ŋes Yesu,

¹⁵Kotema Yesu ŋes atiar, “Imonyi inyo, toto? Imoi iŋai?” Konye ŋin koomite ŋes araut ekeswaman emanikor, kotema atiar, “Ejakait, arai ilemarit ijo ŋes, kolimokinai neibwaikinit, eoŋ da ayaŋaari.”

¹⁶Kotema Yesu ŋes atiar, “Mariam,” Kibelokin ŋesi kotema kAburanian atiar, “Raboni!” (Ŋes atemar ebe, “Ekesisianakinan,”)

¹⁷ Kotema Yesu ŋes atiar, “Sirikitiŋ eoŋ, naarai eriŋa edokara mama ejai Papa; konye kolot mama ejaas ikainacan kolimok kes ebe, Adokari alosit mama ejai Papaka, ŋes Papakus da, mama ejai Ekadeke, ŋes Ekusideke da.”

¹⁸Kolot Mariam Magadalene kolimok ikesisiak ebe, “Aanyu eoŋ Ejakait.” Kolimok da kes nuabu kinera kaŋes.

¹⁹ Kosodi kikamus apaaran ŋin nasodit naka asabato, kegolol ikekia kaneajaas ikesisiak kanuka akurian Iyudayan, kobu Yesu kobwo kokidiŋikec, kotema kes atiar, “Kinapakinos,”

²⁰ Kedau einer ŋun, kitodik kes akekanin ka akemarana. Kosodete kiyalamikinos ikesisiak nakeanyuniata Ejakait.

²¹ Kotema Yesu kes bobo atiar, “Kinapakinos. Kwape keyakuunia Papa, eoŋ da keyakiari yes kwape kwaŋin.”

²² Kosodi kedau einer ŋun, kiyeŋak kes, kotema atiar, “Kijautu Emoyo Lokalaunan.

²³ Arai isioniete adiakanareta nuka ituŋanan kere, isionio; arai da ienete adiakanareta nuka ituŋanan kere, eenio.”

²⁴ Konye ediopet ka lutomon kaarei, ŋes Tomas lokenyaritai Didumo[3] mam kejaas kakes nakebunio Yesu.

²⁵ Aso kolimokis ikesisiak ice ŋes ebe, “Kianyu Ejakait.” Konye kotema atiar, “Arai mam eoŋ aanyunit apoorei nuka aseito kakaninike, ka aibwaikin da ikabokor apedon nuka aseito, ka aibwaikin akakan toma amaranake, mam eoŋ eyuuni nepetai da.”

²⁶ Ketuboros apaarasia akanykauni kojaas bobo ikekesisiak togo, kojai Tomas da nepepe kakes. Kegolol ikekia konye kobu Yesu kobwo kokidiŋikec, kotema atiar, “Kinapakinos,”

²⁷Kosodi kotema ŋesi Tomas atiar, “Koyau ne ekonibokorit, koany akakanin; koyau da akonikan, kibwaik toma amaranaka; kwabo sirikiraun lomam iyuunit, dimarai loiyuunit.”

²⁸ Koboŋok Tomas ebe, “Ekajakait, Ekadeke da!”

²⁹ Yesu kotema ŋes atiar, “Naarai kiany eoŋ ŋes konyet iyuunia? Isirereŋitoi luiyuunete komam eanyunito.”

³⁰Kiswama Yesu aanyuneta ace nuipu kakonyen nuka ikesisiak, numam iwadikatai oitabo lo;

³¹ konye iwadikatai nu tetere iyuunete yesi ebe Yesu ŋes Kristo, Okoku loka Edeke, ido kanuka aiyuun ŋin kojaut kaijar kokirorikeŋ.