Read Ateso Aswamisio 10 Bible Online

Aswamisio 10 - Ateso bible

Aswamisio 10

¹ Kojai etuŋanan koKaisarea ekekiror Korunelio, ekapolokiton loka erioŋet loenyaritai Italian,

²etuŋanan loeyoŋit Edeke, nepepe ka lukokaleke kere, lokekorenenei nukaitim nuipu otuŋa, ka ailipenen da Edeke tir.

³ Kosawa lokikanyetekaoŋon loka apaaran koany kaitapoet kaitebeikin emalaika loka Edeke ebunit neejai ŋesi, lokinera ebe, “Korunelio.”

⁴Kosesen noi, kokurianar, kobala ebe, “Anyoika, Ejakait?” Kotema ŋes atiar, “Adokasi ailipikon ka aikorokon araun aisitunet akonyen nuka Edeke.

⁵Aso kwana kiyakia ituŋa Yopa, konyarau Simon loenyaritai Petero:

⁶ Ipejokinit ŋesi Simon, ekekisikisan imukulen, loejai eketogo ariri kaŋolol.”

⁷Nakelosio emalaika loeneras kaŋes, konyarau iarei kokejaanakinakake lukotogo, ka eserikalet ediopet loeyoŋit Edeke kotoma kaŋul kalukijaanakinete ŋes tiritir;

⁸nakedaunia aitatamikin akiro kere, kijuka kes Yopa.

⁹Kapaaran naatupakini, nakelosioto, ka aapikin ere, kodoka Petero kuju oswi loketogo ailip, kosawan ikanykape luka paaran.

¹⁰Korieb noi eteŋei, kokoto ainyam: konye napitemonokinio, kogelakin ekemoyo,

¹¹ koany akuj eŋaara, ka ibore yenejesunitai, bala aisuka naepol, ijoliliunitoi kwap kowaitin iwoŋon,

¹²Nakejaas iponesio kere luka itiaŋ, ka lueliatos kakwap, ka ikweny luka apak,

¹³Kobu eporoto ebe, “Petero, konyou; koar, konyam.”

¹⁴ Konye kotema Petero atiar, “Mam cut, Ejakait; naarai mam anyamenenei ibore yeniketal, karaida yenimam elai.”

¹⁵ Kobu eporoto irwan nakiareit ebe, “Luitalaunit Edeke, sirikinyara ijo luketal.”

¹⁶Kiswama akirot ŋin irwan auni, atipet kinyakarai ibore ii toma akuj.

¹⁷Napebuonokin Petero kotauke apolou naka aitapoet naanyunit, koany, kobwoete ituŋa lukiyakuunit Korunelio kokek, kedaut aiŋitun etogo loka Simon,

¹⁸Konyarata kiŋita arai ipejot Simon loenyaritai Petero nen.

¹⁹ Napeomoomoi Petero aitapoet, kotema Emoyo ŋes atiar, “Koany, ejaas ituŋa iuni lukimooto jo.

²⁰Aso konyou, kijesar kwap, koupakinos kakes komam ibuonokin; naarai eoŋ ejukunit kes.”

²¹Kijesun Petero mama ejaas ituŋa, kobala ebe, “Eoŋ lo lokimooto; iponitos kanuka akiro anyoika?”

²²Kotemasi atiar, “Korunelio, ekapolokiton, etuŋanan loedolit Ioeyoŋit Edeke, loitojokitai kotoma ateker kere naka Iyudayan, abu emalaika lokalaunan kikwenya ŋes anyaraun jo alosit togoke, tetere iirari akiro kamakon.”

²³ Kisukunyik kes araut ikepejok. Kapaaran naatupakini konyou kolot kakes, koupakinos da ice koinacan luko Yopa kaŋes.

²⁴Kapaaran naatupakini kolomasi Kaisarea. Kidaret kes Korunelio, kotukokinite lukajenake ka ikepadic da.

²⁵Napelomari Petero, kisiriam Korunelio ŋes, kibirokin akejeke, koma ŋes.

