Read Ateso Yokana 8 Bible Online

Yokana 8 - Ateso bible

Yokana 8

²Koboŋo tupuruc sek oyekalu, kopotu ituŋa kere mamakeŋ; kiboikin kogeu aisisianakin kes.

³Koyaut ikewadikak ka Iparisayon aberu naekamunitai kadoteu; kibwaikis kidiŋ,

⁴kobalas ŋes ebe, “Ekesisianakinan, ikamunitai aberu na edotei.

⁵ Aso kotoma okisila abu Musa kicorak aibiribir nuikote nen kamor; aso ca ibala bo ijo ai?”

⁶Kinerasi kesi akiro ŋun ekodunete ŋes, tetere edumunete akirot nakiwosaet. Konye kokukum Yesu, kiwadik alup kekebokorit.

⁷ Nakiyatanakiniata aiŋit ŋes, kitenar kotema kes atiar, “Yenemamei adiakaret kotomakus, kogeu aibir ŋes kamoru.”

⁸Kokukum bobo, kiwadik alup kekebokorit.

⁹ Kes da, nakiirariata, kilepilepata itauonokec, kolomasi idiopet idiopet, ageun komakio kiton lukawasia; kosalak Yesu bon, ka aberu ebwoi kanen kokidiŋ,

¹⁰Kitenar Yesu, kotema ŋes atiar, “Toto, alu bo ŋul lukiwosato jo? Emamei kereka yenikitubokini jo?”

¹¹ Kotema atiar, “Emamei, Ejakait.” Kotema Yesu atiar, “Eoŋ da mam katubokini jo: kolot; konye sirikidiaka bobo.”

¹² Kinera Yesu bobo kakes, kotema atiar, “Arai eoŋ aica naka akwapin; yenikatupuni eoŋ mam cut elosi kamuton, konye ejaas kaica naka aijar.”

¹³ Kotemasi Iparisayon ŋes atiar, “Itejenuni ijo elopet boni mam akoniitejenun erai nakabeit.”

¹⁴ Koboŋok Yesu kotema kes atiar, “Karaida ketejenun eoŋ elopet erai akaitejenun nakabeit; naarai ajeni nekabunio, ka nealosi da; konye yes mam ijenete nekabunio, karaida nealosi.

¹⁵ Itubete yesi kwape ejaar akuan; mam eoŋ atubokini ituŋanan.

¹⁶ Karaida katubi eoŋ, erai ekatube lokabeit; naarai mam eoŋ ajai bon, konye eoŋ ka lokejukuni.

¹⁷ Bobo da kotoma okisilakus iwadikatai ebe aitejenun naka ituŋa iarei erai nakabeit.

¹⁸ Etejenuni eoŋ elopet, ketejenuni Papa da lokejukuni.”

¹⁹ Kosodi kotemasi atiar, “Ejai bo ai Papakon?” Koboŋok Yesu ebe, “Mam kijenete eoŋ karaida Papaka; arai kiijenete eoŋ, tikijenut Papaka da.”

²⁰ Kinera akiro ŋun kotoma agola naka aiŋad, nakisisianakinia koyekalu; kwabo amamei etuŋanan loekamuni ŋes; naarai aroko ekesawa edoluno.

²¹ Kotema bobo atiar, “Alosi eoŋ, yes da kimoete, itwakete yesi kotoma adiakanaretakus; nealosi eoŋ mam yes ipedorete aponare.”

²² Kosodete kotemasi Iyudayan atiar, “Earakin ca, naarai ebala ebe, ‘Nealosi eoŋ mam yes ipedorete aponare’?”

²³ Kotema kes atiar, “Iraas yesi lukokwap, arai eoŋ lokokuju; iraas yesi luka akwapin kanu; mam eoŋ arai loka akwapin kanu.

²⁴Kanuka ŋun kalimokis yes ebe itwakete kotoma adiakanaretakus; naarai arai mam iyuunito ebe arai eoŋ, itwakete kotoma adiakanaretakus.”

²⁵ Kosodete kotemasi ŋes atiar, “Irai bo ijo iŋai?” Kotema Yesu kes atiar, “Ŋopeŋol lokalimokinit yes ameun kageunet.

²⁶ Ejaas nuipu einer ka aitub da kanukus: konye ŋol lokejukuni erai abeit; nueirari eoŋ kamake, kes enera kotoma akwapin.”

²⁷Kwabo mam apotu kojenut ebe inerakinit kes nuka Papa.

²⁸ Aso kotema Yesu atiar, “Naidauniata aikeun Okoku loka etuŋanan, ŋes konyet ijenuniata ebe eoŋ ŋopeŋol, ebe da mam eswamai akirot kanukaŋ bon, dimarai kwape kesisianakinia Papa, enera kwaŋin.

²⁹ Ejai ŋol lokejukuni nenipe keoŋ; mam kenyeinit eoŋ bon; naarai eswamaenenei nuekot ŋesi apaarasia kere.”

³⁰ Nakinerar ŋesi ŋun, kiyuut luipu.

