Read Ateso Aswamisio 11 Bible Online

Aswamisio 11 - Ateso bible

Aswamisio 11

¹Kosodete kiirasi ikiyakia ka iinacan luajaas Yudaya ebe eyuut Imo da akirot naka Edeke.

² Kosodi nakedolunio Petero Yerusalem, ko pegata lukekepitai nepepe kaŋes,

³ kobalas ebe, “Ibu kolot otuŋa lumam ekepitai, komorata kakes.”

⁴Konye kogeu Petero aitejenun kaisudunyit, kotema atiar,

⁵ “Abu kajai ore loka Yopa elipi; kogelakin ekamoyo kaany aitapoet, ijesun ibore, bala aisuka naepol, ijoliliunio kokuju kowaitin iwoŋon; kadolok.

⁶Kerere, kaŋic, ido kaany itiaŋ luka akwap, ka itiaŋ luededeŋ, ka lueliatos, ka akweny nuka apak.

⁷Keira eporoto ebala ebe, ‘Petero, konyou; koar, konyam.’

⁸Konye katema atiar, ‘Mam cut, Ejakait; naarai ibore yenerai yeniketal karaida yenimam elai mam elomarit cut aitukuka.’

⁹Konye Koboŋok eporoto irwan nakiareit ebuni kokuju ebe, ‘Lukitalauni Edeke mam ibusakinit jo anyarit luketal.’

¹⁰Kiswama akirot na irwan auni, kosodi kiriarai bobo kere toma akuj.

¹¹Atipet ŋipeŋin, kobwaata ituŋa iuni koiŋaren ketogo lokija, lukiyakuunio mama ajai koKaisarea.

¹²Kalimok Emoyo aupar kakes komam abuonokin. Koloto iinacan lu ikanykape nepepe keoŋ, kalomasi togo loka etuŋanan kaje.

¹³Kitejenik epone lokeanyunia emalaika lokebwoi kotogoke ka atemar ebe, ‘Kiyakia ituŋa Yopa, konyarau Simon loenyaritai Petero;

¹⁴lokilimokini akiro nukitaiarete, ijo ka lukokalekon kere.’

¹⁵Konye napageari einer, kodoik kes Emoyo Lokalaunan kwape kiidoikinio oni kageunet.

¹⁶ Keitu do akirot naka Ejakait, kwape kinerar ebe, ‘Abu Yokana kibatis kakip, konye yes kibatisao kEmoyo Lokalaunan.’

¹⁷Aso arai ainaki Edeke kes ainakinet ŋin nakiinakinit oni nakiyuunia Ejakait Yesu Kristo, eoŋ bo iŋai lotiapedori airebokin Edeke?”

¹⁸ Nakiirariata akirot ŋin kililiŋata. Kitopoloosi Edeke, kobalas ebe, “Ainak Edeke kiton Imo da aitoronikin naeyauni aijar.”

¹⁹ Kosodete lukisiarakinos kanuka aimanit nakedoikini kanuka akiro nuka Sitepan, koloto kiton Poenike ka Kupuro ka Antiokia, komam elimonokinete akirot dimarai oYudayan bon,

²⁰Konye ice kaŋul luko Kupuro ka Kurene, nakedolioto Antiokia, kinerata ka Iyonanin da elimonokinete akiro nukajokak nuka Ejakait Yesu.

²¹ Kojai akan naka Ejakait nenipe kakes, kiyuut ituŋa luipu kibelokinos neejai Ejakait.

²² Kodol eemut loka ituŋa kaŋul aki nuka ekanisa lokejai toma Yerusalem, kiyakiasi Baranaba Antiokia.

²³ Nakedolio koany da asianut naka Edeke, kiyalamikin; kicor kes kere aikokoikin aimorikikina ka Ejakait kikecetauon kere;

²⁴ naarai kerai etuŋanan loejok, loeleleba Emoyo Lokalaunan ka aiyuun. Kiyatakinos ituŋa luipu mama ejai Ejakait.

²⁵ Kosodi kolot Baranaba Taruso amoot Saul.

²⁶ Nakedumunia koyau ŋes Antiokia. Kosodi kanen kotukonokinos nenipe kekanisa adaun ekaru kere, kisisianakis ituŋa luipu; ido kotoma Antiokia Ŋes ageunere amaikin ikesisiak Ikristayon.

²⁷ Kapaarasia kaŋun kijesaros inabin anyoun koYerusalem kiton Antiokia.

²⁸ Kobwo ediopet kakesi ekekiror Agabo, kodwar kanuka Emoyo ebe, ebuni ebeli loepol anatar akwapin kere; kojau da kapaarasia nuka Kulaudia.

²⁹ Kinerut ikesisiak, ŋinituŋanan kwape epedoria, aijukakin iinacan lueboiete ko Yudaya iboro luiŋarakinete;

³⁰ Kiswamata kwaŋin, kijukakis imakio kakanin nuka Baranaba ka Saul.