Read Ateso Aswamisio 1 Bible Online

Aswamisio 1 - Ateso bible

Aswamisio 1

¹ Abu kewadik eitabo losodit, wu Teopilo, kotoma akiro kere nukegeuni Yesu aswam ka aisisianakin da,

² kiton apaaran naayaŋarere ŋes toma akuj, naadaunitor aicorakin ikiyakia luaseunit kanuka Emoyo Lokalaunan,

³Nakedaunia aiticanio kitodikin kes ejari kanuka nuitogogoŋete nuipu, kitakananakin kes apak naka apaarasia akaisaoŋon, ka ainerenen akiro nuebeito ajakanut naka Edeke.

⁴ Nakiriamunotor kakes kicorak kinyeis anyoun koYerusalem, konye kidarata aisumunet naka Papa. Kobala ebe, “Ipotu kiirasi ŋun kamakaŋ;

⁵ naarai abu Yokana kibatis kakip, konye yes kibatisao kEmoyo Lokalaunan eriŋa etuboro apaarasia nuipu.”

⁶ Kosodi naketukokinotor, kiŋita ŋes ebe, “Ejakait, apak na ŋes kereka nainyakakinia Isirael ajakanut?”

⁷ Kotema kes atiar, “Mere nakus ajenun apakio karaida ikar luabu Papa kitemok kapedorike.

⁸ Konye idumunete agogoŋ kedau Emoyo Lokalaunan adoikin yes; iraunete yesi ikakajenak kotoma Yerusalem, ka Yudaya kere, ka Samaria, kiton osaŋe da loka akwap.”

⁹ Kedau einer ŋun, naperoko esesenete, kodakarai, kiteribo edou kakonyenekec.

¹⁰ Napesesenete noi akuj naalosio ŋesi, koany kobwaata ikiliok iarei aapu kakes enapito lukakwaŋak,

¹¹ kobalas ebe, “Yes ikiliok luko Galilaya, kanukinyo ibwoiata kosesenete akuj? Yesu ŋol, loayaŋaar kamakus alosit toma akuj, eboŋuni kopone kaŋope kaŋol loianyuniata ŋes elosi toma akuj.”

¹² Kosodete koboŋosi Yerusalem anyoun komoru loenyaritai loka Iseitunin, loeapias ka Yerusalem, alosit bala naka apaaran nakasabato.

¹³ Nakelomariata kodokasi agola nakokuju, nakiboienenoto; Petero ka Yokana, ka Yakob, ka Anderea, Pilip ka Tomas, Batolomayo ka Matayo, Yakob okoku loka Alipayo, ka Simon Selot, ka Yuda okoku loka Yakob.

¹⁴ Ŋul kere kinyikokinito ailip ketau ediopet, nepepe kaŋor ka Mariam toto naka Yesu, ka ikeinacan.

¹⁵Kapaarasia kaŋun kobwo Petero kokidiŋ kiinacan, (etiai loka ekodet kerai bala akwatat ka akaisaarei) kobala ebe,

¹⁶ “Iinacan, ibusakinit kodolo nakiwadikatai, nakinerit kolo Emoyo Lokalaunan kaituk naka Daudi, nuka Yuda lokiŋarenikinit ŋul lukikamunete Yesu.

¹⁷Naarai kimaritai nepepe kaoni, kodum ekewai kotoma aijaanakin kana.

¹⁸ (Naarai kogwelia etuŋanan ŋol amana keropit loka aronisike; kibiror keŋeso kocila, kolomut amoetenake kere.

¹⁹Kojenunos kotuŋa kere luiboiete koYerusalem, konyarai amana ŋin kaŋajepakec Akeledama, apolouke ebe Amana naka Aokot.)

²⁰ Naarai iwadikatai kotoma oitabo loka Isabulin ebe, ‘Kosilior ekere, Komamuun ituŋanan yeniboie kanen.’ Bobo da ebe, ‘Kirum ece akepolou,’

²¹ Aso kotoma otuŋa luaupenenas kaoni kapakio kere nukelomanaria Ejakait Yesu kolomununei da mamawok,

²² ameun kaibatis naka Yokana, kiton apaaran naayaŋarere kamawok alosit toma akuj, ibusakinit ediopet kakesi araun ekajenan loka ajarunike nepepe kaoni.”

²³Koseut iarei, Yosep loenyaritai Barasaba, lokerai ekekiror Yusito, ka Matiya.

²⁴ Kilipa, kotemasi atiar, “Ijo Ejakait loijeni itauon luka ituŋa kere, kitodikinai loiseunit ijo kotoma kalu luarei,

²⁵kirum aibois kotoma aijaanakin kana ka aiyakianut na, naebuci Yuda kolot akeibois elopet.”

²⁶ Kilamilamata eroet, kobeik eroet Matiya; kimarakinai nepepe kikiyakia itomon kalodiopet.