²⁶ Konye Petero kitonyou ŋes, kobala ebe, “Kobwo; arai eoŋ da etuŋanan.”

²⁷Napinera, koloma kodum ituŋa luipu etukokina;

²⁸kotema kes atiar, “Ijenete yesi ikulepek kwape eraar naketal Eyudayat aimorikikina arai aipejokin etuŋanan kere loka ateker ace; konye abu Edeke ketodik eoŋ ebe mam ebusakinit anyara idiotuŋanan yeniketal arai yenimam elai.

²⁹Kanuka ŋun nakanyaraunere, abu komam aŋeri, Aso keŋisit anyoin akirot nakinyaritotor eoŋ.”

³⁰Kotema Korunelio atiar, “Eraas apaarasia aoŋon atuboros, kwape esawa lo, abu karicite esawa lokikanyetekaoŋon loka ailip kotogoka; ido koany, kobwo etuŋanan kakonyeneka enapit luimiliasi,

³¹kabala ebe, ‘Korunelio, eirar akoniilip, akoniikor da eitun kakonyen nuka Edeke.

³²Aso kiyakia ituŋa Yopa, konyarau Simon loenyaritai Petero; ipejokinit ŋesi togo loka Simon, ekekisikisan imukulen, kariri naka aŋolol.’

³³Aso abu kanyarau jo atipet, iswama ejok abunore. Aso kwana kija ne kere akonyen nuka Edeke, keirasi kere nukicorakinit Ejakait jo.”

³⁴ Kosodi kooŋ Petero akeituk, kotema atiar, “Abeit ajenu ebe mam Edeke etiakatiakai ituŋa,

³⁵ konye kotoma ŋiniteker yeneyoŋit, kiswama da nuedolito, ecamuni ŋesi.

³⁶ Akirot nakijukakini idwe luka Isirael, elimonokini akiro nukajokak nuka ainapakin kotoma Yesu Kristo, (ŋes Ejakait loka kere,)

³⁷ ijenete yesi akirot naalimoritai anatar Yudaya kere, ageun koGalilaya, akaulo ka aibatisa naalimonokini Yokana;

³⁸ Kwape kinyonyoikinia Edeke Yesu loko Nasaret akinyet naka Emoyo Lokalaunan ka apedor; lokelosenenei iswamai nuejok, itaŋaleununei kere lukiticani Satan, naarai kejai Edeke nenipe kaŋes.

³⁹ Kirai isio ikajenak luka akiro kere nukiswamai ŋesi kakwap naka Iyudayan, koYerusalem da; koarata ŋol kaikajakin okitoi.

⁴⁰ Abu Edeke kitajaru ŋes kapaaran nakiwuniet, koinak ŋes aitodiario;

⁴¹ mere kotuŋa kere, konye mamakosi luabu Edeke koseu sek araut ikajenak, lukinyami ka aimat da nepepe kaŋes kedau ajarun kokatwak.

⁴² Kicorak sio kalimonokis ituŋa, ka aitejenun da ebe ŋol ŋes lekedakakini Edeke araut ekatubon loka ikajarak ka ikatwak da.

⁴³ Ŋol ŋes itejenunitos inabin kere ebe kanuka ekekiror ŋinituŋanan yeniyuuni ŋes edumuni aisionio naka adiakanareta.”

⁴⁴Naperiŋa Petero inera ŋun, kodoik Emoyo Lokalaunan kere lukiirarete akirot.

⁴⁵Koumokis lukiyuunito lukekepitai lukeupunos ka Petero, naarai abukokin Imo da ainakinet naka Emoyo Lokalaunan.

⁴⁶ Naarai kiirasi kes ineras kaŋajepa ka aitopoloor Edeke. Kosodi Koboŋok Petero ebe,

⁴⁷“Epedori kereka ituŋanan aisimik akipi nuka aibatis ituŋa lu, luainakin Emoyo Lokalaunan kwape kaoni?”

⁴⁸ Kicorak kes aibatisao kokiror loka Yesu Kristo. Kosodete kilipata ŋes asalakin apaarasia nuipupuuto.