³¹Aso kotema Yesu lyudayan lukiyuunito ŋes atiar, “Arai kisalakis toma akirotoka, abeit iraas ikakesisiak;

³²ijenunete da abeit, abeit da kiwosikini yes.”

³³ Koboŋokis ŋes ebe, “Kirai isio aur naka Aburaam, kwabo mam kiraunit ibulesin luka idiotuŋanan kere apakio kere: ikwaikini ijo ibala ai ebe, Kiwosikinio yes?”

³⁴ Koboŋok Yesu ebe, “Abeit, abeit, katemari yes atiar, Ŋinituŋanan yenediakanari erai ibulesit yenika adiakar.

³⁵ Mam ibulesit iboie kotogo ikar kere; konye iboie okoku ikar kere.

³⁶ Aso arai kiiwosik Okoku, iraas lukiwosikinitai cut.

³⁷Ajeni ebe iraas yesi aur naka Aburaam; konye kimootos aiar eoŋ, naarai emamei akakirot aibois kotomakus.

³⁸Nuaanyunit kaneejai Papa kes nuenera eoŋ: yes da iswamaete akiro nukiirarito kaneejai papakus.”

³⁹ Koboŋokis kotemasi ŋes atiar, “Papakosi ŋes Aburaam.” Kotema Yesu kes atiar, “Arai kiraas idwe luka Aburaam, tikiswamata aswamisio nuka Aburaam,

⁴⁰Konye kwana kimootos aiar eoŋ, lokalimoki yes abeit, naeirarit kama ejai Edeke: mam Aburaam abu kiswama kwaŋin.

⁴¹ Iswamaete yesi aswamisio nuka papakus.” Kotemasi ŋes atiar, “Mam sio kiwuritai kadoteu; ejai sio Papa ediopet, ŋes Edeke.”

⁴² Kotema Yesu kes atiar, “Arai kerai Edeke Papakus, tikiminas eoŋ; naarai abu kalom kama ka Edeke kabu; naarai mam kabuni kanukaŋ bon, konye ŋes kejukunit.

⁴³ Kanukinyo mam ijenuniata ŋun nuenera eoŋ? Naarai mam ipedorete aiirar akakirot.

⁴⁴ Iraas yesi luka Satan papakus, ikotosi da aswam airaŋaanut naka papakus. Kerai ŋesi ekaaran ameun kageunet, mam icasit kotoma abeit, naarai emamei abeit kotomakeŋ. Nainerar nukaiŋal, inera nueraas nukeŋ elopet; naarai erai ekeŋalan, papa da loka aiŋalanut.

⁴⁵ Konye naarai enera eoŋ abeit mam kiyuunito eoŋ.

⁴⁶ Iŋai kayes kelepilepi nukaronok? Arai enera eoŋ abeit, kanukinyo mam yes iyuuniata?

⁴⁷ Yenerai yenika Edeke iirari akiro nuka Edeke; kanuka ŋun mam yes iirarete, naarai mam iraas luka Edeke.”

⁴⁸ Koboŋokis Iyudayan kotemasi ŋes atiar, “Aso ca ma mam teni sio kinerit ejok ebe irai Esamariat, ido ejai jo ajokit?”

⁴⁹Koboŋok Yesu ebe, “Emamei eoŋ ajokit; konye ayoŋit eoŋ Papaka, konye yes kimwaŋito eoŋ.

⁵⁰ Kwabo eoŋ mam amoot akaibuses; ejai loemoot ka aitub da.

⁵¹ Abeit, abeit, katemari yes atiar, Arai keric ituŋanan akakirot, mam egipari atwanare ikar kere.”

⁵² Kobalas Iyudayan ebe, “Kwana do kijeni ebe ejai jo ajokit, Kotwana Aburaam, ka inabin da; ibala ijo ebe, ‘Arai keric ituŋanan akakirot, mam iiri atwanare ikar kere.’

⁵³ Itelekarit tope ijo kapolou papaakosi Aburaam loketwani? Inabin da luketwakete; ituluori ijo elopet iŋai?”

⁵⁴Koboŋok Yesu ebe, “Arai ketopoloor eoŋ elopet, akaibuses mam erai ibore; loketopoloorit eoŋ ŋes Papaka; ŋol loibakasi yesi ebe erai Ekusideke;

⁵⁵ kwabo mam ipotu kojenut ŋes; konye eoŋ ajeni ŋes; arai kener ebe, ‘Mam ajeni ŋes,’ tikaraun ekeŋalan kwape kayesi; konye ajeni ŋes, aricit da akekirot.

⁵⁶Abu papaakus Aburaam kolelakinite aanyun akapaaran; ŋes da koany, kiyalamikin.”

⁵⁷Kosodete kotemasi lyudayan atiar, “Eroko jo edolo ikar akaisakany, ianyunit tope ijo Aburaam?”

⁵⁸Kotema Yesu kes atiar, “Abeit, abeit, katemari yes atiar, Eroko Aburaam ejauna, ajai eoŋ.”

⁵⁹ Kosodete kirarata amor tetere ibiribirete; konye Yesu koŋop, koloma koyekalu.