Read Ateso Yokana 3 Bible Online

Yokana 3 - Ateso bible

Yokana 3

¹ Kojai etuŋanan loka Iparisayon, ekekiror Nikodemo, ekayaiton loka Iyudayan.

² Kobu ŋol mama ejai Yesu kuare, kotema ŋes atiar, “Rabi, kijeni ebe irai ijo Ekesisianakinan loibunit kama ejai Edeke; naarai emamei ituŋanan yenepedori aswam aanyuneta nu nuiswamai ijo, dimikito ejai Edeke kaŋes.”

³ Koboŋok Yesu kotema ŋes atiar, “Abeit, abeit, katemari jo atiar, Arai mam ituŋanan eurio nakiareit, mam epedori aanyun ajakanut naka Edeke.”

⁴Kobala Nikodemo ŋes ebe, “Ikwaikini ai ituŋanan eurio kemojoŋ? Epedori kereka airucakin alomar akoik naka totoke, kouriai?”

⁵ Koboŋok Yesu ebe, “Abeit, abeit, katemari jo atiar, Arai mam ituŋanan eurio kakipi ka Emoyo, mam epedori alomun ajakanut naka Edeke.

⁶ Ibore yeneuriei akuan erai akuan; ka yeneuriei Emoyo erai emoyo,

⁷Sirikiwumok naarai kabala jo ebe, Ibusakinit yes aurio nakiareit.

⁸ Ekusi ekwam mama ekot, ipupi airurumake; konye mam ipedori aijen kama kebunio, karaida mama ebei; ikoni nen ŋinituŋanan yeneuriei Emoyo.”

⁹Koboŋok Nikodemo kotema ŋes atiar, “Ikwaikinete ŋun ai epedoros?”

¹⁰Koboŋok Yesu kotema ŋes atiar, “Irai tope ijo ekesisianakinan loka Isirael, komam ijeni akiro ŋun?

¹¹ Abeit, abeit, katemari jo atiar, Kinera nukijeni, kitejenuni da nukianyunit; konye do mam yes icamunito akosiitejenun.

¹² Arai abu kalimok yes akiro nuka akwap komam iyuunete, ikote Iyuunete ai arai kaalimokis akiro nuka akuj?

¹³ Emamei yenabu kodokarite toma akuj, dimarai ŋol lokedokuni kotoma akuj, ŋes Okoku loka etuŋanan.

¹⁴ Kwape kolo kikajakinia Musa emun kamodiŋ, ibusakinit Okoku loka etuŋanan da aikajakinio kwape kwaŋin:

¹⁵tetere ŋinituŋanan yeniyuuni ŋes kojaas kaijar naka ikar kere.”

¹⁶ Naarai komina Edeke akwapin kwanata, abu koinak Okokuke loteluna, tetere ŋinituŋanan yeniyuuni ŋes kinye aolior, konye kojaas kaijar naka ikar kere.

¹⁷ Naarai mam Edeke ejukunit Okokuke akwapin tetere itelekarete akwapin akiro, dimarai tetere itajario akwapin kanukeŋ.

¹⁸ Ŋin yeniyuuni ŋes mam itelekarete akiro; yenimam iyuuni ŋes adaut akiro aitelekar, naarai mam abu kiyuu ekiror loka Okoku loteluna loka Edeke.

¹⁹ Lo da ŋes etube, ebe abu aica kobu akwapin, konye kominas ituŋa amuton aitelekarit aica, naarai aroko aswamisiokec.

²⁰ Naarai ŋinituŋanan yeniswamai nueroko elait aica, kwabo mam ebuni neejai aica, kinyeis akeswamisio aideleleun.

²¹Konye yeniswamai nukabeit ebuni neejai aica, tetere etakanete akeswamisio, ebe iswamatai kotoma Edeke.

²² Kokau kaŋun kolot Yesu ka ikekesisiak akwap nako Yudaya; kiboie kaŋina nepepe kakes ibatisai.

²³ Kibatisai Yokana da kAenon naeapias ka Salim, naarai kejaas akipi nuipu nen; kolosenenete ituŋa mamakeŋ kibatisai.

²⁴ Naarai koriŋa Yokana eenikina aidaris.

²⁵Aso kojau epeget ikekesisiak luka Yokana ka Eyudayat kanuka aitalaun.

²⁶ Koloto mama ejai Yokana, kotemasi atiar, “Rabi, ŋol loajai nenipe kajo okekwa Yorodan, lokitejenunit, koany, ibatisai ŋol, ido elosenenete ituŋa kere mamakeŋ.”

²⁷ Koboŋok Yokana ebe, “Mam epedori ituŋanan adumun akirot kere dimikito einakinitai abunore kotoma akuj.

²⁸ Itejenut yesi ikulepek ebe, abu kener ebe, Mam eoŋ arai Kristo, dimarai kejukunitai aiŋarenikin ŋes.

²⁹ Loejaas kateran ŋes eteran; konye epapero loka eteran, loebwoi iirari ŋes, elelakinit noi eporoto loka eteran; aso adol do akaiyalama ŋin.

³⁰ Ibusakinit ŋes aiyatakin, konye eoŋ aiŋoŋar.”

³¹ Ŋol loebuni kokuju eyait kere; ŋol loerai loka akwap erai loka akwap, inera nuka akwap; ŋol loebuni kokuju eyait kere.

³² Itejenuni ŋun nueanyunit ka nuiirarit da, kwabo emamei yeniyuuni akeitejenun.

³³Yeniyuunit akeitejenun itogogoŋit ebe Edeke ŋes abeit.

³⁴ Naarai lokijukuni Edeke inera akiro nuka Edeke: naarai mam Edeke einakini Emoyo kaitemis.

³⁵ Emina Papa Okoku, ititiŋit iboro kere.

³⁶ Yeniyuuni Okoku ejaas kaijar naka ikar kere; konye yenimam erima Okoku mam eanyuni aijar, konye esalakini ŋes anyunyura naka Edeke.